ເຈົ້າແຂວງວຽງຈັນ ເຄື່ອນໄຫວຢ້ຽມຢາມກອງຮ້ອຍຊາຍແດນ 231

ໃນວັນທີ 15 ພະຈິກ 2022 ທ່ານ ຄໍາພັນ ສິດທິດໍາພາ ກໍາມະການສູນກາງພັກເລຂາພັກແຂວງເຈົ້າແຂວງວຽງຈັນພ້ອມດ້ວຍຄະນະສົມທົບກັບອົງການປົກຄອງເມືອງຊະນະຄາມນໍາໂດຍທ່ານ ສະໝານ ວິເສດຍະພົງ ກໍາມະການພັກແຂວງເລຂາພັກເມືອງເຈົ້າເມືອງໄດ້ລົງເຄື່ອນໄຫວຢ້ຽມຢາມກອງຮ້ອຍຊາຍແດນ.

ການເຄື່ອນໄຫວຢ້ຽມຢາມຄັ້ງນີ້, ກໍເພື່ອເປັນການລົງຊຸກຍູ້ການຈັດຕັ້ງປະຕິບັດໜ້າທີ່ວຽກງານຂອງບັນດາສະຫາຍໃນກໍາລັງປະກອບອາວຸດ, ໃຫ້ຍົກສູງຄວາມເປັນເຈົ້າການຕິດຕາມກວດກາ ແລະອອກແຮງເຄື່ອນໄຫວສະກັດກັ້ນບັນດາປະກົດການຫຍໍ້ທໍ້ໃນຂອບເຂດຄວາມຮັບຜິດຊອບຂອງຕົນ, ຕັ້ງໜ້າໃນການປົກປັກຮັກສາຄວາມເປັນລະບຽບຮຽບຮ້ອຍຕາມຊາຍແດນ, ເພື່ອຮັບປະກັນເຮັດສໍາເລັດໜ້າທີ່ການເມືອງທີ່ການຈັດຕັ້ງມອບໝາຍໃຫ້ໃນພາລະກິດປົກປັກຮັກສາ ແລະພັດທະນາປະເທດຊາດໃນໄລຍະໃໝ່.

ໃນໂອກາດນີ້, ຄະນະນໍາຂັ້ນແຂວງໄດ້ນໍາເອົາເຄື່ອງອຸປະໂພກ-ບໍລິໂພກທີ່ຈໍາເປັນຈໍານວນໜຶ່ງມອບໃຫ້ແກ່ກອງຮ້ອຍຊາຍແດນ 231, ເພື່ອສະແດງຄວາມຮູ້ບຸນຄຸນມາຍັງບັນດາພະນັກງານ, ສະມາຊິກພັັກໃນກໍາລັງປະກອບອາວຸດດັ່ງກ່າວທີ່ໄດ້ເສຍສະຫຼະເພື່ອປົກປ້ອງຄວາມເປັນເອກະລາດຂອງຊາດ, ປົກປ້ອງປະຊາທິປະໄຕ ແລະ ເປັນຮົ້ວປ້ອມດ່ານໜ້າໃນການປົກປ້ອງອະທິປະໄຕຂອງປະຊາຊົນລາວບັນດາເຜົ່າ.

ພ້ອມດຽວກັນນີ້, ທ່ານເລຂາພັກແຂວງຍັງໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານໃນການປະຕິບັດໜ້າທີ່ອັນສໍາຄັນ ແລະໄດ້ອວຍພອນໄຊມາຍັງບັນດານັກຮົບ ຈົ່ງມີສຸຂະພາບແຂງແຮງຕັ້ງໜ້າສືບຕໍ່ເຮັດສໍາເລັດໜ້າທີ່ອັນມີກຽດຂອງພັກ ແລະຂອງປະຊາຊົນ,ເອົາໃຈໃສ່ໃນການຮັກສາ-ເສີມຂະຫຍາຍ 3 ທາດແທ້ ແລະ 6 ມູນເຊື້ອອັນສະຫງ່າຂອງກອງທັບປະຊາຊົນລາວ, ຢຶດໝັ້ນເສັ້ນທາງ, ຈຸດໝາຍ ແລະອຸດົມການສັງຄົມນິຍົມຢ່າງທ່ຽງແທ້.
ຂ່າວ-ພາບ: ເມືອງຊະນະຄາມ

แชร์