ມະຫາວິທະຍາໄລຊົນເຜົ່າກວາງຊີ ມອບປະກາສະນິຍະບັດປະລິນຍາເອກ ກິຕິມະສັກ ໃຫ້ ທ່ານ ທອງລຸນ ສີສຸລິດ

ໃນວັນທີ 1 ທັນວາ ທີ່ຜ່ານມາ, ມະຫາວິທະຍາໄລຊົນເຜົ່າກວາງຊີ ຈັດພິທີມອບໃບປະກາສະນິຍະບັດ ປະລິນຍາເອກກິຕິມະສັກ ສາຂາພາສາ ແລະວັນນະຄະດີຕ່າງປະເທດໃຫ້ແກ່ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານ ປະເທດ ແຫ່ງ ສປປ ລາວ ທີ່ນະຄອນຫລວງປັກກິ່ງ ສປ ຈີນ ຊຶ່ງມອບໂດຍ ທ່ານ ເຊ້ຊາງໂກ ຜູ້ອຳນວຍການໃຫຍ່ມະຫາວິທະຍາໄລຊົນເຜົ່າກວາງຊີ ໂດຍມີ ທ່ານ ນາງ ນາລີ ສີສຸລິດ ພັນລະຍາຂອງທ່ານປະທານປະເທດແຫ່ງ ສປປ ລາວ, ພ້ອມດ້ວຍຄະນະຜູ້ແທນຂັ້ນສູງຂອງລາວເຂົ້າຮ່ວມ.

ໂອກາດນີ້, ທ່ານ ທອງລຸນ ສີສຸລິດ ມີຄໍາເຫັນວ່າ: ໃບປະກາສະນິຍະບັດປະລິນຍາເອກນີ້ຈະເປັນອີກນິມິດໝາຍທີ່ສຳຄັນຍິ່ງໃຫ້ແກ່ການມາຢ້ຽມຢາມທາງລັດຖະກິດ ສປ ຈີນ ໃນຄັ້ງນີ້ ກໍຄື ໃນນາມສ່ວນຕົວຂອງຂ້າພະເຈົ້າເອງ, ເປັນການສະແດງໃຫ້ເຫັນເຖິງໄມຕິຈິດມິດຕະພາບອັນເລິກເຊິ່ງ ແລະ ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະການສ້າງຄູ່ຮ່ວມຊະຕາກໍາລະຫວ່າງ ສອງພັກ, ສອງລັດກໍຄື ປະຊາຊົນສອງຊາດ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງທັງໃນລວງເລິກ ແລະລວງກວ້າງ.

ມະຫາວິທະຍາໄລຊົນເຜົ່າກວາງຊີ ເປັນມະຫາວິທະຍາໄລທີ່ເກົ່າແກ່, ມີຊື່ສຽງ ແລະມີປະຫວັດຄວາມເປັນມາຢ່າງຍາວນານແຫ່ງໜຶ່ງຂອງ ສປ ຈີນ, ເປັນສະຖາບັນການສຶກສາສຳຄັນ ທີ່ໄດ້ກໍ່ສ້າງຊັບພະຍາກອນມະນຸດທີ່ມີຄວາມຮູ້ຄວາມສາມາດ ແລະ ມີວິໄສທັດອັນກວ້າງໄກ ຫລາຍຮຸ່ນຄົນມາແລ້ວ. ນອກຈາກນີ້, ມະຫາວິທະຍາໄລຊົນ ເຜົ່າຊົນກວາງຊີ ຍັງມີການຮ່ວມມືຢ່າງກວ້າງຂວາງກັບ ສປປ ລາວ ເປັນຕົ້ນ ການຮ່ວມມືທາງດ້ານວິຊາການ, ການແລກປ່ຽນການຮຽນ-ການສອນ ແລະ ການສະໜັບສະໜູນການພັດທະນາຊັບພະຍາກອນມະນຸດ ກັບ ມະຫາວິທະຍາໄລຂອງລາວ ໂດຍສະເພາະແມ່ນໄດ້ສ້າງຕັ້ງສະຖາບັນຂົງຈື້ ຢູ່ ລາວ (ໃນປີ 2007). ຂ້າພະເຈົ້າຫວັງເປັນຢ່າງຍິ່ງວ່າມະຫາວິທະຍາໄລຊົນເຜົ່າກວາງຊີຈະສືບຕໍ່ເພີ່ມທະວີໃຫ້ການຮ່ວມມືກັບສະຖາບັນການສຶກສາຂອງ ສປປ ລາວ ເພື່ອຊ່ວຍຍົກສູງຄຸນນະພາບການຮຽນ-ການສອນ ແລະການຄົ້ນຄວ້າວິໄຈຕ່າງໆ ໃຫ້ໄດ້ຕາມມາດຕະຖານສາກົນເທື່ອລະກ້າວ.

ມະຫາວິທະຍາໄລຊົນເຜົ່າກວາງຊີ ໄດ້ເສີມຂະຫຍາຍທ່າແຮງທີ່ເປີດປະຕູສູ່ບັນດາປະເທດສະມາຊິກອາຊຽນ, ໄດ້ມີການແລກປ່ຽນ ແລະຮ່ວມມືກັບມະຫາວິທະຍາໄລ ແລະອົງການຈັດຕັ້ງການສຶກສາຕ່າງໆ ທັງໝົດ 176 ແຫ່ງຂອງ 22 ປະເທດ ແລະເຂດແຄວ້ນໃນທົ່ວໂລກ, ມາຮອດປັດຈຸບັນໄດ້ຮັບນັກສຶກສາຕ່າງປະເທດຈາກ 82 ປະເທດ ແລະເຂດແຄວ້ນ ຫລາຍກວ່າ 22.000 ຄົນ ແລະໄດ້ສົ່ງນັກສຶກສາຈີນຫລາຍກວ່າ 18.000 ຄົນໄປຮຽນຢູ່ປະເທດຕ່າງໆໃນທົ່ວໂລກ.
ຂ່າວ: ຂປລ

แชร์