ລາວ - ບູຣູນດີ ລົງນາມວ່າດ້ວຍການຍົກເວັ້ນວີຊາທາງການທູດ

ເມື່ອບໍ່ດົນມານີ້ໂດຍການສືບຕໍ່ຈັດຕັ້ງປະຕິບັດສັນຍາວ່າດ້ວຍການສ້າງຕັ້ງສາຍພົວພັນການທູດທີ່ໄດ້ລົງນາມຮ່ວມກັນໃນຕົ້ນປີນີ້ທັງເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະສາທາລະນະລັດ ບູຣູນດີ (Republic of Burundi), ຢູ່ທີ່ ສຳນັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການ ສປຊ ທີ່ນະຄອນ ນິວຢອກ, ໄດ້ມີພິທີລົງນາມ ໃນສັນຍາ ວ່າດ້ວຍການຍົກເວັ້ນວີຊາ ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ ລະຫວ່າງ ສາທາ ລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ບູຣູນດີ, ໂດຍຕາງໜ້າໃຫ້ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການ ສປຊ, ແລະ ຕາງໜ້າໃຫ້ ລັດຖະບານ ແຫ່ງ ສາທາ ລະນະລັດ ບູຣູນດີ ແມ່ນ ທ່ານ ເຊຟີຣິນ ແມນິຣາຕັງກາ (H.E. Mr. Zéphyrin Maniratanga), ເອກອັກຄະລັດຖະທູດ ວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສາທາລະນະລັດ ບູຣູນດີ ປະຈໍາອົງການ ສປຊ ໄດ້ຮ່ວມລົງນາມໃນສັນຍາດັ່ງກ່າວ ໂດຍການເຂົ້າຮ່ວມເປັນສັກຂີພິຍານໃນພິທີຂອງບັນດານັກການທູດຂອງທັງສອງຝ່າຍ.

ຊຶ່ງການລົງນາມສັນຍາສະບັບນີ້ຈະເປັນການສືບຕໍ່ອໍານວຍຄວາມສະດວກໃຫ້ແກ່ການໄປມາຫາສູ່ ແລະຫວ່າງນັກການທູດ ແລະພະນັກງານລັດຖະບານຂອງທັງສອງປະເທດ, ທັງເປັນການເສີມຂະຫຍາຍການພົວພັນ ແລະ ຮ່ວມມືສອງຝ່າຍ ໃຫ້ໄດ້ຮັບຜົນເປັນຈິງຫຼາຍຂຶ້ນ, ໂດຍສະເພາະໃນທ່າມກາງບັນຍາກາດ ທີ່ພາຍຫຼັງສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 4 ກຸມພາ 2022 ທີ່ຜ່ານມາທີ່ນິວຢອກ.

ສາທາລະນະລັດ ບູຣູນດີ ຕັ້ງຢູ່ພາກຕາເວັນອອກຂອງທະວີບອາຟຣິກາ ມີຊາຍແດນຕິດກັບ 03 ປະເທດຄື: ຣູວັນດາ (Rwanda), ຕັງຊາເນຍ (Tanzania) ແລະ ສາທາລະນະລັດ ປະຊາທິປະໄຕ ກົງໂກ (D.R Congo), ມີເນື້ອທີ່ທັງໝົດ 27,834 km2 ແລະ ນະຄອນຫຼວງ ກິເຕກາ (Gitega). ໃນຫລາຍປີຜ່ານມາ, ໂດຍສະເພາະ ພາຍໃຕ້ຂອບ ອົງການ ສປຊ, ສປປ ລາວ ແລະ ບຸຣຸນດີ ມີການຮ່ວມມືກັນໃນຫລາຍຂອບການຮ່ວມມື ເປັນຕົ້ນ ໃນກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ (LLDC), ກຸ່ມ 77, ຂະບວນການບໍ່ຮ່ວມກຸ່ມ (NAM) ແລະອື່ນໆ. ບູຣູນດີ ເຂົ້າເປັນສະມາຊິກ ອົງການ ສປຊ ໃນວັນທີ 18 ກັນຍາ 1962.
ຂ່າວ;ພາບ: ກົມການຂ່າວ ກະຊວງການຕ່າງປະເທດ

แชร์