ຄຳມ່ວນ ສະຫຼຸບການປະຕິບັດແຜນງານພັດທະນາທ້ອງຖິ່ນ

ກອງປະຊຸມສະຫລຸບການຈັດຕັ້ງປະຕິບັດແຜນງານພັດທະນາທ້ອງຖິ່ນ (ລາວ/030) ໄລຍະ 6 ປີ 2017-2022 ຈັດຂຶ້ນໃນວັນທີ 14 ພະຈິກ 2022 ໂດຍມີທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະການລົງທຶນແຂວງຄຳມ່ວນ, ທ່ານ ປີເຕີ ໄກຣ ຫົວໜ້າທີ່ປຶກສາສາກົນປະຈຳແຜນງານ ລາວ/030 ແຂວງຄຳມ່ວນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ອິນແກ້ວ ຈັນທະເທບ ຮອງຫົວໜ້າພະແນກແຜນການ ແລະການລົງທຶນແຂວງຄຳມ່ວນ ໃຫ້ຮູ້ວ່າ: ແຜນງານພັດທະນາທ້ອງຖິ່ນແຂວງຄຳມ່ວນເລີ່ມຈັດຕັ້ງປະຕິບັດໃນປີ 2014 ພາຍໃຕ້ຊື່: ໂຄງການພັດທະນາທ້ອງຖິ່ນແຂວງຄຳມ່ວນ (ລາວ/024) ຊຶ່ງໄດ້ຮັບທຶນຊ່ວຍເຫຼືອລ້າຈາກ ລັດຖະບານລຸກຊຳບວກ ມາຮອດປີ 2017 ໄດ້ມີການຂະຫຍາຍການຊ່ວຍເຫລືອ ອອກເປັນ 4 ແຂວງຄື: ແຂວງບໍ່ແກ້ວ, ວຽງຈັນ, ບໍລິຄໍາໄຊ ແລະ ແຂວງຄໍາມ່ວນ ພ້ອມນັ້ນກໍໄດ້ປ່ຽນຊື່ ມາເປັນ ແຜນງານພັດທະນາທ້ອງຖິ່ນ (ລາວ/030) ຊຶ່ງເປັນແຜນງານສະໜັບສະໜູນດ້ານການຫລຸດຜ່ອນຄວາມຫຍຸ້ງຍາກ. ສະເພາະແຂວງຄຳມ່ວນ ໄດ້ຈັດຕັ້ງປະຕິບັດຢູ່ 3 ເມືອງ ແລະ 59 ບ້ານຄື: ເມືອງມະຫາໄຊ 9 ບ້ານ, ນາກາຍ 8 ບ້ານ ແລະເມືອງບົວລະພາ 42 ບ້ານ, ປະກອບມີ 6.178 ຄອບຄົວ. ໃນນີ້ມີຄອບຄົວທຸກຍາກ 873 ຄອບຄົວ, ຄອບຄົວອະນາຖາ 204 ຄອບຄົວ ແລະ ຄອບຄົວພິການ 144 ຄອບຄົວ, ລວມມີ 30.895 ຄົນ, ຍິງ 14.972 ຄົນ.

ແຜນງານດັ່ງກ່າວ, ແນໃສ່ສ້າງຄວາມເຂັ້ມແຂງ ໃຫ້ແກ່ພະນັກງານຂັ້ນແຂວງ, ເມືອງ ແລະບ້ານ, ຝຶກອົບຮົມວິຊາຊີບໃຫ້ແກ່ເຍົາວະຊົນ ແລະຜູ້ດ້ອຍໂອກາດ, ຍົກສູງຊີວິດການເປັນຢູ່ຂອງປະຊາຊົນໃນເຂດເປົ້າໝາຍ ເພື່ອໃຫ້ພົ້ນອອກຈາກຄວາມທຸກຍາກ, ຊ່ວຍປັບປຸງ ແລະ ພັດທະນາພື້ນຖານໂຄງລ່າງໃນບ້ານເປົ້າໝາຍ ແລະມີເປົ້າໝາຍ ເພື່ອເຮັດໃຫ້ລະດັບຄວາມທຸກຍາກຂອງປະຊາຊົນຫລຸດລົງ, ຫລຸດຜ່ອນອັດຕາຄວາມອຶດຫິວ, ຄວາມເຕ້ຍຕໍ່າ, ຂາດໂພຊະນາການຂອງປະຊາຊົນ ແລະເດັກນ້ອຍຢູ່ເຂດຊົນນະບົດ ຫ່າງໄກສອກຫລີກໂດຍມີກິດຈະກຳທີ່ເລັ່ງໃສ່ປັບປຸງຊີວິດການເປັນຢູ່ຂອງປະຊາຊົນຢູ່ໃນເຂດບ້ານເປົ້າໝາຍເປັນຕົ້ນປຸກສ້າງເຮືອນໃຫ້ແກ່ຄອບຄົວອະນາຖາທີ່ບໍ່ສາມາດເບິ່ງແຍງຕົນເອງໄດ້, ຈັດຊື້ສັດລ້ຽງປະເພດ ໝູ, ແບ້, ງົວ, ຄວາຍ ໃຫ້ຄອບຄົວທີ່ທຸກຍາກ, ເຈາະນໍ້າບາດານ, ສ້າງຫ້ອງການບ້ານ, ຕິດຕັ້ງໂທລະໂຄ່ງ, ຍົກລະດັບເສັ້ນທາງພາຍໃນບ້ານ, ສ້ອມແປງໂຮງຮຽນ, ສ້າງວິດຖ່າຍ ແລະ ອື່ນໆ.
ຂ່າວ: ກອງຄຳ

แชร์