ສາລະວັນ ຕົບແຕ່ງແຫຼ່ງທ່ອງທ່ຽວຫຼາຍແຫ່ງຮອງຮັບປີໃໝ່ລາວ

  ເພື່ອເປັນການຊຸກຍູ້ສົ່ງເສີມການທ່ອງທ່ຽວພາຍໃນແຂວງສາລະວັນ ໃຫ້ມີບັນຍາກາດຄຶກຄື້ນ, ມ່ວນຊື່ນ ແລະ ມີຄວາມສະຫງົບ, ປອດໄພໂດຍສະເພາະໃນໄລຍະເທສະການສະເຫຼີມສະຫຼອງບຸນປີໃໝ່ລາວ ພສ 2562 ທີ່ຈະມາເຖິງນີ້ ແລະເພື່ອຮອງຮັບນັກທ່ອງທ່ຽວທັງພາຍໃນ ແລະຕ່າງປະເທດທີ່ຈະເດີນທາງມາທ່ຽວແຂວງສາລະວັນມີຄວາມສະດວກສະບາຍໃນການທ່ຽວຊົມສະຖານທີ່ແຫຼ່ງທ່ອງທ່ຽວຕ່າງໆພາຍໃນແຂວງພະແນກຖະແຫຼງຂ່າວ, ວັດທະນະທຳ ແລະທ່ ອງທ່ຽວແຂວງໄດ້ມີການລົງກະກຽມສະຖານທີ່, ປະດັບປະດາ ແລະອື່ນໆຫຼາຍແຫຼ່ງທ່ອງທ່ຽວພາຍໃນແຂວງ.

  ການລົງປັບປຸງຄັ້ງນີ້ແມ່ນໄດ້ມີການປັບປຸງເສັ້ນທາງ,ຈັດສັນສະຖານທີ່ພາກລົດ,ປັບປຸງຂົວໄມ້ທີ່ເປ້ເພ,ສ້າງບ່ອນພັກຜ່ອນ, ບ່ອນຫຼິ້ນນໍ້າ, ບ່ອນຖ່າຍຮູບ, ມີການຕິດປ້າຍບອກເຂດອັນຕະລາຍ, ມີການອະນາໄມ ແລະປະດັບປະດາຢ່າງ ຈົບ ງາມ ໂດຍສະເພາະແມ່ນແຫຼ່ງທ່ອງ ທ່ຽວທີ່ສໍາຄັນ ແລະເປັນຈຸດເຕົ້າໂຮມ ມວນຊົນຊາວແຂວງສາລະວັນກໍ່ຄືຕ່າງແຂວງເປັນຕົ້ນ: ແມ່ນຕາດເລາະ-ຕາດຮັງ, ປາກເສັດ-ແກ້ງກຸ, ອຸທິຍານພູຜາສຸກ ແລະ ແຫຼ່ງທ່ອງທ່ຽວອື່ນໆອີກຈຳນວນໜຶ່ງ.

   ທ່ານ ສົມໃຈ ອຸ່ນຈິດ ຫົວໜ້າພະແນກ ຖວທ ແຂວງເປີດເຜີຍວ່າ: ເພື່ອເຮັດໃຫ້ການທ່ອງທ່ຽວມີບັນຍາກາດເບີກບານມ່ວນຊື່ນ ແລະມີຄວາມສະຫງົບປອດໄພ. ຫຼາຍພາກສ່ວນໄດ້ມີການປຶກສາຫາລືໃນການຈັດຕັ້ງປ້ອງກັນເວນຍາມໃນແຕ່ລະຈຸດແກ້ໄຂບັນຫາທີ່ອາດຈະເກີດຂຶ້ນໃຫ້ທ່ວງທັນກັບສະພາບການ, ພ້ອມດຽວກັນນີ້ຍັງມີມາດຕະການ, ການອະນາໄມສະຖານທີ່ ແລະ ປັບປຸງບາງສະຖານທີ່ຮອງຮັບນັກທ່ອງທ່ຽວໃຫ້ມີຄວາມສະດວກສະບາຍ ແລະໄດ້ເອົາໃຈໃສ່ໃນການເກັບຂີ້ເຫຍື່ອໃນແຕ່ລະມື້ຢ່າງລະອຽດຮັບປະກັນຄວາມສະອາດຈົບງາມຂອງແຫຼ່ງທ່ອງທ່ຽວອີກດ້ວຍ.

ຂ່າວ: ທິດລານີ ໂຄດໂຍທາ    

• 04/04/2019