ເອດີຍີ ຄາດເສດຖະກິດລາວປີນີ້ຈະຂະຫຍາຍຕົວ 6,5%

  ທະນາຄານພັດທະນາອາຊີຄາດຄະເນວ່າອັດຕາການຂະຫຍາຍຂອງເສດຖະກິດລາວໃນປີນີ້ ແລະປີໜ້າຍັງຄົງຈະສືບຕໍ່ຂະຫຍາຍຕົວຢ່າງແຂງແຮງລະດັບ 6,5% ຍ້ອນການຟື້ນຕົວຂອງການຜະລິດກະສິກຳ ແລະ ການເຕີບໂຕໃນຂະແໜງພະລັງງານໄຟຟ້າບອກກັບກໍ່ສ້າງ ແລະ ບໍລິການທີ່ຕິດພັນກັບການທ່ອງທ່ຽວ.

  ທ່ານ ຢາຊູຊີ ເນກິຊິ ຜູ້ຕາງໜ້າສໍານັກງານ ເອດີບີ ປະຈໍາລາວກ່າວໃນກອງປະຊຸມເຜີຍແຜ່ບົດລາຍງານການຄາດຄະເນການພັດທະນາຂອງອາຊີປະຈໍາປີ 2019 ເມື່ອວັນທີ 3 ເມສາທີ່ນະຄອນຫຼວງວຽງຈັນວ່າ: ການຂະຫຍາຍໂຕຂອງເສດຖະກິດລາວຈະຍັງຄົງແຂງແຮງຍ້ອນມີການຟື້ນໂຕຂອງການຜະລິດກະສິກໍາພ້ອມທັງຂະຫຍາຍໂຕຢ່າງແຂງແຮງໃນການຜະລິດກະແສໄຟຟ້າ, ການກໍ່ສ້າງ ແລະການບໍລິການທີ່ຕິດພັນກັບການທ່ອງທ່ຽວ, ດັ່ງນັ້ນເພື່ອຮັກສາຄວາມມີສະຖຽງລະພາບທາງດ້ານເສດຖະກິດມະຫາພາກ ແລະບັນລຸການຈະເລີນເຕີບໂຕທີ່ທົ່ວເຖິງ ແລະ ຍືນຍົງລັດຖະບານຄວນຈະສືບຕໍ່ຫຼຸດຜ່ອນລະດັບໜີ້ສິນພາກລັດພ້ອມທັງປັບປຸງການຄຸ້ມຄອງການເງິນພາກລັດຂອງຕົນດ້ວຍການເພີ່ມການເກັບລາຍຮັບ ແລະການຄຸ້ມຄອງໜີ້ສິນໃຫ້ດີຂຶ້ນ ແລະຫຼຸດຜ່ອນການຂາດດຸນງົບປະມານໃນຊຸມປີຕໍ່ໜ້າ.

  ທັງນີ້ຄາດຄະເນອັດຕາການຂະຫຍາຍຕົວຂອງເສດຖະກິດລາວຈະຍັງຄົງຢູ່ໃນລະດັບ 6,5% ສໍາລັບປີ 2019 ແລະ 2020 ຊຶ່ງການຂະຫຍາຍຕົວຂອງຂະ ແໜງອຸດສາຫະກໍາ  ແລະການຄ້າ ແມ່ນຄາດວ່າຈະສູງຂຶ້ນເລັກນ້ອຍຈາກ 8% ໃນປີ 2018 ມາເປັນ 8,1% ໃນປີ 2019 ສາເຫດຍ້ອນການສືບຕໍ່ພັດທະ ນາພື້ນຖານໂຄງລ່າງພ້ອມທັງການຜະລິດກະແສໄຟຟ້າທີ່ເພີ່ມຂຶ້ນ, ສ່ວນກະສິກໍາຄາດວ່າຈະຂະຫຍາຍໂຕໃນອັດຕາ 2,5% ແລະ ການບໍລິການໃນອັດຕາ 6,7%; ຂະນະທີ່ອັດຕາການຂະຫຍາຍໂຕເສດຖະກິດພາກພື້ນຈະອ່ອນລົງທີ່ 5,7% ໃນປີ 2019 ແລະ 5,6% ໃນປີ 2020. 

