ໝົດປີນີ້ລັດຖະບານ ຈະສູ້ຊົນໃຫ້ເສດຖະກິດແຫ່ງຊາດ ຂະຫຍາຍຕົວ 4,4%

ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ລາຍງານກ່ຽວກັບ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະແຜນເງິນຕາໃນວາລະຂອງການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ທີ່ໄດ້ໄຂຂຶ້ນໃນຕອນເຊົ້າວັນທີ 5 ທັນວາ 2022ນີ້ວ່າ: ຜ່ານການຊຸກຍູ້ໃຫ້ບັນດາຫົວໜ່ວຍການຜະລິດກະສິກໍາ, ອຸດສາຫະກໍາ ແລະບໍລິການທີ່ເປັນທ່າແຮງຂັບເຄື່ອນການຂະຫຍາຍຕົວຂອງເສດຖະກິດໃຫ້ດີຂຶ້ນ, ອີງໃສ່ການຄິດໄລ່ GDP ໃນໄລຍະ 9 ເດືອນຜ່ານມາເຫັນວ່າເສດຖະກິດແຫ່ງຊາດຂະຫຍາຍຕົວຢູ່ໃນລະດັບ 4,2% ແລະ ຄາດວ່າໝົດປີຈະສູ້ຊົນໃຫ້ຂະຫຍາຍຕົວໄດ້ໃນລະດັບ 4,4% (ແຜນການ 4,5%) ເຖິງແມ່ນວ່າຈະບໍ່ບັນລຸຕາມແຜນ ແຕ່ກໍມີທ່າອ່ຽງຂະຫຍາຍຕົວທີ່ດີຂຶ້ນຈາກ ປີ 2021 ແມ່ນ 3,5% ເພາະຢູ່ໃນສະພາບແວດລ້ອມທີ່ຫຍຸ້ງຍາກ ແລະທ້າທາຍໃນປັດຈຸບັນ.

ສຳລັບການເກັບລາຍຮັບງົບປະມານໄດ້ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫລຂອງລາຍຮັບງົບປະມານແຫ່ງລັດດ້ວຍການສຸມໃສ່ຫັນການເກັບລາຍຮັບເປັນທັນສະໄໝ ແລະອອກນິຕິກໍາລຸ່ມກົດໝາຍຈໍານວນໜຶ່ງພ້ອມທັງສຸມໃສ່ສ້າງຖານອາກອນມູນຄ່າເພີ່ມໄດ້ 9.496 ຫົວໜ່ວຍໃນຈໍານວນທັງໝົດ 10.500 ຫົວໜ່ວຍໃນຂອບເຂດທົ່ວປະເທດ ກວມເອົາ 90,4%; ສືບຕໍ່ສ້າງຖານລາຍຮັບໃໝ່ຈໍານວນໜຶ່ງໃນຂົງເຂດຕ່າງໆ ເຊັ່ນ: ການຜະລິດ ແລະ ສົ່ງອອກ ສິນຄ້າກະສິກໍາ, ການເຮັດທົດລອງແຮ່ທາດ, ການແກ້ໄຂພາຫະນະທີ່ນໍາເຂົ້າບໍ່ຖືກຕ້ອງ, ການທົດລອງປະຕິບັດໂຄງການ ຂຸດຄົ້ນ Bitcoin, ປັບປຸງການຂົນສົ່ງທາງລົດໄຟ, ເປີດປະເທດຮັບເອົານັກທ່ອງທ່ຽວ ແລະອື່ນໆ. ເຮັດໃຫ້ການເກັບລາຍຮັບງົບປະມານ 11 ເດືອນ ບັນລຸໄດ້ 28.455 ຕື້ກີບ ເທົ່າກັບ 90,06% ຂອງແຜນການປີ (ບໍ່ລວມເອົາລາຍຮັບ ຈາກການຫລຸດຜ່ອນອັດຕາອາກອນຊົມໃຊ້ ເພື່ອດັດສົມລາຄານໍ້າມັນທີ່ລັດຖະບານໄດ້ຊ່ວຍໜູນທົ່ວສັງຄົມ ຈໍານວນ 2.819 ຕື້ກີບ), ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 26% ຫລືເປັນເງິນທຽບເທົ່າ 5.849 ຕື້ກີບ. ໃນນີ້, ລາຍຮັບພາຍໃນສາມາດບັນລຸໄດ້ 26.655 ຕື້ກີບ, ເທົ່າກັບ 92,03% ຂອງແຜນ ການປີ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 29% ຫລື ເພີ່ມຂຶ້ນເປັນເງິນທຽບເທົ່າ 5.980 ຕື້ກີບ. ຄາດຄະເນລາຍຮັບໝົດປີ 2022 ຈະປະຕິບັດໄດ້ເກີນແຜນ ໃນລະດັບບໍ່ຫລຸດ 2% (ຈະເປັນປີທີ 2 ຕິດຕໍ່ກັນທີ່ສາມາດເກັບລາຍຮັບໄດ້ເກີນແຜນ).

