ຫົວໜ້າ ຄຕພ ຕ້ອນຮັບຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດ

ສະຫາຍ ທອງສະຫວັນ ພົມວິຫານ ກໍາມະການສູນກາງພັກຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ແຟັກນັງໂດ ກອງຊາເລສ ໂຢ ວິລະຊົນແຫ່ງຊາດ ສ ກູບາ ປະທານສະຖາບັນກູບາເພື່ອມິດຕະພາບກັບນາໆຊາດພ້ອມດ້ວຍຄະນະ ໃນວັນທີ 17 ພະຈິກ 2022 ທີ່ສໍານັກງານ ຄຕພ ໂອກາດທີ່ຄະນະດັ່ງກ່າວມາຢ້ຽມຢາມ ແລະເຮັດວຽກ ຢູ່ ສປປ ລາວ.

ສະຫາຍ ທອງສະຫວັນ ພົມວິຫານ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດຊຶ່ງຢູ່ໃນທ່າມກາງບັນຍາກາດທີ່ສາຍພົວພັນມິດຕະພາບ ແລະການຮ່ວມມື ລາວ ແລະກູບາ ກຳລັງໄດ້ຮັບການສືບຕໍ່ເສີມຂະຫຍາຍ ແລະເພີ່ມພູນຄູນສ້າງ, ການນໍາຂັ້ນສູງຂອງສອງປະເທດ ໄດ້ມີການໄປມາຫາສູ່, ພົບປະຢ້ຽມຢາມຊຶ່ງກັນ ແລະກັນ, ການຮ່ວມມືຂອງບັນດາຂະແໜງການເປັນຕົ້ນແມ່ນຂະແໜງສຶກສາ-ກິລາ, ສາທາລະນະສຸກ ແລະ ກະສິກຳຍັງສືບຕໍ່ມີປະສິດທິຜົນນໍາເອົາຜົນປະໂຫຍດມາສູ່ປະຊາຊົນສອງປະເທດ. ພ້ອມນັ້ນ, ສະຫາຍຫົວໜ້າ ຄຕພ ຍັງໄດ້ຕີລາຄາສູງຕໍ່ການພົວພັນຮ່ວມມືຂອງສະມາຄົມມິດຕະພາບ ລາວ-ກູບາ ກັບສະຖາບັນກູບາເພື່ອມິດຕະພາບກັບນາໆຊາດໃນການເຄື່ອນໄຫວການທູດປະຊາຊົນເຮັດໜ້າທີ່ບົດບາດສໍາຄັນໃນການສະໜັບສະໜູນ ແລະ ຊ່ວຍເຫຼືອຊຶ່ງກັນ ແລະກັນ ໃນເວທີພາກພື້ນ ແລະສາກົນ, ທັງຊຸກຍູ້ການພົວພັນຮ່ວມມືໃຫ້ແກ່ຂະແໜງການຕ່າງໆຂອງສອງປະເທດໃຫ້ມີປະສິດທິພາບ ແລະ ປະສິດທິຜົນ, ທັງເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ລະຫວ່າງສອງປະເທດລາວ ແລະກູບາ ໃຫ້ນັບມື້ຂຽວສົດງົດງາມ ແລະເກີດດອກອອກຜົນ.

ສະຫາຍ ແຟັກນັງໂດ ກອງຊາເລສ ໂຢ ໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບອັນອົບອຸ່ນຂອງສະຫາຍຫົວໜ້າຄະນະພົວພັນຕ່າງປະເທດສູນກາງພັກ ແລະ ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ, ທັງໄດ້ໃຫ້ຄວາມໝາຍໝັ້ນທີ່ຈະພົວພັນຮ່ວມມື ແລະປະສານງານກັບສະມາຄົມມິດຕະພາບ ລາວ-ກູບາ ເພື່ອເຄື່ອນໄຫວສະໜັບສະໜູນຊຶ່ງກັນ ແລະກັນ ເພື່ອຜົນປະໂຫຍດຂອງສອງຊາດ ທັງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືອັນດີງາມຂອງສອງພັກ, ສອງລັດ ແລະປະຊາຊົນສອງຊາດ ລາວ ແລະກູບາ.

ໃນວັນທີ 16 ພະຈິກຜ່ານມາ, ສະຫາຍ ແຟັກນັງໂດ ກອງຊາເລສ ໂຢ ໄດ້ນໍາພາຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດເຂົ້າຢ້ຽມພົບປະສອງຝ່າຍກັບ ສະຫາຍ ຈະເລີນ ເຢຍປາວເຮີ ກໍາມະການສູນກາງພັກ ຮອງປະທານສະພາແຫ່ງຊາດ ປະທານສະມາຄົມມິດຕະພາບ ລາວ-ກູບາ. ສອງຝ່າຍໄດ້ແຈ້ງສະພາບການພົ້ນເດັ່ນ ຂອງແຕ່ລະປະເທດໃຫ້ກັນຊາບ ແລະຕີລາຄາການການພົວພັນຮ່ວມມືດ້ານການທູດປະຊາຊົນກໍຄືການເຄື່ອນໄຫວຈັດກິດຈະກຳສະໜັບສະໜູນຊ່ວຍເຫຼືອຊຶ່ງກັນ ແລະ ກັນໃນໄລຍະຜ່ານມາ, ປືກສາຫາລື ແລະວາງທິດທາງແຜນການຮ່ວມມືກັນໃນຕໍ່ໜ້າ. ສອງຝ່າຍເຫັນດີເປັນເອກະພາບກັນໃນການສືບຕໍ່ພົວພັນຮ່ວມມື, ສະໜັບສະໜູນ ແລະຊ່ວຍເຫຼືອຊຶ່ງກັນ ແລະກັນ ທັງໃນເວທີພາກພື້ນ ແລະສາກົນ.

ໃນໂອກາດມາຢ້ຽມຢາມ ແລະເຮັດວຽກ ຢູ່ ສປປ ລາວ ຄັ້ງນີ້, ສະຫາຍ ແຟັກນັງໂດ ກອງຊາເລສ ໂຢ ຍັງໄດ້ເຂົ້າຢ້ຽມຂໍ່ານັບການນໍາຂັ້ນສູງ ຂອງ ສປປ ລາວ ຈຳນວນໜຶ່ງ, ພົບປະເຮັດວຽກກັບຫຼາຍພາກສ່ວນຂອງລາວ,ຈັດປາຖະກະຖາ ແລະຢ້ຽມຊົມສະຖານທີ່ທ່ອງທ່ຽວປະຫວັດສາດ,ວັດທະນະທຳ ແລະທຳມະຊາດໃນນະຄອນຫຼວງວຽງຈັນ ແລະແຂວງວຽງຈັນຈຳນວນໜຶ່ງ.
(ຂ່າວ: ຄຕພ, ພາບ: ສຸກສະຫວັນ)

แชร์