ຫ້ອງວ່າ​ການ​ສູນ​ກາງ​ພັກ ລາວ-ຫວຽດນາມ ​ເພີ່ມ​ທະ​ວີ​ການ​ພົວ​ພັນ ​ຮ່ວມ​ມື​ສອງ​ຝ່າຍ

ພິທີພົບປະຢ່າງເປັນທາງການ ລະຫວ່າງ ຫ້ອງວ່າການສູນກາງພັກ ປະຊາຊົນປະຕິວັດລາວ ແລະ ຫ້ອງວ່າການສູນກາງພັກກອມ ມູນິດຫວຽດນາມ ໄດ້​ມີ​ຂຶ້ນ​ໃນ​ວັນ​ທີ 21 ພະ​ຈິກ​ 2022 ທີ່​ຫ້ອງວ່າ​ການ​ສູນ​ກາງ​ພັກ ປ​ປ ລາວ, ຝ່າຍ​ລາວ​ນຳ​ໂດຍ ສະຫາຍ ທອງສະລິດ ມັງໜໍ່ເມກ ຄະ​ນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ ປະຊາຊົນປະຕິວັດລາວ ພ້ອມດ້ວຍຄະນະ ແລະ ຝ່າຍ ຫວຽດ​ນາມ ນຳ​ໂດຍ ສະຫາຍ ເລ ມິງ ຮຶງ ເລຂາທິການສູນກາງພັກ ຫົວໜ້າຫ້ອງວ່າການສູນກາງພັກກອມມູນິດຫວຽດນາມ ພ້ອມດ້ວຍຄະນະ.

ການພົບປະຄັ້ງນີ້ ສະຫາຍ ທອງສະລິດ ມັງໜໍ່ເມກ ໄດ້​ສະ​ແດງຄວາມປີຕິຊົມຊື່ນເປັນຢ່າງຍິ່ງ ທີ່ໄດ້ຕ້ອນຮັບຄະນະຜູ້ແທນຈາກຫ້ອງວ່າການສູນກາງພັກກອມມູນິດຫວຽດນາມ ນຳໂດຍ ສະຫາຍ ເລ ມິງ ຮຶງ, ທີ່ໄດ້ເດີນທາງມາຢ້ຽມຢາມ ແລະ ພົບປະປຶກສາຫາລືວຽກງານ ສອງຫ້ອງວ່າການສູນກາງພັກ ລາວ-ຫວຽດນາມ ຢ່າງເປັນທາງການ, ອັນໄດ້ປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍຄື ປະຊາຊົນສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ແມ່ນການພົວພັນຮ່ວມມືຂອງສອງຫ້ອງວ່າການສູນກາງພັກ ລາວ-ຫວຽດນາມ ໃຫ້ນັບມື້ນັບມີຄວາມແໜ້ນແຟ້ນ, ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ. ໃນໂອກາດພົບປະກັນຄັ້ງນີ້, ທັງສອງຝ່າຍ ໄດ້ແຈ້ງສະພາບລວມຂອງປະເທດ, ສະພາບລວມຂອງການພັດທະນາເສດຖະກິດ-ສັງຄົມ, ການພົວພັນຮ່ວມມືຂອງສອງຫ້ອງວ່າການສູນກາງພັກ ລາວ- ຫວຽດນາມ ແລະ ສະພາບການເຄື່ອນໄຫວວຽກງານ ວິຊາສະເພາະ ຂອງສອງຫ້ອງວ່າການສູນກາງພັກໃຫ້ກັນຊາບ ຕະຫຼອດໄລຍະປີ 2022 ທີ່ຜ່ານມາ. ການພົບປະຄັ້ງນີ້ດຳເນີນໄປໃນທ່າມກາງ ​ທີ່ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ພວມຈັດຕັ້ງຜັນຂະຫຍາຍມະຕິ ຂອງກອງປະຊຸມໃຫຍ່ ຄັ້ງທີ 11 ຂອງພັກປະຊາຊົນປະຕິວັດລາວ ແລະ ມະຕິ ກອງປະຊຸມໃຫຍ່ ຄັ້ງທີ 13 ຂອງພັກກອມມູນິດຫວຽດນາມ ຢ່າງຕັ້ງໜ້າເພື່ອໃຫ້ບັນລຸຕາມຄາດໝາຍ ແລະ ພ້ອມກັນສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ຢ່າງເປັນຂະບວນຟົດຟື້ນ ໃນໂອກາດ ອັນມີຄວາມໝາຍສຳຄັນນີ້ ສອງຫ້ອງວ່າການສູນກາງພັກ ຍັງໄດ້ຈັດຕັ້ງໃຫ້ມີຫຼາຍກິດຈະກໍາ ເປັນຕົ້ນ: ພິທີຫວນຄືນມູນເຊື້ອປະຕິວັດຂອງສອງຊົນຊາດຊົນເຜົ່າ ແລະ ສາຍພົວພັນຄວາມສາມັກຄີພິເສດ ລາວ-ຫວຽດນາມ, ຫວຽດນາມ-ລາວ ໂດຍ ປະທານ ໂຮ່ຈິມິນ, ປະທານ ສຸພານຸວົງ ແລະ ປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຂອງພວກເຮົາ ໄດ້ນຳພາກໍ່ຕັ້ງຂຶ້ນ ແລະ ການພົບປະແລກປ່ຽນ ກິລາ-ສິລະປະ ຢູ່ແຂວງຄຳມ່ວນ ແຕ່ວັນທີ 21-25 ພະຈິກ 2022, ແລກປ່ຽນບົດຮຽນວິຊາການ, ຂຽນປຶ້ມຕ່າງໆ ຊຶ່ງຈະກາຍເປັນເຫດການທີ່ສຳຄັນ ທາງປະຫວັດສາດ ແຫ່ງການພົວພັນລະຫວ່າງ ສອງຫ້ອງວ່າການສູນກາງພັກ ພວກເຮົາ. ໃນໂອກາດນີ້, ທັງສອງຝ່າຍກໍໄດ້ຕີລາຄາ ແລະ ເປັນເອກະພາບສູງຕໍ່ການພົວພັນຮ່ວມມືລະຫວ່າງ ສອງຫ້ອງວ່າການສູນກາງພັກ ໃນຕະຫຼອດໄລຍະຜ່ານມາ ແລະ ພ້ອມກັນວາງທິດທາງການຮ່ວມມືໃນໄລຍະຕໍ່ໜ້າໃຫ້ໜັກແໜ້ນເຂັ້ມແຂງຍິ່ງຂຶ້ນ.