ທ່ານນາຍົກລັດຖະມົນຕີ ໃຫ້ຮູ້ຕື່ມວ່າ: ລັດຖະບານໄດ້ສືບຕໍ່ຄຸ້ມຄອງ ແລະແກ້ໄຂບັນຫາໜີ້ສິນໄປຕາມຂອບແຜນທີ່ໄດ້ກໍານົດໄວ້ ແລະສາມາດປະຄັບປະຄອງໃນການຊໍາລະໜີ້ສິນໄດ້ ໂດຍສາມາດເຮັດໃຫ້ປະເທດເຮົາບໍ່ໃຫ້ຕົກເປັນປະເທດທີ່ຊໍາລະໜີ້ສິນບໍ່ໄດ້. ພ້ອມນີ້, ການຮັກສາສະຖຽນລະພາບດ້ານເງິນຕາ, ລັດຖະບານໄດ້ສຸມໃສ່ແກ້ໄຂບັນຫາການເໜັງຕີງຂອງ ອັດຕາແລກປ່ຽນເງິນຕາຕ່າງປະເທດ ແລະ ອັດຕາເງິນເຟີ້ເພື່ອປະຄັບປະຄອງການເໜັງຕີງດັ່ງກ່າວ ໃຫ້ຢູ່ໃນຈັງຫວະທີ່ຊ້າລົງ. ໃນນີ້, ໄດ້ສຸມໃສ່ຄຸ້ມຄອງບັນດາຮ້ານແລກປ່ຽນ ໃຫ້ເຂົ້າສູ່ການຄຸ້ມຄອງຂອງທະນາຄານທຸລະກິດຊຶ່ງສາມາດດັດສົມຮ້ານແລກປ່ຽນຈາກໃນຕົ້ນ ປີ 2022 ມີທັງໝົດຈໍານວນ 419 ຮ້ານ ມາຮອດປັດຈຸບັນເຫລືອຈໍານວນ 113 ຮ້ານ ແລະ ໃນຕໍ່ໜ້າຍັງຈະສືບຕໍ່ກວດກາຄຸນນະພາບ ແລະການປະຕິບັດລະບຽບການເຄື່ອນໄຫວແລກປ່ຽນເງິນຕາ, ຖ້າຫາກເຫັນວ່າຮ້ານໃດ ບໍ່ສາມາດປະຕິບັດໄດ້ ຫລືລະເມີດຈະສືບຕໍ່ຖອນໃບອະນຸຍາດຕື່ມອີກກ້າວໄປສູ່ການຫັນການບໍລິການແລກປ່ຽນທັງໝົດເປັນປ່ອງບໍລິການຂອງທະນາຄານທຸລະກິດຄືກັບປະເທດອື່ນໆ. ພ້ອມນັ້ນກໍໄດ້ຄຸມເຂັ້ມການໂອນເງິນຊື້-ຂາຍສິນຄ້າ ແລະເງິນທີ່ນໍາເຂົ້າມາລົງທຶນຕ້ອງຜ່ານລະບົບທະນາຄານ; ໄດ້ແກ້ໄຂການສະໜອງເງິນຕາຕ່າງປະເທດໃຫ້ແກ່ບໍລິສັດທີ່ນໍາເຂົ້ານໍ້າມັນເຊື້ອໄຟທີ່ເປັນຫລັກແຫລ່ງຊຶ່ງສາມາດສະໜອງນໍ້າມັນເຊື້ອໄຟໃຫ້ສັງຄົມໄດ້ປົກກະຕິ (ເຖິງລາຄາຈະສູງແດ່ ກໍຂຶ້ນຢູ່ກັບຕະຫລາດສາກົນ).

