ກອງປະຊຸມວຽກງານສ້າງພະນັກງານນໍາພາ-ຄຸ້ມຄອງ ເພດຍິງ

ກອງປະຊຸມປຶກສາຫາລືກ່ຽວກັບວຽກງານສ້າງພະນັກງານນໍາພາ-ຄຸ້ມຄອງ ເພດຍິງ ຄັ້ງທີ III ຈັດຂຶ້ນໃນວັນທີ 14 ພະຈິກນີ້ ທີ່ສູນຝຶກອົບຮົມ ແລະ ການຮ່ວມມືສາກົນ (ICTC) ໂດຍການເປັນປະທານຂອງທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີບັນດາຮອງເລຂາຄະນະພັກ, ຜູ້ຊີ້ນຳວຽກງານພັກ-ພະນັກງານ, ຄະນະບໍລິຫານງານສູນກາງສະຫະພັນແມ່ຍິງລາວ, ຮອງປະທານສະຫະພັນແມ່ຍິງກະຊວງ-ອົງການ, ແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ໄດ້ຜ່ານບົດສະຫຼຸບ ແລະປະກອບຄໍາເຫັນຕໍ່ຮ່າງບົດສະຫຼຸບກ່ຽວກັບວຽກງານສ້າງພະນັກງານນໍາພາ-ຄຸ້ມຄອງເພດຍິງໃນໄລຍະ 2018-2022 ແລະ ທິດທາງວຽກງານຈຸດສຸມແຕ່ 2023-2025; ຮັບຟັງການນຳສະເໜີບົດຮຽນກ່ຽວກັບວຽກງານຕິດພັນກັບການສົ່ງເສີມພະນັກງານເພດຍິງເຂົ້າໃນຕຳແໜ່ງນຳພາ-ຄຸ້ມຄອງ ຈາກຄະນະຈັດຕັ້ງສູນກາງພັກ ແລະ ວຽກງານຄຸ້ມຄອງລັດຖະກອນ ແລະ ລັດຖະກອນເພດຍິງ ຈາກກະຊວງພາຍໃນ, ການປະກອບຄວາມເຫັນຂອງບາງພາກສ່ວນເປັນຕົ້ນ: ບົດຄົ້ນຄວ້າວິທະຍາສາດ “ແນວຄິດ ໄກສອນ ພົມວິຫານ ກ່ຽວກັບວຽກງານແມ່ຍິງ” ຂອງສະຖາບັນການເມືອງ-ການປົກຄອງແຫ່ງຊາດ; ຜົນສຳເລັດໃນການບໍາລຸງກໍ່ສ້າງ ແລະ ການບັນຈຸພະນັກງານເພດຍິງຂອງຄະນະພັກນະຄອນຫຼວງວຽງຈັນ ໃນຄວາມຮັບຜິດຊອບຂອງອົງຄະນະພັກນະຄອນຫຼວງວຽງຈັນ ແລະ ຄວາມຫຍຸ້ງຍາກ ແລະ ສິ່ງທ້າທາຍໃນການບໍາລຸງກໍ່ສ້າງ ແລະ ບັນຈຸສັບຊ້ອນພະນັກງານເພດຍິງ ໃນຄວາມຮັບຜິດຊອບຂອງອົງຄະນະພັກແຂວງໄຊສົມບູນ; ໄປຄຽງຄູ່ກັນນັ້ນ, ຜູ້ແທນກອງປະຊຸມທຸກທ່ານຈະໄດ້ພ້ອມກັນຄົ້ນຄວ້າ, ປຶກສາຫາລືຊອກວິທີແກ້ໄຂໂດຍສະເພາະລົງເລິກຄົ້ນຄວ້າຕື່ມເຖິງໜ້າທີ່ຄວາມຮັບຜິດຊອບຂອງແຕ່ລະພາກສ່ວນ, ຂອດປະສານງານ ກ່ຽວກັບວຽກງານສ້າງພະນັກງານນໍາພາ-ຄຸ້ມຄອງເພດຍິງ ເພື່ອກະກຽມໃຫ້ແກ່ການຄົ້ນຄວ້າໂຄງປະກອບການຈັດຕັ້ງ, ບຸກຄະລາກອນໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ ແລະກອງປະຊຸມໃຫຍ່ 3 ຂັ້ນຂອງແມ່ຍິງ.

ທ່ານ ນາງ ອິນລາວັນ ແກ້ວບຸນພັນ ໄດ້ກ່າວວ່າ: ການພັດທະນາຊັບພະຍາກອນມະນຸດເພດຍິງເວົ້າລວມ, ເວົ້າສະເພາະແມ່ນການສ້າງພະນັກງານ ນໍາພາ-ຄຸ້ມຄອງເພດຍິງເປັນວຽກໜຶ່ງທີ່ສໍາຄັນຊຶ່ງພັກ-ລັດຖະບານໄດ້ເອົາໃຈໃສ່ຕະຫຼອດມາເນື່ອງຈາກວ່າແມ່ຍິງກວມເຄິ່ງໜຶ່ງຂອງພົນລະເມືອງໃນທົ່ວປະເທດເປັນກໍາລັງແຮງເຂົ້າຮ່ວມໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດທັງແມ່ນຄວາມຮຽກຮ້ອງຕ້ອງການອັນຈໍາເປັນໂດຍສະເພາະໃນເງື່ອນໄຂໃໝ່ຂອງການເຊື່ອມໂຍງເສດຖະ ກິດກັບສາກົນ ແລະ ການກະກຽມຄວາມພ້ອມເພື່ອບັນລຸເປົ້າໝາຍການພັດທະນາແບບຍືນຍົງເພື່ອຮັບປະກັນໃຫ້ແມ່ຍິງໄດ້ມີສ່ວນຮ່ວມຢ່າງເຕັມສ່ວນ ແລະມີປະສິດທິຜົນ ແລະ ໄດ້ຮັບໂອກາດເທົ່າທຽມກັນສໍາລັບການເປັນຜູ້ນໍາໃນທຸກລະດັບຂອງການຕັດສິນໃຈທາງດ້ານການເມືອງ, ເສດຖະກິດ ແລະ ຊີວິດການເປັນຢູ່ໃນສັງຄົມ.
ຂ່າວ-ພາບ: ບຸນອູ້ມ

แชร์