ຫົວໜ້າສາຂາທະນາຄານແຫ່ງ ສປປ ລາວ ພາກໃຕ້ ແຂວງຈຳປາສັກ (ທຫລ.ຈສ) ທ່ານ ນວນຕາ ແກ້ວມະນີ ໃຫ້ສຳພາດພິເສດ ຕໍ່ຜູ້ສື່ຂ່າວ ວ່າ: ທຫລ.ຈສ ມີພາລະບົດບາດໃນການຄຸ້ມຄອງມະຫາພາກທາງດ້ານເງິນຕາ-ສິນເຊື່ອ ແລະ ການຊຳລະສະສາງຢູ່ 4 ແຂວງພາກໃຕ້ມີ: ແຂວງຈຳປາສັກ, ສາລະວັນ, ເຊກອງ ແລະ ແຂວງອັດຕະປື; ຜ່ານການຈັດຕັ້ງປະຕິບັດ ໃນປີ 2022 ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນ ໄດ້ສຸມໃສ່ຄຸ້ມຄອງ ແລະ ແກ້ໄຂຮ້ານແລກປ່ຽນເງິນຕາໂດຍພາຍຫຼັງທີ່ ທຫລ ໄດ້ປັບປຸງກົນໄກການຄຸ້ມຄອງທຸລະກິດແລກປ່ຽນເງິນຕາ ແລະ ໄດ້ໂຈະການອອກໜັງສືອະນຸຍາດດຳເນີນທຸລະກິດແລກປ່ຽນເງິນຕາ ໃນເດືອນມິຖຸນາ 2021 ແລະ ໄດ້ອອກແຈ້ງການເລກທີ 758/ກນງ, ລົງວັນທີ 12 ກໍລະກົດ 2021 ແລະ ເລກທີ 111/ທຫລ, ລົງວັນທີ 12 ສິງຫາ 2021 ເພື່ອຫັນຮ້ານແລກປ່ຽນເງິນຕາ ໄປເປັນຮ້ານຕົວແທນຂອງທະນາຄານທຸລະກິດໃນການດໍາເນີນທຸລະກິດແລກປ່ຽນເງິນຕາ ສົ່ງຜົນເຮັດໃຫ້ 4 ແຂວງພາກໃຕ້ມີຮ້ານແລກປ່ຽນ ທີ່ສຳເລັດການເຊັນສັນຍາພຽງແຕ່ 35 ຮ້ານ (ຈໍາປາສັກ 26 ຮ້ານ, ສາລະວັນ 6, ເຊກອງ 2 ແລະ ອັດຕະປື 1 ຮ້ານ) ຈາກ 48 ຮ້ານ ແລະ ສ່ວນທີ່ເຫຼືອ 13 ຮ້ານ (ຈໍາປາສັກ 10, ສາລະວັນ 1, ເຊກອງ 1 ແລະ ອັດຕະປື 1) ບໍ່ສາມາດເຊັນສັນຍາເປັນຕົວແທນທະນາຄານທຸລະກິດໄດ້ທັນຕາມແຈ້ງການຂອງ ທຫລ ; ສະນັ້ນ, ທຫລ.ຈສ ໄດ້ປະສານສົມທົບກັບເຈົ້າໜ້າທີ່ ແລະ ປສກ ທ້ອງຖິ່ນ ດຳເນີນການຖອນໃບອະນຸຍາດທຸລະກິດແລກປ່ຽນເງິນຕາຂອງຮ້ານແລກປ່ຽນ ທັງໝົດ 13 ຮ້ານ ແລະ ປິດຮ້ານແລກປ່ຽນຕ່າງໆ ທີ່ບໍ່ໄດ້ຮັບອະນຸຍາດ.
