ກອງປະຊຸມໂຄສະນາ, ເຜີຍແຜ່ນະໂຍບາຍ, ກົດໝາຍ ໃຫ້ບັນດານາຍບ້ານແບບຢ່າງດີເດັ່ນສອງຟາກຊາຍແດນລາວ-ຫວຽດນາມ

ໃນທ່າມກາງບັນຍາກາດທີ່ສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ອ້າຍນ້ອງພວມສະເຫຼີມສະຫຼອງປີສາມັກຄິມິດຕະພາບສອງວັນປະຫວັດສາດ ກໍຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະວັນເຊັນສົນ ທິສັນຍາມິດຕະພາບ ລາວ-ຫວຽດນາມ ຄົບຮອບ 45 ປີ; ໂດຍສະເພາະ ໃນໂອກາດ ຄົບຮອບ 45 ປີ ວັນເຊັນສົນທິສັນຍາກໍານົດຊາຍແດນແຫ່ງຊາດລາວ- ຫວຽດນາມ (18/7/1977 – 18/7 /2022), ສະຫາຍ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຮອງປະທານຄະນະກຳມະການຊາຍແດນແຫ່ງຊາດ ໄດ້ນຳພາຄະນະຜູ້ແທນຊາຍແດນທັງສູນກາງ ແລະທ້ອງຖິ່ນຂອງລາວ ເດີນທາງໄປເຄື່ອນໄຫວຢ້ຽມຢາມ ແລະເຮັດວຽກຢູ່ ແຂວງເຫງະອານ, ສສ ຫວຽດນາມ, ແຕ່ວັນທີ 5-7 ທັນວາ 2022 ນີ້.

ໃນວັນທີ 6 ທັນວາ 2022 ທີ່ ຕາແສງເກືອລໍ, ແຂວງເຫງະອານ, ສະຫາຍ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະສະຫາຍ ເລມິງ ຄາຍ, ເລຂາທິການສູນກາງພັກ, ຮອງນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ເປັນປະທານຮ່ວມໃນພິທີເປີດກອງປະຊຸມໂຄສະນາ, ເຜີຍແຜ່ນະໂຍບາຍ, ກົດໝາຍ ໃຫ້ບັນດານາຍບ້ານແບບຢ່າງທີ່ດີເດັ່ນທີ່ເປັນຕົວແທນຂອງສອງຝາກຊາຍແດນ ລາວ-ຫວຽດນາມ, ໂດຍມີຄະນະຜູ້ແທນຕາງໜ້າບັນດາກະຊວງ, ຂະແໜງການສູນກາງ ແລະ ທ້ອງຖິ່ນຂອງສອງປະເທດ, ໃນນັ້ນມີຕາງໜ້ານາຍບ້ານແບບຢ່າງດີເດັ່ນຫຼາຍກ່ວາ 300 ສະຫາຍ ຈາກ 10 ແຂວງຊາຍແດນລາວ-ຫວຽດນາມ ເຂົ້າຮ່ວມຢ່າງພ້ອມພຽງ.

