ສະຫະພັນແມ່ຍິງລາວ ຖືສໍາຄັນສ້າງແມ່ຍິງລາວບັນດາເຜົ່າເປັນພົນລະເມືອງດີ

ອົງການຈັດຕັ້ງສະຫະພັນແມ່ຍິງລາວ ໃນຖານະເປັນອົງການມະຫາຊົນ ຂອງພັກ ຍາມໃດກໍໄດ້ຖືສໍາຄັນ ແລະເອົາໃຈໃສ່ຕໍ່ວຽກງານສຶກສາອົບຮົມການເມືອງ-ນໍາພາແນວຄິດ ເພື່ອຮັບປະ ກັນໃຫ້ການສ້າງສະມາຊິກແມ່ຍິງ ແລະແມ່ຍິງລາວບັນດາເຜົ່າເປັນພົນລະເມືອງດີ, ມີນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ,ເຊິ່ງຄະນະສະຫະພັນແມ່ຍິງໄດ້ນໍາພາຈັດຕັ້ງປະຕິບັດຂໍ້ແຂ່ງຂັນ 3 ດີ (ສ້າງແມ່ຍິງໃຫ້ກາຍເປັນພົນລະເມືອງດີ, ພັດທະນາດີ ແລະ ສ້າງຄອບຄົວດີ), ການສ້າງບ້ານ 3 ດີ ຕິດພັນກັບ 3 ສ້າງ ເຂົ້າສູ່ລວງເລິກ, ການກໍ່ສ້າງຮາກຖານການເມືອງ, ການສ້າງບ້ານ ແລະກຸ່ມບ້ານພັດທະນາຕາມ 4 ເນື້ອໃນ 4 ຄາດໝາຍ ບັນລຸເກີນ 87%.

ສະຫາຍ ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ປະທານສະຫະພັນແມ່ຍິງລາວໄດ້ໃຫ້ຮູ້ໃນກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ທີ່ໄດ້ຈັດຂຶ້ນ ໃນລະຫວ່າງວັນທີ 17-18 ພະຈິກ 2022 ນີ້ວ່າ: ເພດຍິງໃນ ສປປ ລາວ ກວມເກືອບເຄິ່ງໜຶ່ງ ຂອງພົນລະເມືອງ ໃນນັ້ນ, ພະນັກງານ, ລັດຖະກອນທີ່ເປັນເພດຍິງ ກວມ ກວ່າ 47,45% ແລະ ມີສະມາຊິກສະຫະພັນແມ່ຍິງ ປະມານ 1,3 ລ້ານກວ່າຄົນ, ເພື່ອເຕົ້າໂຮມຄວາມສາມັກຄີສະຫະພັນແມ່ຍິງລາວ ໄດ້ສືບຕໍ່ປຸກລະດົມຊຸກຍູ້ແມ່ຍິງລາວເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະສ້າງສາພັດທະນາປະເທດຊາດ, ເປັນເຈົ້າການປະຕິບັດແຜນພັດທະນາແມ່ຍິງລາວແຕ່ລະໄລຍະຕິດພັນກັບຂະບວນແຂ່ງຂັນຮັກຊາດ ແລະ ພັດທະນາ; ເອົາໃຈໃສ່ສຶກສາອົບຮົມຄຸນລັກສະນະທີ່ເປັນມູນເຊື້ອ ຂອງແມ່ຍິງລາວບັນດາເຜົ່າ, ປົກປັກຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ; ເສີມຂະຫຍາຍມູນເຊື້ອພິລະອາດຫານ, ໃຫ້ເອື້ອຍນ້ອງແມ່ນຍິງຮໍ່າຮຽນຄຸນສົມບັດສິນທໍາປະຕິວັດອັນດີງາມ ຂອງແມ່ຍິງ, ພະນັກງານປະຕິວັດອາວຸໂສຮຸ່ນກ່ອນ ເຊິ່ງເຮັດໃຫ້ສະມາຊິກສະຫະພັນແມ່ຍິງຈໍານວນຫລາຍ ຮັກສາໄດ້ຄຸນລັກສະນະທີ່ເປັນມູນເຊື້ອ ຂອງແມ່ຍິງລາວ, ມີຄວາມອົດທົນ, ດຸໜັ່ນ, ສາມັກຄີໂອບເອື້ອອາລີ, ດໍາລົງຊີວິດດ້ວຍຄວາມປອດໃສ, ຫລາຍຄອບຖືກຄັດເລືອກເປັນຄອບຄົວວັດທະນະທໍາ, ຄອບຄົວພັດທະນາ, ຄອບຄົວທີ່ເປັນແບບຢ່າງໃນການຜະລິດກະສິກຳ, ຫັດຖະກໍາ, ແບບຢ່າງໃນການດໍາເນີນທຸລະກິດ, ແບບຢ່າງທາງດ້ານວິຊາການ ແລະ ມີຄວາມຮັບຜິດຊອບສູງຕໍ່ໜ້າທີ່ການເມືອງ ທີ່ໄດ້ຮັບມອບໝາຍ, ມີຫລາຍສະຫາຍໄດ້ຮັບການຍ້ອງຍໍໃນລະດັບຕ່າງໆ, ໄດ້ຮັບຄວາມເຊື່ອໝັ້ນ, ໄວ້ວາງໃຈຈາກການຈັດຕັ້ງ-ສັງຄົມ ຈຶ່ງໄດ້ຮັບການບັນຈຸສັບຊ້ອນ ເຂົ້າໃນຕໍາແໜ່ງຄຸ້ມຄອງນໍາພານັບມື້ເພີ່ມຂຶ້ນ.

