ປະທານສະພາແຫ່ງຊາດລາວ ເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 43

ໃນວັນທີ 21 ພະຈິກ 2022 ທີ່ພະນົມເປັນ ຣາຊະອານາຈັກກໍາປູເຈຍ. ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື AIPA ຄັ້ງທີ 43. ໃນພິທີເປີດກອງປະຊຸມໃຫຍ່ໄອປາ ສົມເດັດ ວິບູນ ເສນາ ພັກດີ ຊາຍຊຸມ ປະທານສະພາສູງ ແຫ່ງ ຣາຊະອານາຈັກກຳປູເຈຍໄດ້ຂຶ້ນກ່າວຕ້ອນຮັບຄະນະຜູ້ແທນຢ່າງອົບອຸ່ນ ແລະສົມເດັດ ອັກຄະມະຫາ ໂປເຢຍ ຈັກກຣີ ເຮັງຊໍາຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ປະທານໄອປາ ຄັ້ງທີ 43 ໄດ້ກ່າວເປີດກອງປະຊຸມຢ່າງເປັນທາງການ. ພ້ອມດຽວກັນນັ້ນ, ກອງປະຊຸມຍັງໄດ້ຮັບກຽດເຂົ້າຮ່ວມ ແລະກ່າວປາໄສໃນພິທີເປີດໂດຍ ສົມເດັດ ອັກຄະມະຫາ ເສນາ ບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ.

ກອງປະຊຸມໄອປາ ຄັ້ງທີ 43 ນີ້, ແມ່ນຈະພ້ອມກັນສຸມໃສ່ ຄົ້ນຄວ້າປຶກສາຫາລື, ແລກປ່ຽນຄວາມຄິດຄວາມເຫັນ ພາຍໃຕ້ຫົວຂໍ້: “ການກ້າວໄປພ້ອມກັນເພື່ອອາຊຽນທີ່ຍືນຍົງ, ກວມລວມ ແລະ ເຂັ້ມແຂງ” ຊຶ່ງຈະໄດ້ດໍາເນີນໄປເປັນເວລາ 4 ວັນ, ລະຫວ່າງວັນທີ 21-24 ພະຈິກ 2022 ໂດຍມີຄະນະຜູ້ແທນທີ່ນຳໂດຍປະທານ ແລະ ຮອງປະທານລັດຖະສະພາຈາກບັນດາປະເທດອາຊຽນ 8 ປະເທດ, ພ້ອມດ້ວຍປະເທດສັງເກດການ ແລະແຂກຂອງປະເທດເຈົ້າພາບທີ່ເປັນຕົວແທນຈາກ ລັດຖະສະພາພາກພື້ນ ແລະສາກົນ ເຂົ້າຮ່ວມ 428 ທ່ານ.

ພາຍຫຼັງພິທີເປີດຢ່າງເປັນທາງການ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ, ບັນດາປະເທດສັງເກດການ ແລະ ແຂກຖືກເຊີນ ໄດ້ຜັດປ່ຽນກັນຂຶ້ນກ່າວປາໄສຕໍ່ກອງປະຊຸມຄົບຄະນະວາລະທີໜຶ່ງ ຕາມລຳດັບ. ໃນໂອກາດດັ່ງກ່າວ, ທ່ານ ໄຊສົມພອນ ພົມວິຫານ ກໍໄດ້ຂຶ້ນກ່າວປາໄສ ໂດຍທ່ານໄດ້ເນັ້ນເຖິງການຮ່ວມມື ເພື່ອສຸມໃສ່ຟື້ນຟູ ເສດຖະກິດ-ສັງຄົມ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະຈາກສິ່ງ ທ້າທາຍຕ່າງໆ ທີ່ພາກພື້ນອາຊຽນກຳລັງປະເຊີນຢູ່ ໂດຍສົ່ງເສີມການຮ່ວມມືດ້ານນິຕິບັນຍັດ ເພື່ອເອື້ອອຳນວຍໃຫ້ແກ່ການບັນລຸເປົ້າໝາຍຕ່າງໆຂອງການສ້າງປະຊາຄົມອາຊຽນໃຫ້ມີຄວາມເຂັ້ມແຂງ, ເປັນປຶກແຜ່ນ, ມີຄວາມເຂົ້າອົກເຂົ້າໃຈ ແລະ ການຮ່ວມມື ຢ່າງໃກ້ຊິດລະຫວ່າງ ລັດຖະສະພາສະມາ ຊິກໄອປາດ້ວຍກັນ ກໍຄືລະຫວ່າງໄອປາກັບອາຊຽນ ແລະ ລັດຖະສະພາຜູ້ສັງເກດການອື່ນໆ ເພື່ອພ້ອມ ກັນກ້າວໄປຂ້າງໜ້າ ແລະບໍ່ປະຖິ້ມຜູ້ໃດໄວ້ຂ້າງຫຼັງ.