ຊຶ່ງຈູດປະສົງຂອງການຈັດກອງປະຊຸມເຜີຍແຜ່ໃນຄັ້ງນີ້ ແນ່ໃສ່ 1). ຫວນຄືນມູນເຊື້ອແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ຊຶ່ງເປັນປັດໃຈອັນສຳຄັນຕັດສິນໄຊຊະນະຂອງການປະຕິວັດລາວ ແລະ ຫວຽດ ນາມ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ການສ້າງສາພັດທະນາຂອງທັງສອງປະເທດ ໃນປະຈຸບັນ; 2). ໂຄສະນາເຜີຍແຜ່ບັນດານິຕິກໍາ ແລະ ກົດໝາຍ, ລະບຽບການຕ່າງໆກ່ຽວກັບຊາຍແດນ ໃຫ້ແກ່ບັນດາເປົ້າໝາຍທີ່ເປັນນາຍບ້ານຂອງສອງຝາກຊາຍແດນລາວ- ຫວຽດນາມ ເພື່ອຮັບຮູ້ ແລະເຂົ້າໃຈແຈ້ງກ່ຽວກັບລະບຽບການຊາຍແດນ, ການປົກປັກຮັກສາຊາຍແດນໃຫ້ມີຄວາມສະຫງົບ, ການຄຸ້ມຄອງຊາຍແດນໃຫ້ຖືກຕ້ອງ ແລະ ສອດຄ່ອງກັບລະບຽບຫຼັກການຕ່າງໆເປັນຕົ້ນການໄປມາຫາສູ່, ການທຳມາຫາກິນທຳການຜະລິດປູກຝັງລ້ຽງສັດຂອງປະຊາຊົນສອງຝາກ ໃຫ້ຮັບຮູ້ເຖິງເສັ້ນຊາຍແດນ ບໍ່ໃຫ້ລ່ວງລ້ຳຂ້າມຊາຍແດນ, ທັງເປັນການປະກອບສ່ວນຍົກສູງໜ້າທີ່ຮັບຜິດຊອບຂອງປະຊາຊົນບໍລິເວນຊາຍແດນໃຫ້ສູງຂຶ້ນ, ເພື່ຶອເພີ່ມທະວີຮັດແໜ້ນຄວາມສາມັກຄີພິເສດ, ການຮ່ວມມືຮອບດ້ານທີ່ເປັນມູນເຊື້ອຍາວນານ ແລະ ການພົວພັນທີ່ດີຕໍ່ກັນ ລະຫວ່າງ ບັນດາແຂວງທ້ອງຖິ່ນຂອງສອງຝາກຊາຍແດນ ກໍຄື ໃຫ້ມີສະຖຽນລະພາບ ແລະ ໝັ້ນຄົງທະນົງແກ່ນຕະຫຼອດໄປ; 3). ເປັນການໂຄສະນາ-ສ້າງຄວາມເຂົ້າໃຈໃຫ້ເຈົ້້າກົກເຈົ້າເລົ່າ (ນາຍບ້ານ) ແລະ ປະຊາຊົນບັນດາເຜົ່າ ໂດຍສະເພາະແມ່ນຄົນຮຸ່ນໜຸ່ມໃຫ້ມີຄວາມຮັບຮູ້ເຂົ້າໃຈທີ່ຖືກຕ້ອງ, ເລິກເຊິ່ງ, ໜັກແຫນ້ນ ແລະ ສືບຕໍ່ປົກປັກຮັກສາຊາຍແດນລາວ ແລະ ຫວຽດນາມ ໄວ້ໃຫ້ໝັ້ນຄົງຍາວນານ, ປະຊາຊົນສອງຊາດ ເຄີຍມີມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະກັນ, ເພື່ອເປັນເຈົ້າການທະນຸຖະໜອມເພີ່ມພູນຄູນສ້າງມູນເຊື້ອດັ່ງກ່າວໃຫ້ຈະເລີນງອກງາມຍິ່ງໆຂຶ້ນ, ທັງນີ້ກໍເພື່ອຜົນປະໂຫຍດລວມໃນຕໍ່ໜ້າ ແລະ ຍາວນານຂອງສອງພັກ, ສອງລັດ ແລະ ປະຊາຊົນບັນດາເຜົ່າຂອງສອງຊາດ. ໃນໂອກາດນີ້, ບັນດານາຍບ້ານແບບຢ່າງດີເດັ່ນສອງຟາກຊາຍແດນ ໄດ້ຮັບຟັງ ແລະ ປະກອບຄໍາເຫັນແລກປ່ຽນບັນດາ 9 ຫົວຂໍ້ສໍາຄັນ ກ່ຽວກັບ ການພົວພັນພິເສດ ລາວ-ຫວຽດນາມ, ວຽກງານຄຸ້ມຄອງຊາຍແດນ ແລະ ບັນດາເນື້ອໃນນະໂຍບາຍ, ກົດໝາຍກ່ຽວຂ້ອງບໍລິເວນຊາຍແດນສອງປະເທດ; ພ້ອມດຽວກັນນັ້ນກໍ່ໄດ້ຮັບຟັງການລາຍງານຈາກຕາງໜ້ານາຍບ້ານບາງສະຫາຍ ແລະ ຕາງໜ້າອົງການກ່ຽວຂ້ອງກ່ຽວກັບວຽກງານປົກປັກຮັກສາເສັ້ນຊາຍແດນ, ຫຼັກໝາຍຊາຍແດນໃນບໍລິເວນບ້ານ, ເຂດການຜະລິດຂອງປະຊາຊົນ ແລະມີການປະກອບຄຳຄິດຄຳເຫັນເພື່ອເຮັດໃຫ້ວຽກງານຄຸ້ມຄອງ, ປົກປັກຮັກສາເສັ້ນຊາຍແດນ ແລະ ຫຼັກໝາຍຊາຍແດນ ໄດ້ດີຂຶ້ນກວ່າເກົ່າ.