ນອກຈາກນັ້ນ, ທຫລ.ຈສ ໄດ້ແຈ້ງໃຫ້ທະນາຄານທຸລະກິດຕ້ອງເປັນເຈົ້າການຕິດຕາມກວດກາການເຄື່ອນໄຫວຂອງຮ້ານແລກປ່ຽນເງິນຕາຕົວແທນຂອງຕົນຢ່າງເຂັ້ມງວດ, ການຈຳກັດຂອບເຂດການເຄື່ອນໄຫວຂອງຮ້ານແລກປ່ຽນເງິນຕາຕົວແທນ ແລະ ໃຫ້ບັນດາທະນາຄານທຸລະກິດ ປະເມີນການປະຕິບັດສັນຍາຂອງຮ້ານແລກປ່ຽນເງິນຕາຕົວແທນ ພ້ອມທັງໃຫ້ຈັດປະເພດບັນດາຮ້ານແລກປ່ຽນດັ່ງ ກ່າວ ຊຶ່ງຜ່ານການສັງລວມລາຍງານຂອງທະນາຄານທຸລະກິດ ເຫັນໄດ້ວ່າ: ຮ້ານແລກປ່ຽນເງິນຕາຕົວແທນຈໍານວນ 35 ຮ້ານ ໃນນັ້ນ, ຖືກຈັດໃນປະເພດ B ຈຳນວນ 30 ຮ້ານ ແລະປະເພດ C ຈໍານວນ 5 ຮ້ານ ຊຶ່ງຮ້ານທີ່ຖືກຈັດປະເພດ C ໄດ້ຖືກຖອນໃບອະນຸຍາດດຳເນີນທຸລະກິດແລກປ່ຽນເງິນຕາຕາມການຄົ້ນຄວ້າຂອງ ທຫລ.
ມາຮອດທ້າຍເດືອນ ຕຸລາ 2022 ເພື່ອແກ້ໄຂບັນຫາກ່ຽວກັບການເຄື່ອນໄຫວບໍລິການແລກປ່ຽນເງິນຕາທີ່ບໍ່ສອດຄ່ອງກັບລະບຽບກົດໝາຍແນໃສ່ຫັນເອົາການບໍລິການແລກປ່ຽນເງິນຕາ ເຂົ້າສູ່ລະບົບທະນາຄານ; ທຫລ.ຈສ ໄດ້ປະຕິບັດຕາມແຈ້ງການ ເລກທີ 1778/ກນງ ໃນການດຳເນີນການຖອນໃບອະນຸຍາດ ແລະປິດຮ້ານແລກປ່ຽນເງິນຕາ ທີ່ບໍ່ຄົບເງື່ອນໄຂ ບໍ່ໄດ້ຕໍ່ສັນຍາເປັນຕົວແທນກັບທະນາຄານທຸລະກິດໃນປີ 2022, ເຊິ່ງໄດ້ສຳເລັດການອອກແຈ້ງການເຖິງບັນດາຮ້ານແລກປ່ຽນຮັບຊາບ ແລະ ຢຸດຕິການດຳເນີນທຸລະກິດແລກປ່ຽນເງິນຕາ, ພ້ອມທັງ ແຈ້ງເຖິງອຳນາດການປົກຄອງ, ປະສານສົມທົບກັບເຈົ້າໜ້າທີ່ ປກສ ແຕ່ລະທ້ອງຖິ່ນລົງລຸລ່ວງບັນດາຮ້ານແລກປ່ຽນດັ່ງກ່າວ, ມາຮອດປະຈຸບັນ ຮ້ານແລກປ່ຽນເງິນຕາຕົວແທນທະນາຄານທຸລະກິດ ທີ່ໄດ້ຮັບອະນຸຍາດຈາກ ທຫລ ມີພຽງ 8 ຮ້ານ (ຕັ້ງຢູ່ແຂວງຈຳປາສັກທັງໝົດ)ຈາກຈຳນວນ 30 ຮ້ານ ແລະ ທຫລ.ຈສ ໄດ້ສືບຕໍ່ຕິດຕາມກວດກາຢ່າງໃກ້ຊິດຮ້ານແລກປ່ຽນເງິນຕາຕົວແທນຂອງທະນາຄານທຸລະກິດດັ່ງກ່າວເພື່ອຮັບປະກັນການປະຕິບັດຂໍ້ຕົກລົງວ່າດ້ວຍການກຳນົດອັດຕາແລກປ່ຽນ ເລກທີ 779/ທຫລ ທີ່ກຳນົດໃຫ້ຮ້ານແລກປ່ຽນຕ້ອງກຳນົດອັດຕາຊື້ເງິນໂດລາຂອງຕົນພາຍໃນຂອບ ±3% ທຽບກັບອັດຕາແລກປ່ຽນອ້າງອີງຂອງ ທຫລ ແລະ ກຳນົດອັດຕາຊື້ເງິນຕາຕ່າງປະເທດສະກຸນອື່ນໆ ບໍ່ເກີນຂອບອັດຕາແລກປ່ຽນຂອງທະນາຄານທຸລະກິດທີ່ຕົນຂຶ້ນກັບ ພ້ອມນັ້ນຮ້ານແລກປ່ຽນຕົວແທນບໍ່ໄດ້ຮັບອະນຸຍາດໃຫ້ຂາຍເງິນຕາຕ່າງປະເທດ.
