ບໍລິສັດ ພູເບ້ຍ ມາຍນິງ ໄດ້ຈັດການຝຶກອົບຮົມດ້ານຄວາມປອດໄພໃຫ້ພະນັກງານໄຟຟ້າລາວ

ໃນເດືອນຜ່ານມານີ້,ບໍລິສັດ ພູເບ້ຍ ມາຍນິງ ໄດ້ແບ່ງປັນວິທີການປະຕິບັດດ້ານຄວາມປອດໄພທີ່ປາດສະຈາກການບາດເຈັບ (ເປັນສູນ) ກັບພະນັກງານຊ່າງໄຟຟ້າຈາກລັດວິສາຫະກິດໄຟຟ້າລາວ (EDL) ຂອງລັດຖະບານ ຈໍານວນ 4 ທ່ານ.

ຄວາມມຸ້ງໝັ້ນຂອງບໍລິສັດ ພູເບ້ຍ ມາຍນິງ ຕໍ່ສຸຂະພາບ ແລະຄວາມປອດໄພແມ່ນເປັນຮາກຖານສໍາຄັນຕໍ່ວິທີການດໍາເນີນທຸລະກິດຂອງບໍລິສັດ. ບໍລິສັດ ເຮັດໃຫ້ຄວາມປອດໄພ ແລະສະຫວັດດິພາບຂອງພະນັກງານ, ບໍລິສັດຜູ້ຮັບເໝົາ ແລະບັນດາຊຸມຊົນ ເປັນເປົ້າໝາຍອັນດັບໜຶ່ງຂອງບໍລິສັດ. ເປັນສະຖານທີ່ເຮັດວຽກທີ່ທຸກຄົນກັບບ້ານດ້ວຍຄວາມປອດໄພ ແລະມີສຸຂະພາບແຂງແຮງທຸກໆມື້.

ການຝຶກອົບຮົມເປັນເວລາໜຶ່ງມື້ຊຶ່ງສູມໃສ່ເລື້ອງສຸຂະພາບ, ຄວາມປອດໄພ ແລະສະຫວັດດີພາບໄດ້ຈັດຂຶ້ນຢູ່ທີ່ສູນຝຶກອົບຮົມ ແລະພັດທະນາຢູ່ໂຄງການຂຸດຄົ້ນ-ປຸງແຕ່ງທອງ-ຄໍາ ພູຄໍາ ຂອງບໍລິສັດໃນແຂວງໄຊສົມບູນ. ໃນລະຫວ່າງການຝຶກອົບຮົມ, ຕົວແທນຂອງບໍລິສັດໄດ້ອະທິບາຍລັກສະນະການດໍາເນີນງານຂອງບໍລິສັດ, ຊຶ່ງເປັນການເຮັດວຽກຢູ່ໃນສະພາບແວດລ້ອມການຂຸດຄົ້ນ, ສາມາດເຮັດໃຫ້ພະນັກງານໄດ້ຮັບອັນຕະລາຍ ແລະ ຄວາມສ່ຽງຫຼາຍຢ່າງ. ເພື່ອຫຼຸດຜ່ອນສິ່ງເຫຼົ່ານີ້, ບໍລິສັດໄດ້ມີມາດຕະຖານ ແລະຂັ້ນຕອນດ້ານຄວາມປອດໄພທີ່ເຂັ້ມງວດທີ່ພະນັກງານ ແລະບໍລິສັດຜູ້ຮັບເໝົາຕ້ອງປະຕິບັດຕາມເພື່ອຮັບປະກັນຄວາມປອດໄພຂອງໝົດທຸກຄົນໃນຂະນະປະຕິບັດໜ້າທີ່ວຽກງານ.

