ວາງສະແດງເອກະສານປະຫວັດສາດ-ແນະນຳປຶ້ມ "ສາຍພົວພັນແບບພິເສດ ລາວ-ຫວຽດນາມ”

ກົມເອກະສານແຫ່ງຊາດລາວ ກະຊວງພາຍໃນ ແຫ່ງ ສປປ ລາວ ແລະກົມເອກະສານ ແລະສຳເນົາແຫ່ງລັດກະຊວງພາຍໃນ ສສ ຫວຽດນາມ ໄດ້ຈັດງານວາງສະແດງເອກະສານປະຫວັດສາດ ແລະແນະນຳປຶ້ມ "ສາຍພົວພັນຮ່ວມມືແບບພິເສດລາວ-ຫວຽດນາມ" ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຂຶ້ນໃນວັນທີ 23 ພະຈິກ 2022 ທີ່ກະຊວງພາຍໃນ, ໃຫ້ກຽດເຂົ້າຮ່ວມໂດຍທ່ານ ທອງຈັນ ມະນີໄຊ ກຳມະການສູນກາງພັກ ເຂລາຄະນະພັກ ລັດຖະມົນຕີກະຊວງພາຍໃນ, ທ່ານ ເລ ຍໍແທັງ ທີ່ປຶກສາທູດ ຮອງເລຂາພັກສະຖານທູດ ສສ ຫວຽດນາມປະຈໍາ ສປປ ລາວ, ມີບັນດາການນຳກະຊວງພາຍໃນ, ຄະນະຜູ້ແທນກົມເອກະສານ ແລະ ສຳເນົາແຫ່ງລັດ ສສ ຫວຽດນາມ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ທອງຈັນ ມະນີໄຊ ກ່າວວ່າ: ຕະຫຼອດໄລຍະ 60 ປີແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ແລະ 45 ປີ ແຫ່ງການປະຕິບັດສົນທິສັນຍາມິດຕະພາບ ແລະການຮ່ວມມືຮອບດ້ານລະຫວ່າງ ລາວ-ຫວຽດນາມ, ສອງຊາດ ລາວ-ຫວຽດນາມ ໄດ້ພ້ອມກັນເພີ່ມພູນຄູນສ້າງມິດຕະພາບແບບພິເສດ, ການຮ່ວມມືຮອບດ້ານນຳກັນຢ່າງບໍ່ຢຸດຢັ້ງທັງທາງກວ້າງ ແລະທາງເລິກ, ທັງລະດັບສູນກາງ ແລະທ້ອງຖິ່ນຊຶ່ງໄດ້ເປັນປັດໄຈສຳຄັນຕັດສິນອັນໜຶ່ງຕໍ່ຜົນສຳເລັດ ແລະ ໄຊຊະນະຂອງພາລະກິດປ່ຽນແປງໃໝ່ຢູ່ໃນສອງປະເທດ ສາມາດຕອບສະ ໜອງຜົນປະໂຫຍດຂອງປະຊາຊົນສອງຊາດໄດ້ເປັນຢ່າງດີ. ດັ່ງນັ້ນ, ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ເຂົ້າສູ່ລວງເລິກ, ສູ້ຊົນເຮັດໃຫ້ການພົວພັນຮ່ວມມືດ້ານການເມືອງ, ວັດທະນະທຳ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບໃຫ້ມີຄວາມໝັ້ນຄົງ, ພວກເຮົາຕ້ອງເພີ່ມທະວີການໂຄສະນາສຶກສາອົບຮົມໃຫ້ພະນັກງານ-ລັດຖະກອນ ແລະປະຊາຊົນບັນດາເຜົ່າ ເປັນຕົ້ນແມ່ນຄົນຮຸ່ນໃໝ່ໃຫ້ມີຄວາມຮັບຮູ້, ເຂົ້າໃຈກ່ຽວກັບມູນເຊື້ອຄວາມສາມັກຄີແບບພິເສດ ການຮ່ວມມືຮອບດ້ານ ລະຫວ່າງ ສປປ ລາວ - ສສ ຫວຽດນາມ ແລະ ສືບຕໍ່ປົກປັກຮັກສາສາຍພົວພັນ ແລະ ຄວາມສາມັກຄີພິເສດນີ້ໄວ້ໃຫ້ໝັ້ນຄົງດັ່ງຄໍາເວົ້າຂອງທ່ານ ປະທານ ໄກສອນ ພົມວິຫານ ວ່າ: “ເຖິງວ່າພູຈະຖືກເຊາະເຈື່ອນ, ແມ່ນໍ້າລໍາເຊຈະເຫືອດແຫ້ງ, ແຕ່ສາຍພົວພັນມິດຕະພາບລາວ-ຫວຽດນາມ ຈະໝັ້ນຄົງຂະໜົງແກ່ນຊົ່ວກາລະນານ” ແລະ ໃນບົດກະວີທີ່ມີຊື່ສຽງຂອງ ປະທານ ໂຮ່ຈິມິນ ເພີ່ນວ່າ “ຮັກຫອມກັນໝາຍໝັ້ນຫຼາຍສັນພູກໍປີນໄຕ່, ຫຼາຍນໍ້າໃຫຍ່ ແລະໂຄກຄ້ອຍ ຂວາງກັ້ນກໍດຸ່ງໄປ, ສອງຊາດຫວຽດ-ລາວໄດ້ ຝັງຄວາມຮັກຢູ່ໃນໃຈ, ຮົ່ງຮາທັງແມ່ຂອງບໍ່ເລິກປຸນປານໄດ້”.

ເອກະສານປະຫວັດສາດ ທີ່ນຳມາເປີດໂຕ ແລະ ວາງສະແດງໃນຄັ້ງນີ້ ມີທັງໝົດ 266 ສະບັບ, ຮູບພາບ 60 ແຜ່ນ, ປຶ້ມ 132 ຫົວ ໂດຍແບ່ງອອກເປັນ 2 ໄລຍະຄື: ເອກະສານປະຫວັດສາດ ແລະ ຮູບພາບກ່ຽວກັບການຮ່ວມສຳພັນສູ້ຮົບ ແລະສາຍພົວພັນການທູດລາວ-ຫວຽດນາມ, ຫວຽດນາມ-ລາວ ແຕ່ປີ 1950-1975; ເອກະສານປະຫວັດສາດ ແລະ ຮູບພາບກ່ຽວກັບການເພີ່ມທະວີຄວາມສາມັກຄີ ແລະ ການຮ່ວມມື ໃນພາລະກິດປົກປັກຮັກສາ ແລະສ້າງສາປະເທດຊາດ, ການຮ່ວມມືພິເສດ ແລະ ຮອບດ້ານ ລະຫວ່າງລາວ-ຫວຽດນາມ, ຫວຽດນາມ-ລາວ ປີ 1976 ເຖິງປັດຈຸບັນ.
ຂ່າວ: ກະຊວງພາຍໃນ, ພາບ: ແສງຈັນ

แชร์