ສະຫາຍ ນາງ ອິນລາວັນ ແກ້ວບຸນພັນ ຍັງໃຫ້ຮູ້ອີກວ່າ: ປັດຈຸບັນສູນກາງສະຫະພັນແມ່ຍິງລາວກໍາລັງປະເມີນເພື່ອປັບປຸງກົດໝາຍວ່າດ້ວຍການປົກປ້ອງ ແລະ ພັດທະນາແມ່ຍິງ (2004) ແລະກົດໝາຍວ່າດ້ວຍສະຫະພັນແມ່ຍິງລາວ (2013) ເພື່ອສ້າງການຫັນປ່ຽນຢ່າງແຂງແຮງໃນການດໍາລົງຊີວິດແບບລຽບງ່າຍ, ມີຈິດໃຈກວ້າງຂວ້າງ, ເອື້ອເຟື້ອເພື່ອແຜ່, ດຸໝັ່ນຂະຫຍັນພຽນທີ່ເປັນມູນເຊື້ອອັນດີງາມຂອງແມ່ຍິງລາວ, ພ້ອມທັງຈະຕັ້ງໜ້າປົກປັກຮັກສາວັດທະນະທໍາຮີດຄອງປະເພນີອັນດີງາມຂອງຊາດ-ຂອງເຜົ່າ ແລະ ຂອງເພດຍິງ, ເຮັດໜ້າທີ່ສຶກສາອົບຮົມຄອບຄົວລູກຫລານໃຫ້ເຂົາເຈົ້າເຂົ້າໃຈຮັບຮູ້ພາລະບົດບາດໜ້າທີ່ຂອງແມ່ຍິງໃນໄລຍະໃໝ່ ເພື່ອໃຫ້ເຂົາເຈົ້າໄດ້ໃຫ້ການຮ່ວມມືກັບແມ່ຍິງປະຕິບັດໜ້າທີ່ການເມືອງຂອງຕົນ, ເປັນເຈົ້າການຮ່ວມກັນສ້າງສະຖາບັນຄອບຄົວໃຫ້ມີຄວາມຜາສຸກ ແລະຈະສືບຕໍ່ຮັກສາແມ່ຍິງລາວໃຫ້ກາຍເປັນລູກສາວຜູ້ປະເສີດຂອງພັກ, ຂອງປະເທດຊາດຕໍ່ໄປ.

แชร์