ກອງປະຊຸມກາງສະໄໝທີ I ຂອງຄະນະພັກຮາກຖານພະແນກ ຖວທ ສາລະວັນ

ກອງປະຊຸມກາງສະໄໝທີ I ຂອງຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງສາລະວັນ ໄດ້ເປີດຂຶ້ນໃນວັນທີ 15 ພະຈິກ 2022 ທີ່ຫ້ອງປະຊຸມພະແນກ ຖວທ ແຂວງ, ໂດຍພາຍໃຕ້ການເປັນປະທານຂອງສະຫາຍ ມະໄລວອນ ສີປະເສີດ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຖວທ ແຂວງ, ໃຫ້ກຽດເຂົ້າຮ່ວມຂອງ ສະຫາຍ ສົມໃຈ ອຸ່ນຈິດ ຄະນະປະຈຳພັກແຂວງຮອງເຈົ້າແຂວງຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ມີຄະນະພັກຮາກຖານ, ຄະນະໜ່ວຍພັກ, ແຂກຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້ ສະຫາຍ ມະໄລວອນ ສີປະເສີດ ໄດ້ກ່າວເປີດກອງປະຊຸມໃນຄັ້ງນີ້ວ່າ: ກອງປະຊຸມຄັ້ງນີ້, ຈັດຂຶ້ນເພື່ອຕີລາຄາ ແລະ ທົບທວນຄືນການຈັດຕັ້ງປະຕິບັດ, ການເຄື່ອນໄຫວວຽກງານໃນໄລຍະກາງສະໄໝຜ່ານມານັບທັງດ້ານຕັ້ງໜ້າ, ດ້ານຫຍໍ້ທໍ້ ແລະ ວາງທິດທາງແຜນການທີ່ຈະສືບຕໍ່ຈັດຕັ້ງຜັນຂະຫຍາຍໃຫ້ໄດ້ຮັບຜົນສຳເລັດ. ຈາກນັ້ນ, ກໍຈະໄດ້ທາບທາມຄວາມໄວ້ວາງໃຈ ຕໍ່ການນໍາພາຂອງຄະນະພັກຮາກຖານ ແລະ ດໍາເນີນການສໍາຫຼວດ, ກວດກາ, ແບ່ງຈຸ, ແບ່ງໜ່ວຍດຳເນີນຊີວິດ.

ກອງປະຊຸມໃນຄັ້ງນີ້, ກໍໄດ້ມີການຜ່ານຮ່າງຕີລາຄາການນໍາພາລວມກາງສະໄໝທີ I ຂອງຄະນະພັກຮາກຖານ ພະແນກ ຖວທ ແຂວງໃນໄລຍະຜ່ານມາ ໄດ້ເອົາໃຈໃສ່ໃນການຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ, ເວົ້າສະເພາະແມ່ນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງຄະນະພັກຮາກຖານໄດ້ມີຜົນສຳເລັດໃນການຊີ້ນຳໆພາການຈັດປະຕິບັດວຽກງານໃນແຕ່ລະດ້ານເປັນຕົ້ນ: ດ້ານການເມືອງແນວຄິດ,ດ້ານການຈັດຕັ້ງ,ແບບແຜນວິທີການນຳພາ ແລະດ້ານການຈັດຕັ້ງປະຕິບັດໜ້າທີ່ການເມືອງໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ການປັບປຸງກໍ່ສ້າງພັກ ແລະກໍ່ສ້າງພະນັກງານ, ຕິດຕາມຊຸກຍູ້ການກໍ່ສ້າງຮາກຖານການເມືອງຕາມທິດສາມສ້າງ, ປະຕິບັດຕາມແນວທາງການຕ່າງປະເທດ ແລະ ຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຢາເສບຕິດ ແລະ ວຽກງານວິຊາສະເພາະກໍໄດ້ຮັບຜົນສຳເລັດເປັນກ້າວໆ. ຈາກນັ້ນ, ກອງປະຊຸມກໍໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດວຽກງານຖະແຫຼງຂ່າວ, ວັດທະນະທຳ ແລະທ່ອງທ່ຽວໃນໄລຍະ ປີ 2020-2022 ແລະ ທິດທາງແຜນການ 2023-2024.
ຂ່າວ-ພາບ: ທິດລານີ ໂຄດໂຍທາ

แชร์