ຍີ່ປຸ່ນ ສະໜັບສະໜູນຕິດຕັ້ງເຕົາເຜົາຂີ້ເຫຍື້ອຢູ່ຫຼວງພະບາງ

ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 92.000 ໂດລາ ເພື່ອຈັດຕັ້ງປະຕິບັດໂຄງການຕິດຕັ້ງເຕົາເຜົາຂີ້ເຫຍື້ອຕິດເຊື້ອທີ່ນະຄອນ-ຫຼວງພະບາງ ແຂວງຫຼວງພະບາງ ພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP).

ພິທີເຊັນສັນຍາໂຄງການດັ່ງກ່າວ ໄດ້ຈັດຂຶ້ນໃນວັນທີ 16 ພະຈິກຜ່ານມາທີ່ສະຖານທູດຍີ່ປຸ່ນ ປະຈຳລາວ ລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ທ່ານ ນາງ ໄກສອນ ແກ້ວປະເສີດ ຫົວໜ້າຫ້ອງການບໍລິຫານຕົວເມືອງ ນະຄອນ-ຫຼວງພະບາງ; ໂດຍມີ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ທ່ານ ຄຳຂັນ ຈັນທະວີສຸກ ໄດ້ກ່າວວ່າ: ພາຍຫຼັງທີ່ ເມືອງຫຼວງພະບາງ ກໍຄືນະຄອນ-ຫຼວງພະບາງ ໃນປັດຈຸບັນໄດ້ຖືກຮັບຮອງຈາກອົງການອຸຍແນັສໂກໃຫ້ເປັນເມືອງມໍລະດົກໂລກ ໃນປີ 1995 ເປັນຕົ້ນມາ, ໄດ້ເຮັດໃຫ້ນະຄອນ-ຫຼວງພະບາງ ມີຊື່ສຽງຢູ່ໃນພາກພື້ນ ແລະສາກົນຊຶ່ງແຕ່ລະປີໄດ້ມີນັກທ່ອງທ່ຽວທັງພາຍໃນ ແລະຕ່າງປະເທດ ເຂົ້າມາຢ້ຽມຢາມ-ທ່ຽວຊົມນະຄອນຫຼວງພະບາງ ນັບມື້ຫຼາຍຂຶ້ນ ແລະ ແຂວງຫຼວງພະບາງ ໄດ້ກໍານົດເອົາວຽກງານການທ່ອງທ່ຽວເປັນຂະແໜງບຸລິມະສິດ, ຂະແໜງການປາຍແຫຼມເພື່ອຂັບເຄື່ອນການພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງ. ຄຽງຄູ່ກັບການຂະຫຍາຍຕົວທາງດ້ານການທ່ອງທ່ຽວບວກກັບການເພີ່ມຂຶ້ນຂອງພົນລະເມືອງ ໄດ້ເຮັດໃຫ້ມີການຊົມໃຊ້ຊັບພະຍາກອນເພີ່ມຂຶ້ນ, ມີສິ່ງເສດເຫຼືອເພີ່ມຂຶ້ນ, ສິ່ງເສດເຫຼືອທີ່ເປັນອັນຕະລາຍກໍມີທ່າອ່ຽງເພີ່ມຂຶ້ນເປັນຕົ້ນແມ່ນຂີ້ເຫຍື້ອຕິດເຊື້ອຈາກໂຮງໝໍ, ຄຣີນິກຕ່າງໆ; ຖ້າຫາກບໍ່ມີການກໍາຈັດຢ່າງຖືກຕ້ອງກໍຈະເກີດຜົນກະທົບຕໍ່ຜູ້ທີ່ເຮັດວຽກງານອະນາໄມຮັກສາຄວາມສະອາດໂດຍກົງ, ກະທົບຕໍ່ສັດ ແລະຊີວິດການເປັນຢູ່ຂອງປະຊາຊົນທີ່ຢູ່ໃກ້ຄຽງກັບສະໜາມຂີ້ເຫຍື້ອ.

ທ່ານເຈົ້າແຂວງຍັງໃຫ້ຮູ້ອີກວ່າ: ຜົນກະທົບດັ່ງກ່າວ, ຍັງເປັນບັນຫາຄົງຄ້າງ ແລະເປັນສິ່ງທ້າທາຍທີ່ພວກເຮົາກໍາລັງສຸມໃສ່ຊອກຫາວິທີທາງແກ້ໄຂໃຫ້ສອດຄ່ອງ ແລະ ເໝາະສົມ ເພື່ອໃຫ້ສອດຄ່ອງກັບວິໄສທັດຂອງນະຄອນ-ຫຼວງພະບາງ ທີ່ວ່າ “ສ້າງຫຼວງພະບາງໃຫ້ເປັນ ນະຄອນສະອາດ, ສີຂຽວ ແລະໜ້າຢູ່ຄຽງຄູ່ກັບການປົກປັກຮັກສາມໍລະດົກໂລກໃຫ້ຍືນຍົງ”. ສະນັ້ນ, ການຕິດຕັ້ງເຕົາເຜົາຂີ້ເຫຍື້ອຕິດເຊື້ອທີ່ໄດ້ຮັບການຊ່ວຍເຫຼືອຈາກ ລັດຖະບານຍີ່ປຸ່ນໃນຄັ້ງນີ້ຈະປະກອບສ່ວນສຳຄັນໃນການແກ້ໄຂຜົນກະທົບຈາກການເພີ່ມຂຶ້ນຂອງຂີ້ເຫຍື້ອອັນຕະລາຍ ເປັນຢ່າງດີ; ພ້ອມຢືນຢັນຈະນຳໃຊ້ໃຫ້ໄດ້ຮັບຜົນປະໂຫຍດສູງສຸດ.

ໂຄງການ GGPແມ່ນການສະໜອງທຶນທີ່ຈຳເປັນໃຫ້ແກ່ໂຄງການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະມີຈຸດປະສົງເພື່ອການພັດທະນາເສດຖະກິດ-ສັງຄົມຂອງ ສປປ ລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ. ລັດຖະບານຍີ່ປຸ່ນຈະສືບຕໍ່ໃຫ້ການຊ່ວຍເຫຼືອລັດຖະບານລາວປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ.
(ຂ່າວ-ພາບ: ສຸກສະຫວັນ)

แชร์