ກອງພັນປ້ອງກັນເຄື່ອນທີ່ ແຂວງໄຊສົມບູນ ຫັດແອບ-ເຝິກຊ້ອມຍິງລູກປືນແທ້

ໂດຍປະຕິບັດຕາມແຜນຫັດແອບ-ເຝິກຊ້ອມ ສິນລະປະຍຸດ, ຍຸດທະວິທີ ປະຈໍາປີ 2022 ຂອງກໍາລັງເຫຼົ່າລົບວິຊາສະເພາະຂອງກອງພັນປ້ອງກັນເຄື່ອນທີ່ ປກສ ແຂວງໄຊສົມບູນ ໃຫ້ມີຄວາມຊຳນິຊໍານານທັງເປັນການກະກຽມຄວາມພ້ອມດ້ານຕ່າງໆໃນການຮັບໃຊ້ວຽກງານປ້ອງກັນງານບຸນປະເພນີ, ງານສະເຫຼີມສະຫຼອງວັນສຳຄັນຕ່າງຂອງພັກ-ຂອງຊາດ ແລະງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເປັນເຈົ້າພາບທີ່ຈະຈັດຂຶ້ນໃນມໍໆນີ້.ສະນັ້ນມາໃນວັນທີ 11 ພະຈິກ 2022 ຜ່ານມາຢູ່ທີ່ສະໜາມເຝິກຊ້ອມຍິງລູກປືນຂອງກອງພັນນ້ອຍ 598 (ຜາແດງ) ກອງພັນປ້ອງກັນເຄື່ອນທີ່ ປກສ ແຂວງໄຊສົມບູນ ໄດ້ຈັດຕັ້ງຫັດແອບ-ເຝິກຊ້ອມຍິງລູກປືນແທ້ພາຍໃຕ້ການເຂົ້າຮ່ວມເປັນປະທານຂອງ ທ່ານ ພັອ ອິນປັນ ຍາດຕິວົງ ຮອງກອງບັນຊາການ ປກສ ແຂວງ ມີຄະນະກອງພັນ, ແຂກທີ່ຖືກເຊີນຈາກພາຍໃນກົມກອງ, ພະແນກການອ້ອມຂ້າງ, ຄູເຝິກ ແລະຄະນະຮັບຜິດຊອບ ຕະຫຼອດຮອດນາຍ ແລະພົນຕໍາຫຼວດເຂົ້າຮ່ວມ 81 ສະຫາຍ.

ໃນພິທີ ທ່ານ ພັທ ຈັນທະລາ ສີປະເສີດ ຮອງກອງພັນປ້ອງກັນເຄື່ອນທີ່ຜ່ານບົດລາຍງານແຜນການຈັດຕັ້ງປະຕິບັດການຫັດແອບ-ເຝິກຊ້ອມປະຈຳປີ 2022 ເຊິ່ງອາວຸດທີ່ນໍາໃຊ້ເຂົ້າໃນການຫັດແອບ-ເຝິກຊ້ອມຄັ້ງນີ້ປະກອບມີ: ປືນ KPM(ກາເປແອັມ) ໃຊ້ຕິດລົດຈຳນວນ 01 ກະບອກ, ປືນ AK(ອາກ່າ) ຈໍານວນ 21 ກະບອກ, ປືນ T97(ເຕເກົ້າເຈັດ) 21 ກະບອກ, ປືນສັ້ນ MP34(ແອັມເປສາມສີ່) ຈໍານວນ 08 ກະບອກ ແລະປືນ APD(ອາເປເດ) 01 ກະບອກ; ທັງນີ້ກໍເພື່ອຍົກສູງປະສິດທິພາບວຽກງານວິຊາສະເພາ ຂອງກຳລັງປ້ອງກັນເຄື່ອນທີ່ ແນໃສ່ຮັບປະກັນຄວາມພ້ອມທຸກດ້ານ ເພື່ອຕອບຕ້ານ ແລະ ແກ້ໄຂທຸກໜໍ່ແໜງປະກົດການຫຍໍ້ທໍ້ທີ່ອາດຈະເກີດຂຶ້ນໃນສັງຄົມສ້າງປະຖົມປັດໃຈເຮັດໃຫ້ແຂວງໄຊສົມບູນມີຄວາມສະຫງົບປອດໄພ ເຊິ່ງໄດ້ຮັບຄວາມເຊື່ອໝັ້ນໄວ້ວາງໃຈຈາກພໍ່ແມ່ປະຊາຊົນ, ການຈັດຕັ້ງພັກ-ລັດ, ນັກທຸລະກິດ ແລະຜູ້ປະກອບການທຸກພາກສ່ວນສ້າງທ່ວງທ່າທີ່ດີໃຫ້ແກ່ການສ້າງສາພັດທະນາປະເທດຊາດກໍຄືແຂວງໄຊສົມບູນໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.

ພາບ, ຂ່າວ: ຮທ ເຟືອງ ທະວີບຸນນັກຂ່າວ ປກສ ແຂວງໄຊສົມບູນ

แชร์