ພາຍຫຼັງສຳເລັດກອງປະຊຸມ ທັງສອງຝ່າຍ ເຫັນດີເປັນເອກະພາບກັນ ໃຫ້ບັນດາກົມກ່ຽວຂ້ອງຂອງສອງຫ້ອງວ່າການສູນກາງພັກ ສືບຕໍ່ຈັດຕັ້ງຜັນຂະຫຍາຍເນື້ອໃນຈິດໃຈຂອງການຕົກລົງຄັ້ງນີ້ເຂົ້າສູ່ວຽກງານຕົວຈິງ ຢ່າງເປັນເຈົ້າການ ແລະ ໃຫ້ມີປະສິດທິພາບ ແລະ ປະສິດທິຜົນ; ປະກອບສ່ວນເຮັດໃຫ້ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ກໍຄືເຮັດໃຫ້ສາຍພົວພັນຮ່ວມມືສອງຫ້ອງວ່າການສູນກາງພັກ ບັນລຸຜົນສຳເລັດຕາມລະດັບຄາດໝາຍທີ່ວາງໄວ້ ຢ່າງສະຫງ່າງາມ.

ພາຍຫຼັງສຳເລັດການພົບປະ, ສະຫາຍ ທອງສະລິດ ມັງໜໍ່ເມກ ແລະ ສະຫາຍ ເລ ມິງ ຮຶງ ກໍເຂົ້າຮ່ວມພິທີ ມອບ-ຮັບເຄື່ອງຊ່ວຍເຫຼືອຈຳນວນໜຶ່ງເປັນຕົ້ນແມ່ນເຄື່ອງຮັບໃຊ້ເຂົ້າໃນການປະຕິບັດວຽກງານຂອງຫ້ອງວ່າການສູນກາງພັກປະຊາຊົນປະຕິວັດລາວ.

ຂ່າວ: ຫ້ອງວ່າການສູນກາງພັກ, ພາບ: ສຸກສະຫວັນ

• 22/11/2022