ກ່ອນເລີ້ມປະຕິບັດໜ້າວຽກໃດໜຶ່ງນັ້ນ, ພະນັກງານຂອງບໍລິສັດ ພູເບ້ຍມາຍນິງ ຕ້ອງປະຕິບັດຕາມລະບຽບຂັ້ນຕອນການເຮັດວຽກທີ່ປອດໄພຊຶ່ງຖືກກໍານົດໄວ້ເພື່ອລະບຸຄວາມອັນຕະລາຍຕໍ່ສຸຂະພາບ ແລະຄວາມປອດໄພ.ໃນນີ້ລວມມີ ການເຮັດ ‘ເທກ 5’ ແລະກົດລະບຽບດ້ານຄວາມປອດໄພຂອງບໍລິສັດ-ແມ່ນການກວດກາດ້ານຄວາມປອດໄພເປັນຂັ້ນຕອນຊຶ່ງໃຊ້ເວລາ 5 ນາທີ ແລະເປັນກົດລະບຽບ 8 ຂໍ້ ທີ່ຊ່ວຍໃຫ້ພະນັກງານບາງຄົນສາມາດລະບຸຄວາມອັນຕະລາຍທີ່ອາດພາໃຫ້ເກີດການບາດເຈັບທີ່ຮ້າຍແຮງ ຫຼືເຖິງຂັ້ນເສຍຊີວິດໄດ້.

ນອກຈາກນັ້ນ, ພະນັກງານຂອງໄຟຟ້າລາວຍັງໄດ້ຮັບການແນະນໍາໂດຍຜ່ານລະບຽບຂັ້ນຕອນການເຮັດວຽກທີ່ປອດໄພອື່ນໆ ກ່ຽວກັບວິທີການຄຸ້ມຄອງຄວາມສ່ຽງໃນສະຖານທີ່ເຮັດວຽກ, ການຕັດແຍກວົງຈອນໄຟຟ້າ ແລະການເຮັດວຽກຢູ່ບ່ອນສູງ. ພະນັກງານຈາກພະແນກບໍາລຸງຮັກສາພື້ນຖານໂຄງລ່າງ ແລະເສັ້ນທາງຂອງບໍລິສັດ ໄດ້ສາທິດວິທີບໍາລຸງຮັກສາ ແລະເຮັດໃຫ້ລະບົບໄຟຟ້າມີຄວາມປອດໄພຊຶ່ງຊ່ວຍໃຫ້ຜູ້ເຂົ້າຮ່ວມໄດ້ຮັບປະສົບການຕົວຈິງ.

ປະທານບໍລິສັດ ພູເບ້ຍ ມາຍນິງ, ທ່ານ ຈັນເພັງ ບຸນນະຜົນ ໄດ້ກ່າວເຖິງຄວາມສໍາຄັນຂອງຄວາມປອດໄພຢູ່ສະຖານທີ່ເຮັດວຽກ ແລະການສະໜັບສະໜູນຂອງບໍລິສັດ ເພື່ອຝຶກອົບຮົມພະນັກງານລັດວິສາຫະກິດຂອງລັດຖະບານດ້ວຍມາດຕະຖານຄວາມປອດໄພລະດັບໂລກ.

ທ່ານ ຈັນເພັງ ກ່າວວ່າ:“ຢູ່ບໍລິສັດ ພູເບ້ຍ ມາຍນິງ,ການຈັດຝຶກອົບຮົມດ້ານຄວາມປອດໄພໃຫ້ພະນັກງານຂອງພວກເຮົາ ແລະບໍລິສັດຜູ້ຮັບເໝົາໝົດທຸກຄົນເພື່ອຮັບປະກັນວ່າທຸກຄົນໄດ້ກັບບ້ານຢ່າງປອດໄພແມ່ນເປັນບູລິມະສິດທີ່ສໍາຄັນ.”

“ໃນຖານະທີ່ເປັນບໍລິສັດໃຫຍ່ຢູ່ໃນລາວ, ພວກເຮົາມຸ້ງໝັ້ນໃນການແບ່ງປັນແນວຄວາມຄິດຫຼັກດ້ານຄວາມປອດໄພນອກເໜືອການດໍາເນີນງານຂອງພວກເຮົາ. ພວກເຮົາມີຄວາມຍິນດີທີ່ຈະແບ່ງປັນວິທີການປະຕິບັດດ້ານຄວາມປອດໄພກັບພະນັກງານໄຟຟ້າລາວ. ປັດຈຸບັນພວກເຂົາໄດ້ຮັບຄວາມຮູ້ດ້ານຄວາມປອດໄພທີ່ສໍາຄັນເພື່ອແບ່ງປັນກັບເພື່ອນຮ່ວມງານ ແລະຊ່ວຍສືບຕໍ່ຮັກສາວິທີການປະຕິບັດທີ່ປອດໄພໃນສະຖານທີ່ເຮັດວຽກຂອງພວກເຂົາ.”

แชร์