ວັນຊາດ ທີ 2 ທັນວາ ແມ່ນວັນທີ່ມີຄວາມໝາຍຄວາມສໍາຄັນຂອງຊາດລາວເຮົາ

ວັນຊາດ ທີ 2 ທັນວາ ແມ່ນວັນທີ່ມີຄວາມໝາຍຄວາມສໍາຄັນຂອງຊາດລາວເຮົາ ຊຶ່ງທົ່ວພັກ-ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວບັນດາເຜົ່າໃນຂອບເຂດທົ່ວປະເທດໄດ້ພ້ອມກັນເອກອ້າງທະນົງໃຈສ້າງຜົນງານ ແລະ ຂະບວນການດ້ານຕ່າງໆໄວ້ຂໍ່ານັບຮັບຕ້ອນ ແລະ ສະເຫຼີມ ສະຫຼອງວັນສໍາຄັນດັ່ງກ່າວຢ່າງເປັນຂະບວນຟົດຟື້ນກວ້າງຂວາງ.

ທ່ານ ພັອ ກົງຈັນ ໄຊປັນຍາ ມີທັດສະນະຄວາມຮູ້ສຶກກ່ຽວກັບ ວັນຊາດທີ 2 ທັນວາ ຄົບຮອບ 47 ປີ (2 ທັນວາ 1975 - 2 ທັນວາ 2022) ວ່າ: ເພື່ອລະນຶກຫວນຄືນເຫດການປະຫວັດສາດອັນສໍາຄັນ. ກ່ອນໜ້ານີ້ 47 ປີ ຄື ວັນທີ 2 ທັນວາ 1975 ເປັນມື້ທີ່ປະຊາຊົນລາວທັງຊາດໄດ້ປະກາດຕໍ່ໂລກຢ່າງກ້ອງກັງວານວ່າ: “ນັບແຕ່ມື້ນີ້ເປັນຕົ້ນໄປ ປະຊາຊົນລາວທຸກໆເຜົ່າ, ທຸກຊັ້ນວັນນະ ແລະ ເພດໄວ ໄດ້ມີຄວາມເປັນເອກະລາດ, ມີອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ປະຊາຊົນລາວທັງຊາດໄດ້ເປັນເຈົ້າຂອງປະເທດຊາດຢ່າງແທ້ຈິງ, ເປັນເຈົ້າປິຕຸພູມທີ່ແສນຮັກ ແລະ ຫວງແຫນຂອງຕົນ” ສຽງປະກາດອັນສະຫງ່າລາສີ ແລະ ສົມກຽດນັ້ນ, ເຮັດໃຫ້ຊາດລາວເປັນຊາດໜຶ່ງທີ່ມີກຽດສັກສີ ເທົ່າທຽມກັບຊາດອື່ນໆໃນອາຊີ ແລະ ໃນໂລກ, ເປັນການສະຫຼອງວັນມະຫາໄຊອັນເຕັມໄປດ້ວຍຄວາມພາກພູມໃຈຂອງຄົນໃນຊາດ ຊຶ່ງໄດ້ມາຈາກການຕໍ່ສູ້ກູ້ຊາດອັນຍືດເຍື້ອຍາວນານຂອງບັນພະບູລຸດເຮົາ, ໄດ້ມາຈາກເລືອດເນື້ອ, ຢາດເຫຶ່ອ ແລະ ນໍ້າຕາຂອງນັກຮົບຜູ້ກ້າຫານ, ຈາກປະຊາຊົນລາວບັນດາເຜົ່າຜູ້ຮັກຊາດທີ່ໄດ້ຕໍ່ສູ້ດ້ວຍນໍ້າໃຈເສຍສະຫຼະຈຶ່ງໄດ້ນຳເອົາວັນນີ້ມາໃຫ້ຊາດມາໃຫ້ປະຊາຊົນເຮົາ.

