ຝຶກອົບຮົມ ການພັດທະນາຊັບພະຍາກອນມະນຸດທາງດ້ານ ໄຊເບີ

ໃນລະຫວ່າງວັນທີ 21-25 ພະຈິກ 2022 ບັນດາພະນັກງານຈາກກະຊວງເຕັກໂນໂລຊີ ແລະການສື່ສານເຂົ້າຮ່ວມການຝຶກອົບຮົມທາງດ້ານ ໄຊເບີ ຫຼື ‘Cyber Bootcamp’ ໂດຍມີ ຄູຝຶກມາຈາກວິທະຍາໄລຄວາມໝັ້ນຄົງແຫ່ງຊາດຂອງອົດສະຕຣາລີ ຊຶ່ງແມ່ນໜຶ່ງໃນກິດຈະກຳພົ້ນເດັ່ນຂອງໂຄງການຮ່ວມມືທາງດ້ານໄຊເບີ ແລະ ເຕັກໂນໂລຊີ ທີ່ມີມູນຄ່າ 74 ລ້ານ ໂດລາ ຈາກກະຊວງການຕ່າງປະເທດ ແລະການຄ້າ ແຫ່ງ ອົດສະຕຣາລີ ຊຶ່ງສະແດງເຖິງການມີສ່ວນຮ່ວມຂອງອົດສະຕຣາລີ ໃນການຈັດການບັນຫາຕ່າງໆ ທາງດ້ານໄຊເບີ ທັງພາຍໃນ ແລະສາກົນ, ທັງນີ້ກໍເພື່ອໃຫ້ຜູ້ເຂົ້າຮ່ວມໄດ້ຮັບຄວາມຮູ້ ແລະສ້າງຄວາມອາດສາມາດໃນການຈັດການ ແລະ ຮັກສາຄວາມໝັ້ນຄົງທາງໄຊເບີໃຫ້ຫຼາຍຂຶ້ນກວ່າເກົ່າ.

ໂອກາດນີ້ ທ່ານ ສັນຕິສຸກ ສິມມະລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະການສື່ສານ ໄດ້ກ່າວວ່າ: ຄວາມໝັ້ນຄົງທາງດ້ານໄຊເບີ ເປັນບຸລິມະສິດທີ່ສຳຄັນຂອງ ສປປ ລາວ. ພ້ອມກັນນັ້ນ, ທ່ານ ຍັງໄດ້ກ່າວຂອບໃຈຕໍ່ລັດຖະບານອົດສະຕຣາລີ ແລະວິທະຍາໄລຄວາມໝັ້ນຄົງແຫ່ງຊາດ ອົດສະຕຣາລີ ສຳລັບການສະໜັບສະໜຸນ.

ທ່ານ ໂທບຽສ ຟີກິນ (Tobias Feakin) ເອກອັກຄະລັດຖະທູດພິເສດສຳລັບວຽກງານໄຊເບີ ແລະເຕັກໂນໂລຊີໄດ້ກ່າວວ່າ “ເປົ້າໝາຍຂອງ ອົດສະຕຣາລີ ເພື່ອຄວາມປອດໄພ, ໝັ້ນຄົງ ແລະ ວັດຖະນາຖາວອນ ຂອງປະເທດອົດສະຕຣາລີ, ພາກພື້ນ ອິນໂດ-ປາຊີຟິກ ແລະສາກົນໂດຍຜ່ານການຮ່ວມມືທາງໄຊເບີ ແລະເຕັກໂນໂລຊີ”. ພວກເຮົາແນມເຫັນ ສປປ ລາວ ແລະບັນດາປະເທດອາຊຽນເປັນຄູ່ຮ່ວມມືທີ່ສຳຄັນໃນການບັນລຸເປົ້າໝາຍດັ່ງກ່າວ.

ຊຸດຝຶກອົບຮົມໃນຄັ້ງນີ້, ເປັນສ່ວນໜຶ່ງຂອງການສະໜັບສະໜຸນທາງດ້ານ ໄຊເບີ ຈາກລັດຖະບານ ອົດສະຕຣາລີ ໃຫ້ແກ່ ສປປ ລາວ, ລວມທັງການຝຶກອົບຮົມທາງດ້ານການຕອບໂຕ້ສຳລັບໂຄງຮ່າງການຈັດຕັ້ງຂອງອົງກອນ, ການສືບສວນ-ສອບສວນ ອາຊະຍາກຳ ທາງ ໄຊເບີ ແລະການຝຶກອົບຮົມໃຫ້ແກ່ຕຳຫລວດ ແລະການຝຶກອົບຮົມກ່ຽວກັບມາດຖານ ແລະການປະພຶດທາງຄອມພິວເຕີ.

ການຝຶກອົບຮົມ Bootcamp ແມ່ນໜຶ່ງໃນການສະເຫລີມສະຫລອງ 70ປີ ຂອງສາຍພົວພັນທາງການທູດລະຫວ່າງ ລາວ-ອົດສະຕຣາລີ ເຊິ່ງສ້າງຂຶ້ນບົນພື້ນຖານ ການເຄົາລົບເຊິ່ງກັນ ແລະ ເຂົ້າໃຈກັນ. ນອກນັ້ນ, ຍັງເປັນສືບຕໍ່ຈາກ ການປະກາດຍົກລະດັບສາຍພົວພັນລະຫວ່າງສອງປະເທດ ໃຫ້ກາຍເປັນການພົວພັນຮ່ວມມືຮອບດ້ານທີ່ນາຍົກລັດຖະມົນຕີຂອງສອງປະເທດ ໄດ້ຕົກລົງເຫັນດີ ໃນວັນທີ 12 ພະຈິກທີ່ຜ່ານມາເຊິ່ງເປັນສັນຍານທີ່ດີໃຫ້ແກ່ການເຕີບໃຫຍ່ຂະຫຍາຍຕົວຂອງສາຍພົວພັນຂອງພວກເຮົາ ແລະເປັນຄຳໝັ້ນສັນຍາໃນການຮັດແໜ້ນການຮ່ວມມືຂອງສອງປະເທດ.

แชร์