ກຽມຈັດງານເທສະການສາຍສໍາພັນ ຝຣັ່ງ-ລາວ

ໃນທ້າຍອາທິດຜ່ານມານີ້, ສະຖານທູດຝຣັ່ງ ໄດ້ຈັດພິທີຖະແຫຼງຂ່າວກຽມຈັດງານເທສະການເພື່ອສະເຫຼີມສະຫຼອງການແລກປ່ຽນສາຍສໍາພັນລະຫວ່າງປະເທດ ຝຣັ່ງ-ລາວ ຊຶ່ງຈະມີຂຶ້ນໃນວັນທີ 18 ພະຈິກ 2022 ທີ່ຫໍວັດທະນະທໍາແຫ່ງຊາດ, ນະຄອນຫລວງວຽງຈັນ.

ໂອກາດນີ້ ທ່ານ ນາງ ຊີວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈໍາລາວ ໄດ້ກ່າວວ່າ: ງານເທ ສະການ ຝຣັ່ງ-ລາວ 2022 ຈັດຂຶ້ນເພື່ອສະແດງເຫັນເຖິງຄວາມອຸດົມສົມບູນຂອງ ການສ້າງສັນທາງດ້ານວັດທະນະທໍາ ແລະ ຄວາມລໍ້າຄ່າຂອງການແລກປ່ຽນ ລະຫວ່າງ ວັດທະນະທໍາ. ງານນີ້ຈະມີຫລາຍກິດຈະກໍາທີ່ໄດ້ຄັດເລືອກມາສະແດງເຊັ່ນ: ລາຍການດົນຕີຄລາສສິກ, ປ໊ອບຣັອກ, ດົນຕີພື້ນບ້ານນາໆຊາດ, ຮູບເງົາ, ລະຄອນຫຸ່ນ, ລະຄອນເວທີ, ສິລະປະ, ທັງໝົດປະເພດສິລະປະທີ່ຮ່ວມເຂົ້າກັນ ແລະພົບປະຊຶ່ງສະແດງໂດຍນັກສິລະປິນນັກເປຍໂນທີ່ມີຊື່ສຽງລະດັບໂລກ Maxime Zecchini ແລະ David Bismuth ຈະຮ່ວມສະແດງເທິງເວທີກັບວົງ Vientiane Chamber Orchestra, ນັກຮ້ອງໄວໜຸ່ມ Sun ຈະຕອບໂຈດຄໍາເວົ້າຂອງ Blackeyes ແລະ NU innovation. ພ້ອມນັ້ນ ກໍຍັງມີນັກສຶກສາສະຖາບັນວິຈິດສິນແຫ່ງຊາດ ຈະມາຮ່ວມສະແດງລະນຶກເຖິງຕໍ່ກັບ Marc Leguay ແລະ ຂາດບໍ່ໄດ້ Thiane Khamvongsa ລະນຶກເຖິງຕໍ່ກັບ Molière; ຂະນະດຽວກັນ ກໍເປັນການລະລຶກເຖິງຜົນງານຂອງນັກສະແດງ ແລະນັກຂຽນລະຄອນຊາວ ຝຣັ່ງທີ່ມີຊື່ສຽງ, ເກີດເມື່ອ 400 ປີກ່ອນ, ທີ່ເຫັນໄດ້ໃນການສະແດງລະຄອນເວທີ ແລະການສະແດງຕະຫລົກເປັນວິທີການເຂົ້າເຖິງການສຶກສາສໍາລັບທຸກຄົນ.

ງານເທສະການ ຝຣັ່ງ-ລາວ ຍັງເປັນງານສໍາລັບການພົບປະແລກປ່ຽນ, ການຮຽນຮູ້, ແຮງບັນດານໃຈທີ່ຊ່ວຍໃຫ້ບັນດານັກສິລະປິນແບ່ງປັນວິໄສທັດມູມມອງກ່ຽວກັບການເບິ່ງໂລກຂອງພວກເຂົາ. ງານດັ່ງກ່າວກໍຈະມີການຮ່ວມມືລະຫວ່າງ Lao Fashion Week,ໂຮງຮຽນ ESMOD ເປັນໂຮງຮຽນທີ່ມີຊື່ສຽງຂອງຝຣັ່ງ ແລະສະຖານທູດຝຣັ່ງ ປະຈໍາລາວ ເຊິ່ງໃນແຕ່ລະປີຈະເປັນການເປີດໂອກາດໃຫ້ກັບບັນດານັກອອກແບບຄົນລາວໄດ້ໄປຝຶກອົບຮົມໃນໂຄງການທີ່ດີເລີດທີ່ປະເທດຝຣັ່ງ.
ຂ່າວ, ພາບ:ຂັນໄຊ

แชร์