ເຈົ້າແຂວງຄຳມ່ວນ ຕ້ອນຮັບການເຂົ້າພົບປະຂອງທ່ານເອກອັກຄະລັດຖະທູດຝຣັ່ງ ປະຈໍາລາວ

ໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ທ່ານ ນາງ ຊິວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ລາວ ໄດ້ເຂົ້າພົບປະກັບ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໃນວັນທີ 14 ພະຈິກ 2022 ທີ່ຫ້ອງວ່າການແຂວງຄໍາມ່ວນ ເຊິ່ງທ່ານ ນາງ ຊິວ-ແລງ ຊູອອກ ໄດ້ສະເໜີຈຸດປະສົງໃນການເຂົ້າພົບປະຕໍ່ທ່ານເຈົ້າແຂວງຄັ້ງນີ້ ກໍ່ເພື່ອເກັບກຳຂໍ້ມູນໃນດ້ານການພົວພັນຮ່ວມມື ລະຫວ່າງ ສປປ ລາວ ເວົ້າສະເພາະກໍ່ຄືແຂວງຄຳມ່ວນ ກັບປະເທດຝຣັ່ງ ໃນໄລຍະທີ່ຜ່ານມາ ລວມເຖິງສະພາບທາງດ້ານທຳມະຊາດ ແລະ ສິ່ງແວດລ້ອມຂອງແຂວງ ແລະ ດ້ານການຊ່ວຍເຫຼືອ, ການລົງທຶນ ແລະ ອື່ນໆ. ທ່ານເອກອັກຄະລັດຖະທູດຝຣັ່ງ ກ່າວວ່າ: ບໍລິສັດນໍ້າເທີນ 2 ກໍ່ແມ່ນໂຄງການທາງດ້ານພະລັງງານໄຟຟ້າ ຂອງຝຣັ່ງ ທີ່ມາລົງທຶນຢູ່ໃນແຂວງຄຳມ່ວນ ແມ່ນໂຄງໜຶ່ງທີ່ມີປະສິດທິພາບສູງ ແລະ ໃຫ້ຄວາມສຳຄັນທາງດ້ານສິ່ງແວດລ້ອມ, ຊີວະນາໆພັນ ແລະ ພັດທະນາຊີວິດການເປັນຢູ່ຂອງປະຊາຊົນ ເຊິ່ງໃນປະຈຸບັນ ບໍລິສັດດັ່ງກ່າວແມ່ນກຳລັງພັດທະນາໂຄງການພະລັງງານໄຟຟ້າແສງຕາເວັນ ຫຼື ໂຄງການພະລັງງານໄຟຟ້າແບບປະສົມປະສານ NT2-Solar ເຊິ່ງຈະຊ່ວຍເພີ່ມກໍາລັງການຜະລິດໄຟຟ້າທັງໝົດ ຂອງໂຄງການໄຟຟ້ານໍ້າເທີນ 2 ຂຶ້ນອີກ 6%. ເປັນໂຄງສໍາຄັນໃນແງ່ຂອງການປົກປັກຮັກສາສິ່ງແວດລ້ອມ, ຕອບສະໜອງພະລັງງານໄຟຟ້າທີ່ສະອາດ, ປອດໄພ, ຍືນຍົງ. ພ້ອມດຽວກັນ ທ່ານເອກອັກຄະລັດຖະທູດຝຣັ່ງ ຍັງໄດ້ຂອບໃຈມາຍັງການນຳຂອງແຂວງຄຳມ່ວນ ທີ່ໄດ້ເອົາໃຈໃສ່ອຳນວຍຄວາມສະດວກໃນດ້ານຕ່າງໆ ແລະ ຫວັງວ່າແຂວງຄຳມ່ວນຈະສືບຕໍ່ໃຫ້ການຮ່ວມມື ແລະ ເປັນຂົວຕໍ່ທີ່ດີ ກັບ ລັດຖະບານ ເພື່ອອຳນວຍຄວາມສະດວກ ໃຫ້ແກ່ບັນດາໂຄງການຕ່າງໆຂອງຝຣັ່ງໃນອະນາຄົດ.

ໂອກາດນີ້ ທ່ານເຈົ້າແຂວງຄຳມ່ວນ ໄດ້ສະແດງຄວາມຂອບໃຈຕໍ່ທ່ານເອກອັກຄະລັດຖະທູດຝຣັ່ງ ປະຈຳລາວ ທີ່ໄດ້ຖືເອົາແຂວງຄຳມ່ວນ ເປັນແຂວງບູລິມະສິດພິເສດໃນການມາຢ້ຽມຢາມໃນຄັ້ງນີ້. ນອກຈາກໂຄງການລົງທຶນຂອງບໍລິສັດໄຟຟ້ານໍ້າເທີນ 2 ແລ້ວ ກໍ່ຍັງມີຫຼາຍໂຄງການທີ່ຝຣັ່ງ ໄດ້ໃຫ້ການສະໜັບສະໜູນຊ່ວຍເຫຼືອແຂວງຄຳມ່ວນ ໂດຍສະເພາະແມ່ນທາງດ້ານການສຶກສາ, ສາທາລະນະສຸກ, ດ້ານການທ່ອງທ່ຽວ, ຊົນລະປະທານ ແລະ ບັນດາໂຄງການອື່ນໆທີ່ບໍ່ຂຶ້ນກັບລັດຖະບານ ເຊິ່ງບັນດາໂຄງການຕ່າງໆ ແມ່ນໄດ້ປະກອບສ່ວນໃນການພັດທະນາພື້ນຖານໂຄງລ່າງ, ການພັດທະນາທາງດ້ານສິ່ງແວດລ້ອມ ແລະ ການດຳລົງຊີວິດ ແກ້ໄຂຄວາມທຸກຍາກຂອງປະຊາຊົນ ແລະ ຫວັງວ່າໃນຕໍ່ໜ້ານີ້ ປະເທດຝຣັ່ງ ຈະສືບຕໍ່ໃຫ້ການສະໜັັບສະໜູນທາງດ້ານແຫຼ່ງທຶນໃນການພັດທະນາ ວຽກງານໃນດ້ານຕ່າງໆຂອງແຂວງຄຳມ່ວນ ໃຫ້ມີປະສິດທິຜົນສູງຂຶ້ນ. ສຳລັບແຂວງຄຳມ່ວນແມ່ນຍິນດີໃຫ້ການຮ່ວມມື ແລະ ອຳນວຍຄວາມສະດວກໃນດ້ານຕ່າງໆ ເພື່ອແນໃສ່ເພີ່ມທະວີການພົວພັນຮ່ວມມື ລາວ-ຝຣັ່ງ ໃຫ້ມີຄວາມຮັດແໜ້ນຍິ່ງຂຶ້ນ. ໂອກາດນີ້ ຍັງໄດ້ມີຄຳເຫັນ ປຶກສາຫາລືໃນການສ້າງເງື່ອນໄຂສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຝຣັ່ງ ຄົບຮອບ 70 ປີ ໃນຕໍ່ໜ້າ ໃຫ້ມີຂະບວນການຟົດຟື້ນ.

แชร์