ເອກະຊົນຈະລົງທຶນ 255 ຕື້ກວ່າກີບ ສ້າງໂຮງງານແປຮູບຂີ້ເຫຍື້ອເປັນພະລັງງານທົດແທນ

  ເອກະຊົນຈະລົງທຶນ 255 ຕື້ກວ່າກີບ ສ້າງຕັ້ງໂຮງງານແປຮູບຂີ້ເຫຍື້ອຜະລິດເປັນພະລັງງານທົດແທນທີ່ບ້ານຜາສຸກ (ຫຼັກ 32) ເມືອງໄຊທານີ ໂດຍເວລານີ້ແມ່ນໄດ້ຮັບອະນຸຍາດສຳປະທານຈາກລັດຖະບານແລ້ວຄາດວ່າພາຍໃນປີ 2021 ຈະສ້າງສໍາເລັດ ແລະເດີນເຄື່ອງຜະລິດຢ່າງເປັນທາງການ.

  ໃນວັນທີ 2 ເມສາທີ່ຜ່ານມາທີ່ນະຄອນຫຼວງວຽງຈັນ ກໍໄດ້ຈັດພິທີເຊັນສັນຍາດັດແກ້ແລະເພີ່ມເຕີມຂອງສັນຍາວ່າດ້ວຍການສໍາປະທານເນື້ອທີ່ດິນ ແລະສະ ໜາມຂີ້ເຫຍື້ອເພື່ອສ້າງໂຮງງານດັ່ງກ່າວຊຶ່ງລົງນາມໂດຍ ທ່ານ ພູຂົງ ບັນນະວົງ ຫົວໜ້າພະແນກແຜນການ ແລະການລົງທຶນນະຄອນຫຼວງວຽງຈັນ, ທ່ານ ນາງ ວິໄລວອນ ຈັນທະລາຕີ ຫົວໜ້າຫ້ອງການ ຄບຕ, ທ່ານ ຈັນທະລາ ອິນທະລັງສີ ເຈົ້າເມືອງໆໄຊທານີ, ທ່ານ ປອ ຄໍາຫຼ້າ ນາກຄະວົງ ປະທານບໍລິສັດຂວັນ ເມືອງກຣູບ ຈໍາກັດ, ທ່ານ ກິດຕິ ຊີວະເກດ ປະທານບໍລິສັດ ຍູເອຊີ ເອເນີຍີ້ ຈໍາກັດ, ທ່ານ ເສດຖະສິຣິ ສັກສິດເສ ລີກຸນ ປະທານບໍລິສັດ ສະແບງຊັດສ໌ເທນ ເນເບີ້ນ ເອເນີຍີ້ ຈໍາກັດ, ໂດຍເປັນກຽດເຂົ້າຮ່ວມມີທ່ານ ນາງ ຄໍາຈັນ ວົງແສນ ບູນ ຮອງລັດຖະມົນຕິກະຊວງແຜນການ ແລະການລົງທຶນ ແລະພາກສ່ວນທີ່ກ່ຽວຂ້ອງ.

  ທ່ານ ປອ ຄໍາຫຼ້າ ນາກຄະວົງ ໃຫ້ຮູ້ວ່າ: ການລົງນາມເຊັນສັນຍາຄັ້ງນີ້ ເພື່ອໃຫ້ເກີດປະໂຫຍດໃນການນໍາຂີ້ເຫຍື້ອມາແປຮູບນໍາໄປໃຊ້ໃຫ້ເກີນປະໂຫຍດ ແລະ ຜະລິດເປັນພະລັງງານໄຟຟ້າຊຶ່ງສາມາດເພີ່ມພະລັງງານໄຟຟ້າໃຫ້ກັບເມືອງໄຊທານີ ແລະນະຄອນຫຼວງວຽງຈັນເປັນການເພີ່ມມູນຄ່າໃຫ້ກັບຂີ້ເຫຍື້ອຫຼຸດຜ່ອນການປ່ອຍກາສເຮືອນແກ້ວ ທັງຊ່ວຍຫຼຸດບັນຫາທາງດ້ານມົນລະພິດ ແລະສິ່ງແວດລ້ອມຊຶ່ງເປັນບັນຫາຕໍ່ສຸຂະພາບອະນາໄມຂອງປະຊາຊົນແກ້ບັນຫາຂີ້ເຫຍື້ອຊຸມຊົນທີ່ອັ່ງອໍໄດ້ຢ່າງຢັ້ງຢືນ ແລະໝັ້ນຄົງໃນອະນາຄົດເປັນການສ້າງວຽກເຮັດງານທໍາໃຫ້ຄົນໃນພື້ນທີ່ເຮັດໃຫ້ນະຄອນຫຼວງວຽງຈັນເປັນເມືອງທີ່ສະອາດສົ່ງຜົນດີຕໍ່ອຸດສາຫະກໍາການທ່ອງທ່ຽວໃນອະນາຄົດ.

ການລົງທຶນໂຄງການນີ້ຊຶ່ງເປັນໂຮງງານຄັດແຍກຂີ້ເຫຍື້ອຊຸມຊົນທີ່ມີປະລິມານຂີ້ເຫຍື້ອເລີ່ມຕົ້ນທີ່ 400 ໂຕນຕໍ່ມື້, ຜະລິດໄຟຟ້າ 6 ເມັດກາວັດ, ພາສຕິກມານໍາໃຊ້ໃໝ່ປະມານ 40 ໂຕນຕໍ່ມື້ ແລະຝຸ່ນອິນຊີປະມານ 100 ໂຕນຕໍ່ມື້ ໂດຍຈະມີມູນຄ່າການລົງທຶນທັງໝົດ 30 ລ້ານໂດລາ ປະມານ 255 ຕື້ກວ່າກີບ ໄລຍະເວລາກໍ່ສ້າງ 2 ປີ ຄາດວ່າຈະສໍາເລັດໂຄງການປະມານຕົ້ນປີ 2021.

ຂ່າວ: ວົງມະນີ     

แชร์