ກອງປະຊຸມປະທານສານສູງອາຊີ-ປາຊີຟິກ ຄັ້ງທີ 18 ທາງໄກ (ອອນລາຍ)

ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດພ້ອມຄະນະໄດ້ເຂົ້າຮ່ວມກອງປະຊຸມປະທານສານສູງອາຊີ-ປາຊີຟິກ ຄັ້ງທີ 18 ທາງໄກ (ອອນລາຍ) ຊຶ່ງໄດ້ ຈັດຂຶ້ນໃນລະຫວ່າງ ວັນທີ 16-17 ພະຈິກ 2022 ໂດຍແມ່ນເຂດບໍລິຫານພິເສດຮົງກົງເປັນເຈົ້າພາບຊຶ່ງມີບັນດາປະເທດອາຊຽນ ແລະອາຊີ-ປາຊີຟິກ ເຂົ້າຮ່ວມ.

ທ່ານ ນາງ ວຽງທອງ ສີພັນດອນ ກ່າວຕໍ່ກອງປະຊຸມວ່າ: ກອງປະຊຸມຄັ້ງນີ້ແມ່ນມີຄວາມໝາຍຄວາມສຳຄັນເພື່ອເປັນການແລກປ່ຽນຄວາມຄິດຄວາມເຫັນ, ບົດຮຽນ ແລະ ປະສົບການໃນການພັດທະນາລະບົບສານ, ລະບົບການດຳເນີນຄະດີ, ການບໍລິຫານສານ-ບໍລິຫານຄະດີ ແລະບັນດາຫົວຂໍ້ຍ່ອຍທີ່ເປັນຜົນປະໂຫຍດຕໍ່ການພັດທະນາສານຂອງແຕ່ລະປະເທດ ແລະຍັງເປັນການເພີ່ມທະວີການພົວພັນຮ່ວມມືແບບທະວິພາຄີ.

ສປປ ລາວ ກໍໄດ້ໃຫ້ຄວາມສໍາຄັນ ແລະເພີ່ມທະວີຄວາມເອົາໃຈໃສ່ໃນການສົ່ງເສີມໃຫ້ການຊ່ວຍເຫຼືອທາງດ້ານຕຸລາການ (ດ້ານຍຸຕິທໍາ) ແລະການດໍາເນີນຄະດີໂດຍສະເພາະແມ່ນວິທີການແກ້ໄຂອາຊະຍາກໍາ ແລະຂໍ້ຂັດແຍ່ງທາງແພ່ງ ແລະການຄ້າໂດຍການວາງແນວທາງນະໂຍບາຍ, ອອກເປັນກົດໝາຍ ແລະນິຕິກໍາຕ່າງໆ ເຊັ່ນ: ສ້າງປະມວນກົດໝາຍແພ່ງ, ປະມວນກົດໝາຍອາຍາ, ປັບປຸງກົດໝາຍວ່າດ້ວຍສານປະຊາຊົນ, ປັບປຸງກົດໝາຍວ່າດ້ວຍຜູ້ພິພາກສາ, ປັບປຸງກົດໝາຍວ່າດ້ວຍການດຳເນີນຄະດີແພ່ງ, ປັບປຸງກົດໝາຍວ່າດ້ວຍການດຳເນີນຄະດີອາຍາ ແລະກົດໝາຍອື່ນໆ ໃຫ້ມີຄວາມແທດເໝາະກັບສະພາບການຕົວຈິງ, ພ້ອມກັນນັ້ນ ສປປ ລາວ ກໍໄດ້ເຂົ້າຮ່ວມເປັນພາຄີສົນທິສັນຍາສາກົນ, ສັນຍາຮ່ວມມືສອງຝ່າຍ ແລະຫຼາຍຝ່າຍໃນຂົງເຂດຕ່າງໆ.

ຜູ້ແທນເຂົ້າຮ່ວມກອງປະຊຸມຄັ້ງນີ້ໄດ້ພ້ອມກັນປະກອບຄຳຄິດເຫັນໃສ່ 4 ຫົວຂໍ້ຄື: ການປະເຊີນໜ້າກັບການວິພາກວິຈານພາຍນອກ ແລະການມີສ່ວນຮ່ວມກັບປະຊາຊົນ, ການບໍລິຫານຄະດີໃນສະພາບປັດຈຸບັນ, ສິ່ງທີ່ພົ້ນເດັ່ນທີ່ສຸດສຳລັບຄະນະສານຄອບຄົວ ແລະການສຶກສາດ້ານຕຸລາການ.
(ຂ່າວ-ພາບ: ອານຸພົນ)

แชร์