ເຈົ້າແຂວງເຊກອງ ຕ້ອນຮັບທູດອິນເດຍ ປະຈໍາລາວ

ໃນວັນທີ 14 ພະຈິກ 2022 ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ຕ້ອນຮັບທ່ານ ດິງກາ ອັດຕະນາ ເອກຄັກຄະລັດຖະທູດວິສາມັນຜູ້ມີອໍານາດເຕັມແຫ່ງ ອິນເດຍ ປະຈໍາລາວ ພ້ອມຄະນະໃນໂອກາດມາຢ້ຽມຢາມ ແລະເຮັດວຽກຢູ່ແຂວງເຊກອງ.

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ການມາຢ້ຽມຢາມແຂວງເຊກອງໃນຄັ້ງນີ້ຊຶ່ງເປັນຄັ້ງທໍາອິດຂອງທ່ານທູດອິນເດຍ ປະຈໍາລາວ,ພ້ອມທັງຕີລາຄາສູງຕໍ່ການພົວພັນຮ່ວມມື, ການຊ່ວຍເຫລືອຂອງປະເທດອິນເດຍຕໍ່ ສປປ ລາວ ໃນໄລຍະຜ່ານມາໂດຍສະເພາະແມ່ນການຊ່ວຍເຫລືອແຂວງເຊກອງ ເປັນຕົ້ນໂຄງການກໍ່ສ້າງໂຮງຮຽນມັດທະຍົມສົມບູນເມືອງກະລຶມຊຶ່ງເປັນການປະກອບສ່ວນສໍາຄັນເຂົ້າໃນການພັດທະນາວຽກງານການສຶກສາຂອງແຂວງໃຫ້ດີຂຶ້ນເປັນກ້າວໆ. ພ້ອມນີ້, ທ່ານເຈົ້າແຂວງຍັງໄດ້ຍົກໃຫ້ເຫັນສະພາບທີ່ຕັ້ງ, ຈຸດພິເສດ, ທ່າແຮງບົ່ມຊ້ອນ, ການພັດທະນາພື້ນຖານໂຄງລ່າງເສດຖະກິດ-ສັງຄົມ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ.

ພ້ອມນີ້, ທ່ານທູດອິນເດຍ ປະຈໍາລາວ ກໍໄດ້ຍົກໃຫ້ເຫັນເຖິງຈຸດປະສົງຂອງການມາຢ້ຽມຢາມແຂວງເຊກອງໃນຄັ້ງນີ້ເພື່ອເຂົ້າຮ່ວມພິທີວາງສີລາລຶກໂຄງການກໍ່ສ້າງໂຮງຮຽນມັດທະຍົມສົມບູນກະລຶມ ເມືອງກະລຶມ ແຂວງເຊກອງ ຊຶ່ງເປັນໂຄງການທີ່ລັດຖະບານສາທາລະນະລັດອິນເດຍໃຫ້ການຊ່ວຍເຫລືອພາຍໃຕ້ຂອບການຮ່ວມມືລະຫວ່າງ ແມ່ນໍ້າຂອງ-ແມ່ນໍ້າຄົງຄາ. ພ້ອມນີ້ທ່ານທູດອິນເດຍຍັງຍິນດີໃຫ້ການຊ່ວຍເຫຼືອກໍ່ສ້າງສຸກສາລາແກ່ແຂວງເຊກອງເພື່ອຂະຫຍາຍຕາໜ່າງສາທາລະນະສຸກ ໃຫ້ປະຊາຊົນບັນດາເຜົ່າເຂົ້າເຖິງການບໍລິການຮັກສາສຸຂະພາບຫລາຍຂຶ້ນ.

• 15/11/2022