ຕົນເອງຂໍມີທັດສະນະຕື່ມວ່າ: ເຖິງວ່າໂລກຈະປ່ຽນໄປ, ຄ່ານິຍົມຂອງຄົນຫຼາຍປະເທດປ່ຽນໄປຕາມຜົນສະທ້ອນຂອງການປ່ຽນແປງຂອງໂລກນັ້ນ, ຂໍຢ່າໃຫ້ມາປ່ຽນແປງວັດທະນະທໍາ ແລະ ປະເພນີອັນດີງາມຂອງຊາດລາວເຮົາ, ການຮັກສາຄຸນຄ່າຂອງຄວາມເປັນລາວທາງດ້ານຮີດຄອງປະເພນີເປັນການຮັກສາຄວາມເປັນຊາດລາວໄປຊົ່ວກາລະນານ, ມູນເຊື້ອອັນດີງາມ ເປັນທີ່ໂດດເດັ່ນຂອງ ສາທາລະນະລັດ ປະຊາທິປະໄຕ ປະຊາຊົນລາວ ໃນໄລຍະ 47ປີ ຜ່ານມານັ້ນແມ່ນນະໂຍບາຍການຕ່າງປະເທດທີ່ສະເໝີຕົ້ນສະເໝີປາຍ, ເປີດກວ້າງ, ຫຼາຍຮູບ, ຫຼາຍສີ,ພົວພັນຫຼາຍຝ່າຍ,ຫຼາຍລະດັບທີ່ສະຫຼຽວສະຫຼາດມີພິກໄຫວ ແລະຄ່ອງຕົວຂອງພັກເຮົາທີ່ໄດ້ສືບທອດມໍລະດົກມາແຕ່ສະໄໝຕໍ່ສູ້ກູ້ຊາດ, ພວກເຮົາຄົນຮຸ່ນນີ້ ແລະຄົນຮຸ່ນຕໍ່ໄປບໍ່ສະເພາະແຕ່ຮັກສາມູນເຊື້ອອັນດີງາມນີ້ໄວ້ເປັນບົດຮຽນເທົ່ານັ້ນ,ຫາກຍັງຕ້ອງເຊີດຊູຄວາມຮັບຜິດຊອບ, ສືບຕໍ່ໜັກແໜ້ນ,ກວ້າງໄກ, ມີໄຫວພິບ, ຮູ້ເລິກ, ຮູ້ຕື້ນ, ຮູ້ໜາ, ຮູ້ບາງ, ຮູ້ມິດ, ຮູ້ສັດຕູ ແລະສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບພ້ອມກັນປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອນສີວິໄລກ້າວສູ່ສັງຄົມນິຍົມຕາມແນວທາງຂອງພັກວາງໄວ້.

ສຸດທ້າຍນີ້, ຮຽກຮ້ອງມາຍັງທຸກການຈັດຕັ້ງໃນລະບົບການເມືອງ, ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະພີ່ນ້ອງປະຊາຊົນບັນດາເຜົ່າໃນທົ່ວປະເທດ ຈົ່ງເພີ່ມທະ ວີຄວາມສາມັກຄີເປັນປຶກແຜ່ນ, ຄວາມຮັບຜິດຊອບການເມືອງ, ເປັນເຈົ້າການຫັນເອົາມູນເຊື້ອ ແລະນໍ້າໃຈວັນຊາດ ທີ 2 ທັນວາ, ພ້ອມກັນເສີມຂະຫຍາຍໝາກຜົນທີ່ຍາດມາໄດ້ໃນພາລະກິດປ່ຽນແປງໃໝ່,ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະຮອບດ້ານໃຫ້ເປັນຮູບປະທໍາຕົວຈິງເພື່ອສືບຕໍ່ບູລະນະລະບອບ ປະຊາທິປະໄຕ ປະຊາຊົນ ຂອງພວກເຮົາກ້າວຂຶ້ນບໍ່ຢຸດຢັ້ງ ! ຂໍອວຍພອນໄຊອັນປະເສີດໃຫ້ແກ່ບັນດາທ່ານການນໍາພັກ-ລັດ, ສະມາຊິກພັກ, ພະນັກງານ-ລັດຖະກອນ, ພະນັກງານອາວຸໂສບໍານານ, ທະຫານ, ຕຳຫຼວດ, ນັກຮຽນ-ນັກສຶກສາ, ປັນຍາຊົນ, ນັກທຸລະກິດ, ຊາວຄ້າ-ຂາຍ, ກໍາມະກອນຊາວຜູ້ອອກແຮງງານ ຕະຫຼອດຮອດປະຊາຊົນລາວບັນດາເຜົ່າຜູ້ທີ່ດຳລົງຊີວິດຢູ່ພາຍໃນ ແລະ ຢູ່ຕ່າງປະເທດ ແລະຊາວຕ່າງປະເທດທີ່ກຳລັງດຳລົງຊີວິດ ຢູ່ ສປປ ລາວ ທຸກໆທ່ານ ຈົ່ງມີພະລານາໄມສົມບູນ, ມີຄວາມສຸກ, ມີຄວາມສຳເລັດໃນໜ້າທີ່ວຽກງານທຸກປະການມານະທີ່ນີ້ດ້ວຍ.
ວັນຊາດ ທີ 2 ທັນວາ ໝັ້ນຍືນ!.

แชร์