ທັບນັກກິລາ ນະຄອນຫຼວງ 663 ຄົນ ກາບໄຫວ້ສິ່ງສັກສິດຂໍພອນກ່ອນຮ່ວມ “ຊຽງຂວາງ ເກມ”

ຄະນະນຳ, ຄູຝຶກ ແລະນັກກິລານະຄອນຫຼວງວຽງຈັນ ຈຳນວນ 663 ຄົນ ຈາກ 25 ປະເພດກິລາ ຊຸດກຽມເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ 11 ຫຼື “ຊຽງຂວາງ ເກມ” ທີ່ແຂວງຊຽງຂວາງ ຈະຈັດຂຶ້ນໃນລະຫວ່າງວັນທີ 13-22 ທັນວາ 2022 ໄດ້ເຄື່ອນໄຫວກາບໄຫວ້ສິ່ງສັກສິດ 4 ແຫ່ງ ໃນນະຄອນຫຼວງວຽງຈັນ ເມື່ອວັນທີ 11 ພະຈິກຜ່ານມາ ນຳໂດຍທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະກິລາ ນະຄອນຫຼວງວຽງຈັນ.

ສຳລັບການເຄື່ອນໄຫວກາບໄຫວ້ສະຖານທີ່ສິ່ງສັກສິດ 4 ແຫ່ງໃນຄັ້ງນີ້ ປະກອບມີ ອານຸສາວະລີ ເຈົ້າຟ້າງຸ່ມ, ວັດສີເມືອງ, ພຣະເຈົ້າໄຊເຊດຖາ ແລະພິພິຕະພັນປະທານ ໄກສອນ ພົມວິຫານ ເພື່ອຂໍພອນໃຫ້ມີໂຊກມີໄຊ ແລະປະສົບຜົນສຳເລັດຕາມເປົ້າໝາຍທີ່ຕັ້ງໄວ້. ສ່ວນການແຂ່ງຂັນກິລາ “ຊຽງຂວາງ ເກມ” ໃນຄັ້ງນີ້ແມ່ນມີການຊີງໄຊກັນທັງໝົດ 25 ປະເພດກິລາ ມີ 22 ພາກສ່ວນ, ໃນນັ້ນ ມີ 17 ແຂວງ, 1 ນະຄອນຫຼວງວຽງຈັນ ແລະ 4 ກະຊວງກໍຄືກະຊວງປ້ອງກັນປະເທດເຈົ້າຂອງເຈົ້າຫຼຽນຄຳ ອຸດົມໄຊ ເກມ 2014, ກະຊວງປ້ອງກັນຄວາມສະຫງົບ, ກະຊວງສາທາລະນະສຸກ ແລະກະຊວງພະລັງງານ ແລະບໍ່ແຮ່ງານດັ່ງກ່າວຈະເລີ່ມດຳເນີນແຂ່ງຂັນກ່ອນບາງປະເພດກິລາ ກໍຄື ກິລາຍິງປືນ ເລີ່ມແຂ່ງຂັນໃນວັນທີ 14 ພະຈິກ 2022 ສະໜາມກິລາຍິງປືນ 5 ເມສາ ນະຄອນຫຼວງວຽງຈັນ ສະເພາະຍິງປືນຈະຈັດຂຶ້ນທີ່ສະໜາມກິລາຍິງປືນ 5 ເມສາ ເຂດບ້ານສົມສະຫງ່າ ແລະກິລາລອຍນໍ້າຈະຈັດຂຶ້ນທີ່ສະໜາມກິລາແຫ່ງຊາດ (ຫຼັກ16).

ສ່ວນທັບນັກກິລາ ນະຄອນຫຼວງວຽງຈັນ ຈະເຂົ້າຮ່ວມ ຊຽງຂວາງ ເກມ ຈຳນວນ 663 ຄົນ ໃນຄັ້ງນີ້ປະກອບມີຄະນະນຳພານັກກິລາ 14 ທ່ານ, ຄະນະຮັບຜິດຊອບນຳພານັກກິລາ 82 ທ່ານ, ປະທານສະຫະພັນກິລາ 25 ທ່ານ, ຄະນະຮັບຜິດຊອບລະດົມທຶນ 80 ທ່ານ, ຄູຝຶກ 97 ທ່ານ ແລະນັກກິລາຊາຍ ມີ 212 ຄົນ ແລະ ນັກກິລາຍິງ 155 ຄົນ.
ໂດຍ: ສົງການ ພັນແພງດີ.

แชร์