ສາລະວັນ ປະຕິບັດໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ 41 ໂຄງການຍ່ອຍ

ໃນວັນທີ 11 ພະຈິກ ຜ່ານມາ, ແຂວງສາລະວັນ ຈັດກອງປະຊຸມ ຜ່ານຮ່າງບົດສຶກສາເບື້ອງຕົ້ນກ່ຽວກັບຜົນກະທົບຕໍ່ກັບສິ່ງແວດລ້ອມໂຄງການສົ່ງເສີມລະບົບຕ່ອງໂສ້ການຜະລິດກະສິກໍາເປັນສິນຄ້າທີ່ເປັນມິດຕໍ່ສິ່ງແວດລ້ອມເພື່ອທົບທວນ, ປະເມີນການສຶກສາເບື້ອງຕົ້ນກ່ຽວກັບຜົນກະທົບ ແລະ ປຶກສາຫາລື, ຄົ້ນຄວ້າປະກອບຄຳຄິດເຫັນລະຫວ່າງອໍານາດການປົກຄອງບ້ານ ແລະພາກສ່ວນຕ່າງໆ ຕີລາຄາດ້ານດີ, ຂໍ້ສະດວກຂໍ້ຫຍຸ້ງຍາກໃນການຈັດຕັ້ງປະຕິບັດ.

ທ່ານ ນາງ ພິມມະສອນ ໄຊມົນຕຣີ ຜູ້ບໍລິຫານ-ຈັດການ ໂຄງ ການສົ່ງເສີມ ລະບົບຕ່ອງໂສ້ການຜະລິດກະສິກໍາເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ຂັ້ນສູນກາງ ໃຫ້ວ່າ: ໂຄງການດັ່ງກ່າວ ເລັ່ງໃສ່ການຊຸກຍູ້, ສົ່ງເສີມດ້ານການຜະລິດກະສິກຳເປັນສິນຄ້າຂອງປະຊາຊົນ ໃຫ້ໄດ້ຮັບການປັບປຸງ, ມີຜົນຜະລິດເພີ່ມຂຶ້ນ ສ້າງມູນຄ່າເພີ່ມໃຫ້ແກ່ຜົນຜະລິດ, ໂຄງລ່າງພື້ນຖານມີຄວາມທົນທານຕໍ່ສະພາບແວດລ້ອມ, ພື້ນຖານເສດຖະກິດ ແລະ ຊີວິດການເປັນຢູ່ຂອງປະຊາຊົນໃນເຂດຊົນນະບົດມີການປັບປຸງດີຂຶ້ນກວ່າເກົ່າ, ເປັນຕ່ອງໂສ້ຄຽງຄູ່ກັນໄປ ລະຫວ່າງການຜະລິດກະສິກຳ ກັບທຸລະກິດກະສິກຳໂດຍສະເພາະໄດ້ດຳເນີນຕາມ 3 ເປົ້າໝາຍໃຫຍ່ຄື: ປັບປຸງພື້ນຖານໂຄງລ່າງດ້ານກະສິກຳ ໃຫ້ມີຄວາມທົນທານ ຕໍ່ກັບສະພາບອາກາດ, ສົ່ງເສີມນະວັດຕະກຳກະສິກຳ ແລະທຸລະກິດກະສິກຳທີ່ເປັນມິດຕໍ່ສິ່ງແວດລ້ອມ, ສ້າງສະພາບແວດລ້ອມໃຫ້ເອື້ອອໍານວຍ, ຍົກລະດັບທາງດ້ານທຸລະກິດ ແລະ ການຜະລິດ ເປັນສິນຄ້າ. ໂຄງການນີ້ ໄດ້ປະຕິບັດມາແຕ່ປີ 2018 ແລະ ຈະສືບຕໍ່ດຳເນີນໄປຮອດປີ 2026 ມີມູນຄ່າທັງໝົດ 47.370.000 ໂດລາສະຫະລັດ ໃນນັ້ນ, ທຶນຊ່ວຍເຫລືອລ້າຈາກ ທະນາຄານພັດທະນາອາຊີ (ADB) ຈຳນວນ 40.500.000 ໂດລາສະຫະລັດ, ທຶນສົມທົບພາກສ່ວນທຸລະກິດ, ຜູ້ປະກອບ ແລະ ຊາວກະສິກອນ ຈໍານວນ 5 ລ້ານກວ່າໂດລາສະຫະລັດ ແລະ ທຶນລັດຖະບານ 7 ແສນກວ່າໂດລາສະຫະລັດ ໂດຍໄດ້ສະໜອງທຶນປະຕິບັດຢູ່ 5 ແຂວງ, 1 ນະຄອນຫລວງ, ຈໍານວນ 19 ຕົວເມືອງ ໃນທົ່ວປະເທດ.

ສຳລັບແຂວງສາລະວັນ ໄດ້ປະຕິບັດຢູ່ 3 ເມືອງ ຈຳນວນ 31 ບ້ານ ຄື: ເມືອງສາລະວັນ 12 ບ້ານ, ເມືອງວາປີ 10 ບ້ານ ແລະ ເມືອງເລົ່າງາມ 9 ບ້ານ. ມາຮອດປັດຈຸບັນ, ສາມາດປະຕິບັດໂຄງການຍ່ອຍໄດ້ທັງໝົດ 41 ໂຄງການນອນຢູ່ໃນ 22 ບ້ານ ຄື: ປັບປຸງ ລະບົບຊົນລະປະທານ 2 ໂຄງການ, ປັບປຸງເສັ້ນທາງເຂົ້າເຂດການຜະລິດ 4 ໂຄງການ, ໜອງກັກເກັບນໍ້າ 30 ໜອງ ແລະ ສູນພັດທະນາກະສິກຳ 2 ໂຄງການ ໂດຍໄດ້ເຮັດໃຫ້ກຸ່ມຜະລິດກະສິກຳເປັນສິນຄ້າມີຄວາມເຂັ້ມແຂງ, ໄດ້ຮຽນເຕັກນິກວິທິການປູກ, ການບົວລະບັດຮັກສາ, ການກຳຈັດສັດຕູພຶດ ແລະສ້າງຕ່ອງໂສ້ການຜະລິດເປັນສິນຄ້າ, ທັງສ້າງເງື່ອນໄຂອໍານວຍຄວາມສະດວກໃຫ້ກັນ, ເຊື່ອມໂຍງກັນລະຫວ່າງຜູ້ຜະລິດ, ຜູ້ປະກອບການດ້ານອື່ນໆ.
ຂ່າວ-ພາບ: ວິໄລວອນ ສິດທິໄຊ

แชร์