ທ່ານຫົວໜ້າສາຂາ ທຫລ.ຈສ ໄດ້ໃຫ້ຮູ້ຕື່ມອີກວ່າຜ່ານມາ ທຫລ.ຈສ ໄດ້ເອົາໃຈໃສ່ຊຸກຍູ້ ແລະນຳພາສາຂາທະນາຄານທຸລະກິດໃນການຈຳໜ່າຍພັນທະບັດ ທຫລ ຕາມແຈ້ງການ ເລກທີ 200/ຫກ, ລົງວັນທີ 13 ມິຖຸນາ 2022 ກ່ຽວກັບການອອກຈຳໜ່າຍພັນທະບັດ ທຫລ ເລີ່ມແຕ່ວັນທີ 15 ມິຖຸນາ 2022 ເປັນຕົ້ນມາໃນງວດທີ 1 ມູນຄ່າ 5.000 ຕື້ກີບ ຜ່ານ 9 ທະນາຄານທຸລະກິດຕົວແທນ, ຊຶ່ງ ທຫລ.ຈສ ໄດ້ຕິດຕາມ ແລະ ສັງລວມລາຍງານສະພາບການຈຳໜ່າຍພັນທະບັດຂອງສາຂາທະນາຄານທຸລະກິດຢູ່ 4 ແຂວງພາກໃຕ້ໃຫ້ ທຫລ ສຳນັກງານໃຫຍ່ເປັນແຕ່ລະວັນ, ມາຮອດວັນທີ 15 ພະຈິກ 2022 ເຊິ່ງເປັນມື້ປິດການຈຳໜ່າຍທົ່ວປະເທດສະເພາະສາຂາທະນາຄານທຸລະກິດ 4 ແຂວງພາກໃຕ້ ມູນຄ່າການຈຳໜ່າຍມີທັງໝົດ 572,19 ຕື້ກີບ (ກວມ 12,44% ຂອງຍອດການຈຳໜ່າຍພັນທະບັດທັງໝົດທົ່ວປະເທດ) ໃນນີ້ ອັນດັບ ❶ ແມ່ນ ແຂວງຈຳປາສັກ ກວມ 60% ຂອງຍອດຂາຍໃນ 4 ແຂວງພາກໃຕ້, ຮອງມາແມ່ນແຂວງອັດຕະປື ກວມ 17%, ❸ ສາລະວັນ ກວມ 12% ແລະ ❹ ແຂວງເຊກອງ ກວມ 11% ແລະເຊິ່ງທະນາຄານທີ່ຂາຍພັນທະບັດໄດ້ຫຼາຍກວ່າໝູ່ແມ່ນທະນາຄານການຄ້າຕ່າງປະເທດລາວມະຫາຊົນກວມເອົາ 38% ຂອງຍອດຂາຍທັງໝົດໃນ 4 ແຂວງພາກໃຕ້.
ຂ່າວ-ພາບ: ຣັດສະໝີ ດວງສັດຈະ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |