ເຊກອງ​ ປຸກລະດົມ-ຂົນຂວາຍ ທຸກກໍາລັງແຮງ ເພື່ອແກ້ໄຂຄວາມທຸກຍາກຢູ່ບັນດາຈຸດສຸມ ແລະ ເຂດພູດອຍຊົນເຜົ່າ ຂອງແຂວງ

ປະຊາຊົນແຂວງເຊກອງ ສ່ວນໃຫຍ່ແມ່ນດໍາລົງຊີວິດຢູ່ເຂດຊົນນະບົດ, ພູດອຍ, ພື້ນຖານໂຄງລ່າງທາງດ້ານເສດຖະກິດ, ວັດທະນາທໍາ-ສັງຄົມ ຍັງມີຄວາມຫຍຸ້ງຍາກ, ການເຂົ້າເຖິງລະບົບຂໍ້ມູນຂ່າວສານໂດຍສະເພາະຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຂອງປະຊາຊົນບາງບ່ອນ, ບາງເຂດຍັງມີຈໍາກັດ ເຮັດໃຫ້ສະພາບແນວຄິດ ແລະ ການດໍາລົງຊີວິດຍັງຄອງເດີມ, ການຫັນປ່ຽນຊ້າ ແລະ ບາງເຂດໜັກໄປທາງການເຊື່ອຖືແບບງົບງວາຍ ຊຶ່ງເປັນອຸປະສັກຕໍ່ການພັດທະນາ, ກໍຄືການແກ້ໄຂຄວາມທຸກຍາກ.

ໃນໄລຍະຜ່ານມາ ພາຍໃຕ້ການນໍາພາ-ຊີ້ນໍາຢ່າງໃກ້ຊິດຈາກສູນກາງພັກ ແລະ ຄວາມເປັນເຈົ້າການຂອງຄະນະພັກແຕ່ລະຂັ້ນພາຍໃນແຂວງ; ໄດ້ເອົາໃຈໃສ່ສຶກສາອົບຮົມທາງດ້ານການເມືອງແນວຄິດໃຫ້ແກ່ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າດ້ວຍຫຼາຍຮູບການ, ຫຼາຍວິທີການ ແລະ ຖືເອົາວຽກງານການເມືອງ-ແນວຄິດເປັນກົກ ເປັນຕົ້ນ: ໃນປີ 2022 ນີ້ ແຂວງໄດ້ຫັນພະນັກງານຫຼັກແຫຼ່ງ​ຂອງພະແນກການພາຍໃນແຂວງ, ເມືອງລົງກໍ່ສ້າງຮາກຖານການເມືອງ ນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໄປເຜີຍແຜ່ເຊື່ອມຊຶມ, ໂດຍສະເພາະມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງເຊກອງ ແລະ ມະຕິກອງປະຊຸມໃຫຍ່ຂອງຄະນະພັກແຕ່ລະຂັ້ນໃຫ້ແຕ່ລະເປົ້າໝາຍຮັບຮູ້ເຂົ້າໃຈ, ປຸກລະດົມຂົນຂວາຍ ແລະ ນໍາພາປະຊາຊົນເຮັດຕົວຈິງ, ໄປພ້ອມກັບການເກັບກໍາຂໍ້ມູນຮອບດ້ານ, ວິເຄາະ-ວິໄຈຂໍ້ມູນ ແລະ ຫາງສຽງສັງຄົມ ເພື່ອຊອກໃຫ້ເຫັນທັນບັນຫາ ແນໃສ່ແກ້ໄຂ ແລະ ຊອກຫາທາງອອກໃຫ້ຖືກທິດ ແລະ ຖືກຈຸດ, ໃນນັ້ນໄດ້ເອົາໃຈໃສ່ແກ້ໄຂສະພາບແນວຄິດຂອງປະຊາຊົນເປັນຕົ້ນແນວຄິດລໍຄອຍ, ເອື່ອຍອີງ ແລະ ອື່ນໆທີ່ເປັນສິ່ງກີດຂວາງໃນການພັດທະນາ ຕິດພັນກັບການປຸກລະດົມຂົນຂວາຍໃຫ້ເຂົາເຈົ້າມີສ່ວນຮ່ວມແຕ່ຫົວທີ ໂດຍເລີ່ມຈາກການວາງແຜນຕະຫຼອດຮອດການຈັດຕັ້ງປະຕິບັດ ແລະ ການສະຫຼຸບປະເມີນຜົນຊຶ່ງຕິດພັນກັບການພັດທະນາພື້ນຖານໂຄງລ່າງທາງດ້ານເສດຖະກິດ, ວັດທະນະທໍາ-ສັງຄົມ ທີ່ມີການລົງທຶນຈາກພາກລັດ, ພ້ອມທັງດຶງດູດ ແລະ ສົ່ງເສີ່ມການລົງທຶນຂອງພາກເອກະຊົນ ແລະ ຊຸກຍູ້ປຸກລະດົມປະຊາຊົນມີສ່ວນຮ່ວມຢ່າງຕັ້ງໜ້າ. ອັນພົ້ນເດັ່ນແຂວງເຊກອງໄດ້ເອົາໃຈໃສ່ເປັນພິເສດໃນການສົ່ງເສີມຍາດແຍ່ງການລົງທຶນຂອງເອກະຊົນພາຍໃນ ແລະ ຕ່າງປະເທດໄດ້ຫຼາຍໂຄງການ ຕາມເງື່ອນໄຂ ແລະ ທ່າແຮງບົ່ມຊ້ອນຕົວຈິງຂອງທ້ອງຖິ່ນ ໂດຍສະເພາະໃນຂົງເຂດພະລັງງານໄຟຟ້າ, ຂົງເຂດບໍ່ແຮ່, ຂົງເຂດກະສິກຳ ແລະ ປ່າໄມ້ມີຫຼາຍໂຄງການເກີດຂຶ້ນ ແລະ ພວມຈັດຕັ້ງປະຕິບັດ ຊຶ່ງໂຄງການດັ່ງກ່າວແມ່ນຕິດພັນກັບຜົນປະໂຫຍດໂດຍກົງ ແລະ ທາງອ້ອມຂອງປະຊາຊົນບ່ອນທີ່ມີໂຄງການຕັ້ງຢູ່, ໝາຍຄວາມວ່າ: (1) ນອກຈາກນໍາເອົາແນວທາງ, ມະຕິຄໍາສັ່ງໄປເຜີຍແຜ່ເຊື່ອມຊຶມແລ້ວ, ຄະນະພັກແຕ່ລະຂັ້ນຍັງຖືເອົາການພັດທະນາ ແລະ ຍົກລະດັບຊີວິດການເປັນຢູ່ທາງດ້ານຕ່າງໆຈາກໂຄງການລົງທຶນຂະໜາດກາງ, ຂະໜາດໃຫຍ່ໃຫ້ການຊ່ວຍເຫຼືອແກ່ປະຊາຊົນເຊັ່ນ: ຊ່ວຍເຫຼືອໃນການບຸກເບີກເນື້ອທີ່ດິນນາ,ເນື້ອທີ່ການຜະລິດ, ຊ່ວຍເຫຼືອກໍ່ສ້າງໂຮງຮຽນ, ສຸກສາລາ, ຊົນລະປະທານ, ແນວພັນພືດ, ແນວພັນສັດ ທີ່ຕິດພັນກັບວິທີດໍາລົງຊີວິດຂອງປະຊາຊົນເຂດພູດອຍ. (2) ຊຸກຍູ້ສົ່ງເສີມປະຊາຊົນໃນການປູກ-ການລ້ຽງເພື່ອສະໜອງໃຫ້ໂຄງການ. (3) ຝຶກອົບຮົມດ້ານວິຊາການ ແລະ ອອກແຮງງານໃນໂຄງການຕາມຄວາມຮູ້-ຄວາມສາມາດຕົວຈິງຂອງປະຊາຊົນ ເພື່ອສ້າງວຽກເຮັດງານທໍາ ແລະ ສ້າງລາຍຮັບແກ່ປະຊາຊົນ ສາມາດຫຼຸດພົ້ນອອກຈາກຄວາມທຸກຍາກໂດຍພື້ນຖານ.

ທ່ານ ເຫຼັກໄຫລ ສີວິໄລ ກຳມະການສູນກາງພັກ ເລຂາພັກແຂວງ ເຈົ້າແຂວງເຊກອງ ກ່າວວ່າ: ຜ່ານການປຸກລະດົມ ແລະ ເສີມຂະຫຍາຍທ່າແຮງຂອງແຂວງ ໂດຍສະເພາະທ່າແຮງທາງຊົນນະບົດເຂດຫ່າງໄກສອກຫຼີກ, ລຽບຊາຍແດນເຮັດໃຫ້ຂອບເຂດດັ່ງກ່າວມີການພັດທະນາ ແລະ ສ້າງການຫັນປ່ຽນຫຼາຍດ້ານຢ່າງຕັ້ງໜ້າ ໂດຍສະເພາະແມ່ນ ສາມາດແກ້ໄຂສະພາບແນວຄິດລະແວງສົງໃສຕໍ່ການນໍາພາ-ຊີ້ນໍາຂອງພັກ ແລະ ສາມາດເສີມຂະຫຍາຍຄວາມສາມັກຄີ, ຄວາມຈົງຮັກພັກດີທີ່ເປັນມູນເຊື້ອຂອງປະຊາຊົນບັນດາເຜົ່າໄດ້ຮັບການເຊີດຊູ ແລະ ຍົກສູງຕື່ມອີກກ້າວໜຶ່ງ, ສ້າງການຫັນປ່ຽນ ແລະ ແກ້ໄຂສະພາບແນວຄິດຄອງເດີມ, ແນວຄິດເອື່ອຍອີງຄັບແຄບ ແລະ ການເຊື່ອຖືງົມງວາຍໃຫ້ຫຼຸດໜ້ອຍຖອຍລົງເທື່ອລະກ້າວ, ປະຊາຊົນມີສ່ວນຮ່ວມ ແລະ ໄດ້ຮັບຜົນປະໂຫຍດໂດຍກົງ ແລະ ທາງອ້ອມຈາກການພັດທະນາໂຄງການລົງທຶນຂອງລັດ ແລະ ເອກະຊົນ, ປະຊາຊົນມີຄວາມຕື່ນຕົວ, ມີຄວາມກະຕືລືລົ້ນໃນການພັດທະນາຕາມເງື່ອນໄຂ ແລະ ຄວາມສາມາດຕົວຈິງຂອງປະຊາຊົນໂດຍສະເພາະການຂຸດຄົ້ນນໍາໃຊ້ທ່າແຮງຂອງທ້ອງຖິ່ນໃຫ້ຫຼາຍຂຶ້ນ, ສາມາດປະກອບສ່ວນ ແລະ ເຂົ້າຮ່ວມໃນການສ້າງສາພັດທະນາເສດຖະກິດ,ວັດທະນະທໍາ-ສັງຄົມ, ພັດທະນາຄອບຄົວຕາມແນວທາງນະໂຍບາຍຂອງພັກ-ລັດ ເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າໃຫ້ໄດ້ຮັບການຍົກລະດັບດີຂຶ້ນຢ່າງຈະແຈ້ງສະແດງອອກຄື: ໃນ​ປີ 2016 ບ້ານ​ທຸກ​ຍາກ 61 ບ້ານກວມ​ເອົາ 30,50%, ມີ​ຄອບ​ຄົວ​ທຸກ​ຍາກຍັງ​ເຫຼືອ 2.412 ຄອບ​ຄົວ, ກວມ​ເອົາ 12% ແລະ ມາ​ຮອດປີ 2020 ບ້ານ​ທຸກ​ຍາກ​ຍັງ​ເຫຼືອ 39 ບ້ານ ຫຼຸດລົງ 22 ບ້ານ ກວມ​ເອົາ 19,9%; ຄອບ​ຄົວ​ທຸກ​ຍາກ​ຫຼຸດລົງ​ຍັງ​ເຫຼືອ 1.585 ຄອບ​ຄົວ ກວມ​ເອົາ 6,24%, ບ້ານ​ພັດ​ທະ​ນາ 74 ບ້ານກວມ​ເອົາ 37,56% ແລະ ຄອບ​ຄົວ​ພັດ​ທະ​ນາ 15.316 ຄອບ​ຄົວ ກວມ​ເອົາ 61,79% (ຂໍ້ມູນ​ຕາມ​ດຳ​ລັດ 309/ລບ), ຖ້າ​ທຽບ​ໃສ່​ດຳ​ລັດ 348/ນຍ ມີບ້ານທຸກ​ຍາກ 166 ບ້ານ ເທົ່າ​ກັບ 84,26%, ຄອບ​ຄົວ​ທຸກ​ຍາກ 11.889 ຄອບ​ຄົວ ເທົ່າ​ກັບ 49,67% ຂອງ​ຄອບ​ຄົວ​ທັງ​ໝົດ​ໃນ​ທົ່ວ​ແຂວງ.

ສັງ​ລວມ​ແລ້ວ; ວຽກ​ງານການເມືອງ-ແນວຄິດ​ ໂດຍ​ສະ​ເພາະ “ການປຸກລະດົມ-ຂົນຂວາຍປະຊາຊົນບັນດາເຜົ່າຂຸດຄົ້ນຄວາມອາດສາມາດ ແລະ ທ່າແຮງບົ່ມຊ້ອນພາຍໃນແຂວງ ເພື່ອແກ້ໄຂຄວາມທຸກຍາກຢູ່ບັນດາຈຸດສຸມຂອງແຂວງ ແລະ ເຂດພູດອຍຊົນເຜົ່າ” ​ຢູ່​ແຂວງ​ເຊກອງ​ໄດ້​ຮັບ​ການ​ຊີ້​ນຳ-ນຳ​ພາ ແລະ ຈັດ​ຕັ້ງ​ປະ​ຕິ​ບັດ​ຢ່າງ​ຕໍ່ເນື່ອງ.

ໂດຍ: ວັນໄຊ ຕະວິນຍານ

• 22/11/2022