ພ້ອມຮອບດ້ານກັບການປ້ອງກັນງານມະຫາກໍາກິລາແຫ່ງຊາດ ຄັ້ງທີ XI

ມາຮອດປັດຈຸບັນນີ້, ກໍາລັງປ້ອງກັນຄວາມສະຫງົບ ແຂວງຊຽງຂວາງ ແມ່ນມີຄວາມພ້ອມຮອບດ້ານໃນການປະຕິບັດໜ້າທີ່ປ້ອງກັນຄວາມສະຫງົບໃຫ້ແກ່ງານມະຫາກໍາກິລາແຫ່ງຊາດ ຄັ້ງທີ XI ຫຼື ຊຽງຂວາງເກມ ໃຫ້ມີຄວາມສະຫງົບປອດໄພ 100%.

ທ່ານ ພົຈວ ບຸນລົດ ຄໍາແພງພັນ ຫົວໜ້າກອງບັນຊາການ ປກສ ແຂວງຊຽງຂວາງ ໃຫ້ສໍາພາດຕໍ່ນັກຂ່າວສື່ມວນຊົນ ປກສ ໃນວັນທີ 1 ທັນວາ ທີ່ຜ່ານ ນີ້ວ່າ: ພາຍຫຼັງກອງບັນຊາການ ປກສ ແຂວງຊຽງຂວາງ ໄດ້ຮັບທິດຊີ້ນຳຈາກຂັ້ນເທິງ ກໍໄດ້ປະສານສົມທົບກັບກົມເສນາຫ້ອງວ່າການກະຊວງ ປກສ ເປີດກອງປະຊຸມກະກຽມບັນດາໜ້າວຽກທີ່ພົວພັນເຖິງວຽກງານວິຊາສະເພາະປ້ອງກັນຄວາມສະຫງົບ ເປັນຕົ້ນ ຈັດຝຶກອົບຮົມວຽກງານວິຊາສະເພາະ 4 ວຽກງານຄື: ວຽກງານຈະລາຈອນ, ວຽກງານສະຫຼາຍການປະທ້ວງ, ວຽກງານດັບເພີງ ແລະ ວຽກງານກ້ອງວົງຈອນປິດ, ໄດ້ຮັບເອົານັກສຶກສາຈາກ 2 ວິທະຍາຄານ ຂອງກະຊວງ ປກສ ມາລົງຝຶກງານຢູ່ ປກສ ແຂວງ ຈໍານວນ 456 ສະຫາຍ ຍິງ 77 ສະຫາຍ ພ້ອມທັງເຮັດວຽກເກັບກໍາສະພາບ ແລະ ແກ້ໄຂສະພາບຄວາມບໍ່ສະຫງົບ ແລະຄວາມບໍ່ເປັນລະບຽບຮຽບຮ້ອຍໂດຍສະເພາະຈຸດມົ້ວສຸມສິ່ງເສບຕິດ, ຈຸດຫຼໍ່ແຫຼມ, ຄົນເລ່ລ່ອນເຊິ່ງໄດ້ເລີ່ມຈັດຕັ້ງປະຕິບັດແຕ່ກາງເດືອນຕຸລາ 2022 ເປັນຕົ້ນມາ, ໄດ້ສົມທົບກັບຄະນະຊີ້ນຳວຽກງານປ້ອງກັນຂອງກະຊວງ ປກສ, ກົມສູ້ຮົບກະຊວງປ້ອງກັນປະເທດ, ກົມວິຊາສະເພາະກະຊວງ ປກສ ແລະ ກອງບັນຊາການທະຫານແຂວງ ເພື່ອລົງກວດກາສະຖານທີ່ແຂ່ງຂັນກິລາຕົວຈິງເພື່ອວາງແຜນ ແລະຈັດວາງກໍາລັງໃຫ້ແທດເໝາະກັບສະພາບຕົວຈິງ, ກໍານົດຈຸດປ້ອງກັນນັບທັງພື້ນຖານໂຄງລ່າງ ແລະສະໜາມກິລາ, ບ່ອນພັກເຊົານັກກິລາ ລວມທັງໝົດ ຈໍານວນ 61 ຈຸດ. ໃນນີ້, ຈຸດແຂ່ງຂັນ 13 ຈຸດ, ບ່ອນພັກເຊົານັກກິລາ ແລະ ຄູຝຶກ 18 ຈຸດ, ຈຸດບັນຊາ ແລະ ວຽກງານວິຊາສະເພາະ 8 ຈຸດ ແລະ ຈຸດພື້ນຖານໂຄງລ່າງຕ່າງໆ 22 ຈຸດ. ມາຮອດປັດຈຸບັນ, ການກະກຽມແຜນບັນຈຸກໍາລັງເຂົ້າປ້ອງກັນແຕ່ລະຈຸດຖືວ່າໄດ້ສຳເລັດ ແລະມີຄວາມພ້ອມຮອບດ້ານ ເພື່ອຮັບປະກັນໃຫ້ງານຄັ້ງນີ້ມີຄວາມສະຫງົບ-ປອດໄພ 100%

ນອກນັ້ນ, ກອງບັນຊາການ ປກສ ແຂວງຊຽງຂວາງ ຍັງໄດ້ອອກແຈ້ງການ ສະບັບເລກທີ 2158/ປກສ ຊຂ ລົງວັນທີ 10 ຕຸລາ 2022 ໃຫ້ທົ່ວສັງຄົມໃນຂອບເຂດເທດສະບານແຂວງ ແລະບັນດາເມືອງຕ້ອງໄດ້ເພີ່ມທະວີການຮັກສາຄວາມສະຫງົບ-ຄວາມເປັນລະບຽບຮຽບຮ້ອຍທາງສັງຄົມ ໃນຊ່ວງເວລາຈັດງານ, ແຈ້ງການດັ່ງກ່າວກໍໄດ້ລະບຸແຈ້ງວ່າ: ບັນດາສໍານັກງານ-ອົງການ, ພື້ນຖານພໍ່ແມ່ປະຊາຊົນ ແລະອໍານາດການປົກຄອງທ້ອງຖິ່ນຕ້ອງໄດ້ເພີ່ມທະວີຄວາມເອົາໃຈໃສ່ໃນການປະກອບສ່ວນເຂົ້າໃນວຽກງານປ້ອງກັນຄວາມສະຫງົບເປັນຕົ້ນປ້ອງກັນເວນຍາມ ສະຖານທີ່ຕົນເອງຮັບຜິດສອບໃຫ້ເຂັ້ມງວດ, ຖ້າມີກໍລະນີສຸກເສີນເກີດຂຶ້ນຕອນໃດໃຫ້ການຈັດຕັ້ງບ່ອນນັ້ນຮີບຮ້ອນແກ້ໄຂ ຫຼື ໂທແຈ້ງປະຈຳການ ປກສ ແຂວງ 061 213578, ດັບເພີງ 030 5724441 ຫຼື 030 5724445 ອຸບັດຕິເຫດ 061 211351.
ພາບ-ຂ່າວ: ແກ້ວ ອຸເພັດ

แชร์