ຍີ່ປຸ່ນ-ອິນໂດເນເຊຍ ສົ່ງເສີມການຮ່ວມມືຫຼຸດການປ່ອຍມົນລະພິດທົ່ວອາຊີ

ເມື່ອວັນທີ 16 ພະຈິກທີ່ຜ່ານມານ, ຍີ່ປຸ່ນໄດ້ປະກາດຊ່ວຍສະໜັບສະໜູນທຶນການປ່ຽນຜ່ານຂອງອິນໂດເນເຊຍ ຈາກພະລັງງານຖ່ານຫີນເປັນພະລັງງານສະອາດ ແລະ ເຊີນຊວນປະເທດອື່ນໆເຂົ້າຮ່ວມໃນການຮ່ວມມືດັ່ງກ່າວຊຶ່ງເປັນສ່ວນໜຶ່ງຂອງຄວາມພະຍາຍາມຂອງຍີ່ປຸ່ນໃນການຫຼຸດການປ່ອຍແກັສເຮືອນແກ້ວທີ່ເຮັດໃຫ້ເກີດພາວະໂລກຮ້ອນທົ່ວທະວີບອາຊີ.

ການປະກາດດັ່ງກ່າວເກີດຂຶ້ນຫຼັງຈາກການປຶກສາຫາລືລະດັບທະວິພາຄີລະຫວ່າງອິນໂດເນເຊຍ ແລະຍີ່ປຸ່ນ ທີ່ເກາະບາຫຼີ ກ່ອນກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ ຈີ20 ຊຶ່ງເປີດຂຶ້ນເມື່ອວັນທີ 15 ພະຈິກທີ່ຜ່ານມາ ແລະກົງກັບກອງປະຊຸມລັດຖະພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບພູມອາກາດຕາມຂອບຂອງອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບພູມອາກາດ (UNFCCC) ຄັ້ງທີ 27 ຫຼື COP27 ທີ່ເອຢິບ ຊຶ່ງເຂົ້າສູ່ອາທິດທີ 2 ແລະ ອາທິດສຸດທ້າຍຂອງກອງປະຊຸມແລ້ວ. ພາຍໃຕ້ການຮ່ວມມືເບື້ອງຕົ້ນຍີ່ປຸ່ນຈະໃຊ້ເງິນທຶນຈາກສະຖາບັນຕ່າງໆຂອງພາກລັດ ແລະ ເອກະຊົນຂອງປະເທດ ຊຶ່ງລວມໄປເຖິງທະນາຄານເພື່ອການຮ່ວມມືສາກົນແຫ່ງຍີ່ປຸ່ນ (JBIC) ໂດຍອົງການຮັບປະກັນການສົ່ງອອກ ແລະ ການລົງທຶນແຫ່ງຍີ່ປຸ່ນ (NEXI) ແລະ JBIC ຈະສະໜັບສະໜູນການດຳເນີນການຕາມມາດຕະການປ່ຽນຜ່ານພະລັງງານຂອງພີແອວເອັນ (PLN) ຊຶ່ງເປັນໜ່ວຍງານພາກລັດຂອງອິນໂດເນເຊຍ.

ທາງດ້ານກຸ່ມປະເທດອຸດສາຫະກຳຂັ້ນນຳ 7 ແຫ່ງ ຫຼື ຈີ7 ກຳລັງພະຍາຍາມເລັ່ງການພັດທະນາພະລັງງານໝູນວຽນ ແລະ ຈຳກັດການພັດທະນາຖ່ານຫີນໃນອິນໂດເນເຊຍໂດຍອາເມຣິກາໄດ້ເປີດເຜີຍແຜນການປ່ຽນຜ່ານພະລັງງານກັບອິນໂດເນເຊຍໃນລະຫວ່າງກອງປະຊຸມສຸດຍອດຜູ້ນຳ ຈີ 20. ທັງນີ້,ທ່ານ ຟຸມິໂອະ ຄິຊິດະ ນາຍົກລັດຖະມົນຕີຍີ່ປຸ່ນໄດ້ສະເໜີແນວຄວາມຄິດກ່ຽວກັບຊຸມຊົນປ່ອຍມົນລະພິດເປັນສູນແຫ່ງອາຊີເມື່ອໄລຍະຕົ້ນປີທີ່ຜ່ານມາເພື່ອຊ່ວຍໃຫ້ປະເທດຕ່າງໆໃນອາຊີຮ່ວມມືກັນໃນດ້ານເຕັກໂນໂລຊີການດັກຈັບໄຮໂດຣເຈນ ແລະຄາບອນຊຶ່ງສາມາດຫຼຸດປະລິມານແກັສຄາບອນໄດອອກຊາຍທີ່ຖືກປ່ອຍຂຶ້ນສູ່ຊັ້ນບັນຍາກາດຄວບຄູ່ກັບການອະນຸຍາດໃຫ້ໃຊ້ເຊື້ອໄຟຟອສຊິນຕໍ່ໄປໄດ້.

แชร์