ສໍາລັບອັດຕາເງິນເຟີ້ຄາດວ່າຈະຢູ່ໃນລະດັບ 2% ສໍາລັບປີ 2019-2020 ສາເຫດແມ່ນຍ້ອນລາຄານໍ້າມັນໃນຕະຫຼາດໂລກຄາດວ່າຈະຫຼຸດລົງກວ່າປີ 2018 ຂະນະທີ່ລາຄາອາຫານຄາດວ່າຈະບໍ່ມີການເໜັງຕີງເນື່ອງຈາກມີການຟື້ນໂຕຂອງຂະແໜງກະສິກໍາ. ສ່ວນການຂາດດຸນບັນຊີເດີນສະພັດຄາດວ່າຈະເພີ່ມຂຶ້ນ ໃນອັດຕາ 9,5% ຂອງຈີດີພີ ປີ 2019 ແລະ 10% ໃນປີ 2020, ການສົ່ງອອກ ກະແສໄຟຟ້າຈະເພີ່ມຂຶ້ນເນື່ອງຈາກການເພີ່ມກໍາລັງການຜະລິດ ຊຶ່ງຈະຊ່ວຍເຮັດໃຫ້ມູນຄ່າການສົ່ງອອກຂອງປະເທດທີ່ເປັນສະກຸນເງິນໂດລາ ເພີ່ມຂຶ້ນເປັນ 12% ໃນປີ 2019-2020 ແລະ ການນໍາເຂົ້າຈະເພີ່ມຂຶ້ນໃນອັດຕາ 13,5% ແລະຈະຫຼຸດລົງ 15% ໃນປີ 2020 ເພື່ອຈະສະໜັບສະໜູນເຂົ້າໃນບັນດາໂຄງ ການກໍ່ສ້າງເຂື່ອນໄຟຟ້າ, ທາງດ່ວນ ແລະທາງລົດໄຟ. ສະເພາະຄັງສໍາຮອງ ທີ່ເປັນເງິນຕາຕ່າງປະເທດຄາດວ່າຈະຫຼຸດລົງຕໍ່າກວ່າ 1 ຕື້ໂດລາ ພາຍໃນປີ 2019 ຊຶ່ງສາມາດກຸ້ມການນໍາເຂົ້າໄດ້ ປະມານ 1,3 ເດືອນ.

  ສ່ວນອັດຕາການຂະຫຍາຍໂຕເສດຖະກິດພາກພື້ນຄາດວ່າຈະອ່ອນລົງຢູ່ທີ່ 5,7% ໃນປີ 2019 ແລະ 5,6% ໃນປີ 2020 ຊຶ່ງອັດຕາການຂະຫຍາຍໂຕ ເສດຖະກິດຂອງປະເທດທີ່ກໍາລັງພັດທະນາໃນພາກພື້ນອາຊີ ໃນປີ 2018 ແມ່ນ 5,9% ໂດຍບໍ່ລວມເອົາບັນດາປະເທດເສດຖະກິດອຸດສາຫະກໍາໃໝ່ເຊັ່ນ: ຈີນ, ສເກົາຫຼີ, ສິງກະໂປ ແລະໄທເປ. ສ່ວນສະຫະລັດອາເມລິກາ, ສະຫະພາບເອີຣົບ ແລະຍີ່ປຸ່ນ ສໍາລັບປີນີ້ຄາດວ່າຈະຢູ່ໃນລະດັບ 1,9% ແລະ1 ,6% ໃນປີ 2020 ສາເຫດຍ້ອນເງື່ອນໄຂທາງດ້ານງົບປະມານ ແລະການເງິນທີ່ຮັດກຸມຂຶ້ນໃນສະຫະລັດອາເມລິການ ແລະຂໍ້ຂັດແຍ່ງທາງດ້ານການຄ້າລະຫວ່າງອາເມ ລິກາ ແລະຈີນ.

ຂ່າວ: ກິ່ງລັດຕະນະ 

 

แชร์