ໃນໂອກາດດັ່ງກ່າວ, ສອງສະຫາຍຮອງນາຍົກລັດຖະມົນຕີ ລາວ-ຫວຽດນາມ ກໍໄດ້ຕີລາຄາສູງຕໍ່ອົງການຊາຍແດນສູນກາງຂອງສອງປະເທດສົມທົບກັບຄະນະກໍາມະການປະຊາຊົນແຂວງເຫງະອານ ແລະ ບັນດາກະຊວງ, ຂະແໜງການ, ທ້ອງຖິ່ນກ່ຽວຂ້ອງສອງປະເທດ ທີ່ໄດ້ຈັດກອງປະຊຸມຄັ້ງນີ້ຂຶ້ນ, ເຊິ່ງຖືເປັນການຢັ້ງຢືນ ແລະ ຮັບຮູ້ເຖິງບົດບາດສໍາຄັນຂອງບັນດານາຍບ້ານ ບຸກຄົນທີ່ມີຄວາມໜ້າເຊື່ອຖືຢູ່ບໍລິເວນຊາຍແດນສອງປະເທດ ຕໍ່ກັບພາລະກິດປົກປັກຮັກສາເສັ້ນຊາຍແດນ. ໃນຫຼາຍປີຜ່ານມາ, ຜ່ານການເຮັດວຽກຕົວຈິງ, ບັນດາເຖົ້າແກ່ແນວໂຮມ ແລະ ພາກສ່ວນກ່ຽວຂ້ອງທີ່ໜ້າເຊື່ອຖືຂອງບ້ານບໍລິເວນຊາຍແດນ ໄດ້ປະກອບສ່ວນຢ່າງຫຼວງຫຼາຍເຂົ້າໃນວຽກງານປົກປັກຮັກສາເສັ້ນຊາຍແດນ, ຫຼັກໝາຍຊາຍແດນ, ຮັກສາຄວາມສະຫງົບ, ຮັບປະກັນຄວາມເປັນລະບຽບຮຽບຮ້ອຍຢູ່ບໍລິເວນຊາຍແດນ ແລະຜືນແຜ່ນດິນອັນຄົບຖ້ວນຂອງຊາດ. ພ້ອມນັ້ນ, ກອງປະຊຸມ ຍັງໄດ້ເນັ້ນໜັກໃຫ້ບັນດານາຍບ້ານ ສືບຕໍ່ປະກອບສ່ວນເຂົ້າໃນວຽກງານຊາຍແດນ, ການພົວພັນສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ. ພ້ອມນີ້, ສອງສະຫາຍຮອງນາຍົກລັດຖະມົນຕີໄດ້ຍົກໃຫ້ເຫັນຄວາມໝາຍຄວາມສຳຄັນຂອງການໂຄສະນາເຜີຍແຜ່ບັນດາຂໍ້ຕົກລົງ, ສົນທິສັນຍາສາກົນ, ສະເພາະແມ່ນສອງເນື້ອໃນເອກະສານກົດໝາຍກ່ຽວກັບຊາຍແດນ ຄື: ອະນຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍແດນ ລາວ-ຫວຽດນາມ ແລະ ສັນຍາ ວ່າດ້ວຍ ລະບຽບການຊາຍແດນ ແລະ ດ່ານຊາຍແດນ ລາວ-ຫວຽດນາມ, ເປັນປັດໃຈຕັດສິນເຖິງປະສິດທິຜົນຂອງວຽກງານຊາຍແດນ ລາວ-ຫວຽດນາມ. ເພາະສະນັ້ນ, ກອງປະຊຸມຄັ້ງນີ້, ຕາງໜ້າບັນດາກະຊວງ, ຂະແໜງການ, ທ້ອງຖິ່ນ ແລະ ບັນດານາຍບ້ານແບບຢ່າງດີເດັ່ນຂອງສອງປະເທດ ຈະກໍາໄດ້ບັນດາເນື້ອໃນສໍາຄັນກ່ຽວກັບແນວທາງ, ແຜນນະໂຍບາຍຂອງສອງພັກສອງລັດທີ່ພົວພັນເຖິງວຽກງານຊາຍແດນກໍ່ຄືນະໂຍບາຍສະເໝີຕົ້ນສະເໝີປາຍໃນການຮັກສາ ແລະເສີມຂະຫຍາຍສາຍພົວພັນພິເສດ ລາວ-ຫວຽດນາມ.