ພ້ອມດ້ຽວກັນນັ້ນ, ທ່ານຍັງໄດ້ຍົກໃຫ້ເຫັນເຖິງຄວາມສຳຄັນຕໍ່ການຈັດຕັ້ງປະຕິບັດວິໄສທັດປະຊາ ຄົມອາຊຽນ 2025 ແລະ ແຜນແມ່ບົດທັງ 3 ເສົາຄໍ້າປະຊາຄົມອາຊຽນ, ໂດຍສະເພາະແມ່ນແຜນ ວຽກຂໍ້ລິເລີ່ມ ເພື່ອການເຊື່ອມໂຍງອາຊຽນ ແລະ ແຜນແມ່ບົດ ເພື່ອການເຊື່ອມຈອດອາຊຽນ 2025 ຊຶ່ງ ສປປ ລາວ ໄດ້ຮ່ວມມືກັບບັນດາປະເທດເພື່ອນບ້ານໃກ້ຄຽງພັດທະນາພື້ນຖານໂຄງລ່າງ ເພື່ອເຊື່ອມຈອດ ດ້ານຄົມມະນາຄົມເປັນຕົ້ນແມ່ນເສັ້ນທາງລົດໄຟຄວາມໄວສູງ, ທາງດ່ວນ, ທາງຫຼວງ ແລະ ລະບົບສາຍສົ່ງໄຟຟ້າ ທີ່ຈະເຮັດໃຫ້ ສປປ ລາວ ກາຍເປັນປະເທດເຊື່ອມໂຍງ ແລະ ເຊື່ອມຈອດກັບປະເທດຕ່າງໆ. ພ້ອມກັນນີ້, ທ່ານຍັງຍົກໃຫ້ເຫັນເຖິງຄວາມເອົາໃຈໃສ່ ຕໍ່ການປະຕິບັດໜ້າທີ່ ແລະ ພາລະບົດບາດຂອງສະພາແຫ່ງຊາດລາວ ໃນການສ້າງ ແລະ ປັບປຸງກົດໝາຍໃນຂົງເຂດເສດ ຖະກິດ, ວັດທະນະທຳ-ສັງຄົມ ແລະ ດ້ານອື່ນໆ ລວມທັງໄດ້ພິຈາລະນາໃຫ້ສັດຕະຍາບັນແກ່ສົນ ທິສັນຍາຕ່າງໆ ຕາມກອບການຮ່ວມມືອາຊຽນຢ່າງເປັນເຈົ້າການ.

ໃນຕອນທ້າຍ,ທ່ານໄດ້ຮຽກຮ້ອງໃຫ້ລັດຖະສະພາສະມາຊິກໄອປາຮັດແໜ້ນການຮ່ວມມືໃນການຊຸກຍູ້ສົ່ງເສີມການປະສານງານ,ການເປັນຄູ່ຮ່ວມທີ່ດີ ແລະມີປະສິດທິພາບຜ່ານກົນໄກຕ່າງໆ ເພື່ອບັນລຸບັນດາເປົ້າໝາຍຂອງການສ້າງປະຊາຄົມອາຊຽນໃຫ້ມີຄວາມເຂັ້ມແຂງ, ມີຄວາມຍືນຍົງໃນທຸກດ້ານ ແລະພ້ອມກັນກ້າວໄປຂ້າງໜ້າທີ່ມີວິໄສທັດໜຶ່ງດຽວ, ເອກະລັກໜຶ່ງດຽວ, ປະຊາຄົມໜຶ່ງດຽວ, ໄປຕາມທິດປະຊາຊົນ ແລະປະຊາຊົນເປັນແກນກາງຢ່າງແທ້ຈິງ.

ນັບແຕ່ມື້ເປີດເປັນຕົ້ນໄປ,ກອງປະຊຸມກຳມາທິການຕ່າງໆຂອງໄອປາ ຄື: ກອງປະຊຸມຄະນະສະມາຊິກລັດຖະສະພາເພດຍິງ,ສະມາຊິກລັດຖະສະພາໜຸ່ມ, ກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະ ກຳມາທິການວຽກງານພາຍໃນຂອງໄອປາຈະໄດ້ດຳເນີນຕາມວາລະຂອງກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນຊຶ່ງກອງປະຊຸມຈະໄດ້ຄົ້ນຄວ້າ, ປຶກສາຫາລື ແລະພິຈາລະນາຮັບຮອງເອົາຮ່າງມະຕິຕາມຂົງເຂດວຽກງານຕ່າງໆເຫຼົ່ານັ້ນຈຳນວນ 34 ສະບັບ.
ຂ່າວ: ສະພາແຫ່ງຊາດ

แชร์