ສປປ ລາວ - ສປປ ເກົາຫຼີ ລົງນາມບົດບັນທຶກຮ່ວມມືດ້ານວິທະຍາສາດສັງຄົມ

ພິທີເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິທະຍາສາດສັງຄົມລະຫວ່າງສະຖາບັນວິທະຍາສາດເສດຖະກິດ ແລະສັງຄົມ ແຫ່ງຊາດ (ສວສສຊ) ແລະ ສະມາຄົມນັກວິທະຍາສາດສັງຄົມ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ໄດ້ມີຂຶ້ນໃນວັນທີ 15 ພະຈິກນີ້ທີ່ ສວສສຊ, ຕາງໜ້າລົງນາມຝ່າຍ ລາວ ໂດຍ ທ່ານ ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດລາວ, ຕາງໜ້າລົງນາມຝ່າຍສະມາຄົມນັກວິທະຍາສາດສັງຄົມ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ໂດຍທ່ານ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ ໂດຍມີທ່ານ ສອນທະນູ ທໍາມະວົງ ປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດລາວ, ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານນຳ.

ເນື້ອໃນບົດບັນທຶກຄວາມເຂົ້າໃຈດັ່ງກ່າວມີຈຸດປະສົງເພື່ອຊຸກຍູ້ການແລກປ່ຽນຮ່ວມມືໃນຂົງເຂດວິທະຍາສາດສັງຄົມ ແລະມະນຸດວິທະຍາ, ການກໍ່ສ້າງບຸກຄະລາກອນ ແລະ ການຮ່ວມມືກັນຄົ້ນຄວ້າວິທະຍາສາດໃນບັນຫາທີ່ທັງສອງຝ່າຍມີຄວາມສົນໃຈນຳກັນ, ການແລກປ່ຽນຄະນະຜູ້ແທນຢ້ຽມຢາມຊຶ່ງກັນ ແລະກັນ, ການແລກປ່ຽນຂໍ້ມູນຂ່າວສານ ແລະຜົນງານການຄົ້ນຄວ້າດ້ານທິດສະດີວິທະຍາສາດສັງຄົມໃນພາລະກິດສ້າງສາສັງຄົມນິຍົມຂອງທັງສອງຝ່າຍ.
ຂ່າວ-ພາບ: ສຳນານ

แชร์