ຫຼາຍພາກສ່ວນຮ່ວມຊ່ວຍເຫຼືອຕ້ານໄພໜາວຢູ່ 2 ເມືອງ ແຂວງຫົວພັນ

ກະຊວງສຶກສາທິການ ແລະກິລາ (ສສກ), ສູນກາງແນວລາວສ້າງຊາດ, ສະຫະພັນກິລາແລ່ນ-ລານຄົນພິການແຫ່ງຊາດ, ຈິດອາສາສະມາຄົມມັງກອນທອງ ແລະ ຄອບຄົວ ຢາທໍ່ຕູ້ ໄດ້ເດີນທາງນໍາເຄື່ອງໄປຊ່ວຍເຫຼືອຕ້ານໄພໜາວຢູ່ 2 ເມືອງຂອງແຂວງຫົວພັນ ຄື: ເມືອງແອດ ແລະເມືອງຫົວເມືອງ ໃນລະຫວ່າງວັນທີ 10-11 ພະຈິກຜ່ານມາ, ນຳໂດຍ ທ່ານ ນາງ ແສງເດືອນ ຫຼ້າຈັນທະບູນ ອະດີດກໍາມະການສູນກາງພັກ, ອະດີດລັດຖະມົນຕີກະຊວງ ສສກ, ຮອງປະທານແນວລາວສ້າງຊາດ, ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງ ສສກ, ທ່ານ ວັດທະນາໄຊ ລາດສະວົງສິງ ປະທານສະຫະພັນກິລາແລ່ນ-ລານຄົນພິການແຫ່ງຊາດ, ຊຶ່ງໃຫ້ການຕ້ອນຮັບຂອງທ່ານ ມົນທອງ ລຽນຕິຄຸນ ກຳມະການພັກແຂວງຫົວໜ້າພະແນກສຶກສາທິການ ແລະກິລາ ແຂວງຫົວພັນ, ພ້ອມດ້ວຍຄະນະ,ເຈົ້າເມືອງ-ຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະກິລາ 2 ເມືອງ, ຄະນະອຳນວຍການໂຮງຮຽນ ແລະນ້ອງນັກຮຽນພາຍໃນເມືອງແອດ ແລະເມືອງຫົວເມືອງ.

ສະເພາະເຄື່ອງທີ່ນຳມາມອບໃນຄັ້ງນີ້, ປະກອບມີອຸປະກອນການສຶກສາ, ອຸປະກອນກິລາ, ເຄື່ອງນຸ່ງຫົ່ມ, ອາຫານແຫ້ງ ເປັນຕົ້ນແມ່ນໝີ່, ປ່ອງປາ, ເຂົ້າໜົມ, ເກີບ, ຖົງມື, ຖົງຕີນ ແລະເຄື່ອງໃຊ້ອຸປະໂພກທີ່ຈຳເປັນຕ່າງໆ.

ການນໍາເຄື່ອງໄປຊ່ວຍເຫຼືອໃນຄັ້ງນີ້, ແມ່ນເພື່ອປະກອບສ່ວນຊ່ວຍເຫຼືອພໍ່ແມ່ພີ່ນ້ອງ ແລະນັກຮຽນທຸກຍາກຂາດເຂີນ, ຖືກໄພພິບັດທາງທໍາມະຊາດຢູ່ແຂວງຫົວພັນ ເປັນຕົ້ນແມ່ນ ບັນດາໂຮງຮຽນ ແລະ ກຸ່ມບ້ານຢູ່ເມືອງແອດ ແລະເມືອງຫົວເມືອງ, ຊຶ່ງເຄື່ອງດັ່ງກ່າວນີ້ ແມ່ນເປັນການລະດົມທຶນຂອງສະຫະພັນກິລາແລ່ນ-ລານຄົນພິການແຫ່ງຊາດລາ, ຈິດອາສາສະມາຄົມມັງກອນທອງ, ຄອບຄົວ ຢາທໍ່ຕູ້, ສູນກາງແນວລາວສ້າງຊາດ ແລະ ກະຊວງສຶກສາທິການ ແລະກິລາ.

ນອກຈາກນັ້ນ, ທ່ານເຈົ້າເມືອງແອດ ແລະເມືອງຫົວເມືອງ ໄດ້ມອບໃບຍ້ອງຍໍຂັ້ນເມືອງ (2 ເມືອງ) ໃຫ້ທີມງານຜູ້ນຳເຄື່ອງໄປມອບໃນຄັ້ງນີ້ຢ່າງສົມກຽດ.
(ໂດຍ ສີສົມສັກ)

แชร์