ລັດຖະບານໄກ້ສຸມໃສ່ປະຕິຮູບລັດວິສາຫະກິດ, ໄດ້ອອກເປັນມະຕິໃນການແບ່ງຄວາມຮັບຜິດຊອບໃນການປັບປຸງລັດວິສາຫະກິດ, ທັງໄດ້ກໍານົດບັນຊີລັດວິສາຫະກິດທີ່ຈະປັບປຸງຢ່າງລະອຽດໂດຍສະເພາະ 5 ລັດວິສາຫະກິດຍຸດທະສາດ (ລັດວິສາຫະກິດໄຟຟ້າລາວ,ລັດວິສາຫະກິດນໍ້າມັນເຊື້ອໄຟລາວ,ບໍລິສັດຜະລິດ-ໄຟຟ້າລາວມະຫາຊົນ, ລັດວິສາຫະກິດການບິນລາວ ແລະ ລັດວິສາຫະກິດພັດ ທະນາກະສິກໍາ, ອຸດສາຫະກໍາ ແລະ ບໍລິການຂາເຂົ້າ-ຂາອອກ). ການປັບປຸງແມ່ນສຸມໃສ່ປັບປຸງປະສິດທິຜົນຂອງການບໍລິຫານ, ປັບໂຄງສ້າງຫນີ້ສິນຂອງລັດວິສາຫະກິດ ແລະ ປັບປຸງໂຄງສ້າງການຖືຮຸ້ນເພື່ອໃຫ້ການບໍລິຫານຈັດການເປັນມືອາຊີບ ແລະມີຄວາມໂປ່ງໃສມີປະສິດຕິຜົນທາງເສດຖະກິດ. ຜ່ານການປັບປຸງເຫັນວ່າການເຄື່ອນໄຫວທຸລະກິດຂອງລັດວິສາຫະກິດຈໍານວນໜຶ່ງມີທ່າອ່ຽງທີ່ດີຂຶ້ນສົມທຽບໃນໄລຍະຜ່ານມາ.

ການສົ່ງເສີມການລົງທຶນຂອງພາກເອກະຊົນ: ໄດ້ສືບຕໍ່ປັບປຸງກົນໄກອໍານວຍຄວາມສະດວກ ແລະ ສົ່ງເສີມການລົງທຶນ ຕາມນະໂຍບາຍ ແລະ ຄໍາສັ່ງຂອງລັດຖະບານ ເປັນຕົ້ນ ການຕັດຂັ້ນຕອນການພິຈາລະນາຂອງຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງ ແລະຂັ້ນແຂວງອອກ; ເອົາໃຈໃສ່ຊຸກຍູ້ບັນດາໂຄງການລົງທຶນກໍ່ສ້າງ ພື້ນຖານໂຄງລ່າງຂະຫນາດໃຫຍ່ຈໍານວນໜຶ່ງຊຶ່ງໄດ້ມີຄວາມຄືບໜ້າຕາມແຜນການທີ່ກໍານົດໄວ້. ນອກຈາກນີ້, ລັດຖະບານໄດ້ມີຄວາມພະຍາຍາມແກ້ໄຂ ການສ້າງວຽກເຮັດງານທໍາ ແລະຈັດສັນແຮງງານໂດຍສະເພາະແຮງງານທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະແຮງງານລາວທີ່ກັບມາຈາກປະເທດໃກ້ຄຽງ ໃຫ້ມີຄວາມສະຫງົບເປັນພື້ນຖານ. ພ້ອມທັງເອົາໃຈໃສ່ຂຶ້ນທະບຽນ ແລະສ້າງສີມືແຮງງານທີ່ມີຄຸນນະພາບເພື່ອສົ່ງອອກແຮງງານໃຫ້ບາງປະເທດທີ່ມີຄວາມຕ້ອງການ ແລະເໝາະສົມກັບສີມືຂອງແຮງງານລາວ (ໃນປີ 2022 ສາມາດສົ່ງອອກແຮງງານໄປຕ່າງປະເທດ ຈໍານວນ 49.504 ຄົນ).
ຂ່າວ: ມະນີທອນ, ພາບ: ຂັນໄຊ, ອ່າຍຄຳ

แชร์