ສອງສະຫາຍຮອງນາຍົກລັດຖະມົນຕີໄດ້ສະແດງຄວາມເຊື່ອໝັ້ນວ່າ: ພາຍຫຼັງກັບເຖິງທ້ອງຖິ່ນ, ບັນດານາຍບ້ານແບບຢ່າງດີເດັ່ນສອງປະເທດຈະນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປໂຄສະນາເຜີຍແຜ່ ແລະສືບຕໍ່ຜັນຂະຫຍາຍບົດບາດເປັນແກ່ນສານໃນການລະດົມ ແລະຊີ້ນໍາປະຊາຊົນຢູ່ບັນດາຕາແສງ,ບ້ານຊາຍແດນ ປະຕິບັດນະໂຍບາຍຂອງສອງພັກ, ສອງລັດ, ບັນດານິຕິກໍາກົດໝາຍຂອງສອງປະເທດ, ໂດຍສະເພາະແມ່ນບັນຫາເຄົາລົບ ແລະ ປົກປັກຮັກສາເສັ້ນຊາຍແດນ, ຫຼັກໝາຍຊາຍແດນ, ບັນຫາຂ້າມຜ່ານຊາຍແດນ, ການແຕ່ງງານຂອງປະຊາຊົນຢູ່ບໍລິເວນສອງຟາກຊາຍແດນ ແລະ ບັນຫາຕ່າງໆ ເຊັ່ນ: ການຍົກຍ້າຍທໍາການຜະລິດ, ການຕັ້ງພູມລໍາເນົາຕາມລໍາພັງໃຈ ແລະ ການແຕ່ງງານແບບບໍ່ຖືກຕ້ອງຕາມລະບຽບການຊາຍແດນ; ບັນດານາຍບ້ານແບບຢ່າງດີເດັ່ນ ຈະສືບຕໍ່ເພີ່ມທະວີປຶກສາຫາລື, ແລກປ່ຽນວັດທະນາທໍາ, ຂະຫຍາຍຮູບແບບບ້ານແຮກສ່ຽວ, ພ້ອມກັນສ້າງບໍລິເວນຊາຍແດນສອງປະເທດ ໃຫ້ກາຍເປັນບ້ານແບບຢ່າງດ້ານວັດທະນາທຳ, ປະກອບສ່ວນໃນການສ້າງສາພັດທະນາເສດຖະກິດ-ສັງຄົມ ຢູ່ບໍລິເວນຊາຍແດນ, ລຶບລ້າງຄວາມທຸກຍາກ, ຍົກສູງຊິວິດການເປັນຢູ່ຂອງປະຊາຊົນບໍລິເວນຊາຍແດນ ຕິດພັນກັບການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອດີງາມຂອງ ລາວ-ຫວຽດນາມ ຫວຽດນາມ-ລາວ.

ນອກຈາກນີ້, ບັນດາຜູ້ແທນທີ່ເຂົ້າຮ່ວມປະຊຸມຄັ້ງນີ້ຍັງໄດ້ຮ່ວມເຄື່ອນໄຫວກິດກະຈໍາພົບປະແລກປ່ຽນວັດທະນະທໍາ ລາວ-ຫວຽດນາມ, ທັດສະນະທ່ຽວຊົມສະຖານທີ່ປະຫວັດສາດ, ບ້ານເກີດປະທານໂຮ່ຈິມິນ ແລະ ສະຖານທີ່ທ່ອງທ່ຽວທາງດ້ານວັດທະນະທໍາ ແລະ ການພັດທະນາເສດຖະກິດຂອງແຂວງເຫງະອານເພື່ອເຮັດໃຫ້ບັນດາຜູ້ແທນມີຄວາມເຂົ້າໃຈຕື່ມ, ເພີ່ມທະວີການພົວພັນເຊິ່ງກັນ ແລະກັນ, ປະກອບສ່ວນໃນການຮັດແໜ້ນສາຍພົວພັນມິດຕະພາບແບບພິເສດໃຫ້ແຕກດອກອອກຜົນຍິ່ງໆຂຶ້ນ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

แชร์