ສະຫວັນນະເຂດ ທຳລາຍສິນຄ້າເສື່ອມຄຸນ-ລອກຮຽນແບບ

ພະແນກອຸດສາຫະກໍາ ແລະການຄ້າ (ອຄ) ແຂວງສະຫວັນນະເຂດ ໄດ້ຈັດພິທີທໍາລາຍສິນຄ້າເສື່ອມຄຸນເສຍຄຸນໝົດອາຍຸສິນຄ້າລອກຮຽນແບບ ແລະສິນຄ້າລະເມີດເຄື່ອງໝາຍການຄ້າທີ່ຜິດຕໍ່ລະບຽບກົດໝາຍຈໍານວນໜຶ່ງຂຶ້ນວັນທີ 29 ພະຈິກ 2022 ຢູ່ສະໜາມກໍາຈັດຂີ້ເຫຍື້ອບ້ານຊອກ ນະຄອນໄກສອນ ພົມວິຫານ ໂດຍມີ ທ່ານ ວັນແສງ ແກ້ວບຸນພັນ ວ່າການຫົວໜ້າພະແນກ ອຄ ແຂວງ ທ່ານ ສົມຊາຍ ນົງລາດ ຮອງຫົວໜ້າກົມການຄ້າພາຍໃນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ແກ້ວອຸດອນ ສິດທິຊົນ ຫົວໜ້າອົງການປະຕິບັດວຽກງານກວດກາການຄ້າຂັ້ນແຂວງພະແນກ ອຄ ແຂວງສະຫວັນນະເຂດ ໄດ້ກ່າວວ່າ: ໂດຍປະຕິບັດຕາມທິດຊີ້ນໍາຂອງຫົວໜ້າພະແນກ ອຄ ແຂວງກໍຄືກົດໝາຍວ່າດ້ວຍປົກປ້ອງຜູ້ຊົມໃຊ້ດໍາລັດວ່າດ້ວຍການກວດກາການຄ້າຂໍ້ຕົກລົງຂອງລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ ດ້ວຍມາດຕະການຄວບຄຸມການນໍາເຂົ້າຜະລິດ ຈໍາໜ່າຍຜະລິດຕະພັນຢາສູບ ແລະຜະລິດຕະພັນທີ່ຄ້າຍຄືຢາສູບຢູ່ ສປປ ລາວ ເພື່ອເປັນການກວດກາ ສະກັດກັ້ນການນໍາເຂົ້າ-ຈໍາໜ່າຍ ສິນຄ້າທີ່ບໍ່ມີຄຸນະພາບ ສິນຄ້າ ເສື່ອມຄຸນເສຍຄຸນໝົດອາຍຸທີ່ສົ່ງຜົນກະທົບໂດຍກົງຕໍ່ຊີວິດສຸຂະພາບຊັບສິນສິດຜົນປະໂຫຍດຂອງຜູ້ຊົມໃຊ້ ພໍ່ແມ່ປະຊາຊົນ ແລະສິ່ງແວວລ້ອມບັນດາສິນຄ້າປອມແປງ ລອກຮຽນແບບສິນຄ້າ ລະເມີດເຄື່ອງໝາຍການຄ້າເຊິ່ງຜິດຕໍ່ລະບຽບກົດໝາຍລະບຽບການວາງອອກ ເພື່ອເປັນການກະຕຸກຊຸກຍູ້ສົ່ງເສີມການລົງທືນພາຍໃນຕ່າງປະເທດທີ່ດໍາເນີນທຸລະກິດຖືກຕ້ອງ ມີການແຂ່ງຂັນຢ່າງເທົ່າທຽມ ແລະຮັບປະກັນໄດ້ການເກັບລາຍຮັບເຂົ້າງົບປະມານ.

ສິນຄ້າທີ່ນຳມາທຳລາຍຖິ້ມປະກອບມີ: ສິນຄ້າເສື່ອມຄຸນເສຍຄຸນໝົດອາຍຸປະເພດບໍລິໂພກ: ເຂົ້າໜົມລວມ 99 ກັບ ນົມຜົງ 23 ກ່ອງ ກາເຟ 60 ກັບ ນົມຂຸ້ນຫວານ 10 ກັບ ນໍ້າອັດລົມ 13 ແກັດ ສິນຄ້ານໍາເຂົ້າ-ຈໍາໜ່າຍບໍ່ຜ່ານ ອ.ຢ ສະບູລວມ 327 ແພັກ ຄຣີມ ທາຜິວລວມ 418 ກັບ ສິນຄ້າ ປະເພດຢາສູບນອກລະບົບ 863 ຊອງ ຢາສູບໄຟຟ້າ 51 ອັນ ສິນຄ້ານໍາເຂົ້າ-ຈໍາໜ່າຍບໍ່ໄດ້ຮັບອະນຸຍາດ: ຈານດາວທຽມ+ອຸປະກອນ 602 ຊຸດສິນຄ້າປອມແປງລອກຮຽນແບບນໍ້າມັນເຄື່ອງ+ນໍ້າມັນເກຍກາຊ້າງ 181 ຕຸກ ອຸປະກອນອາໄຫຼ່ຄູໂບຕ້າ 56 ລາຍການ ແລະສິນຄ້າລະເມີດ ເຄື່ອງໝາຍການຄ້າອາໄຫຼ່ຄູໂບຕ້າອີກຈຳນວນ 17 ລາຍການ.

ສຳລັບການທຳລາຍສິນຄ້າເສື່ອມຄຸນເສຍຄຸນໝົດອາຍຸສິນຄ້າລອກຮຽນແບບ ແລະສິນຄ້າລະເມີດເຄື່ອງໝາຍການຄ້າ (ຍີ່ຫໍ້ຄູໂບຕ້າ) ທີ່ຜິດຕໍ່ລະບຽບກົດຄັ້ງນີ້ຈະໄດ້ຈັດປະເພດການທໍາລາຍບາງສ່ວນຈະໃຊ້ວິທີເອົາດິນກົບຝັງບາງສ່ວນກໍຈະໃຊ້ວິທີຈູດບາງສ່ວນຈະເອົາໄປໝູນໃຊ້ຄືນ (ນໍ້າມັນເຄື່ອງກະຕຸກຢາງເພື່ອຫຼຸດຜ່ອນການທໍາລາຍສິ່ງແວວລ້ອມ) ແລະບາງສ່ວນທີ່ຍັງໃຊ້ໄດ້ຈະເອົາໄປປະກອບສ່ວນໃຫ້ບັນດາໂຮງຮຽນການຊ່າງຂອງແຂວງເພື່ອເປັນອຸປະກອນໃນການຮຽນ-ການສອນຕົວຈິງ ຂອງນັກຮຽນນັກສຶກສາຕື່ມອີກ.

แชร์