ສອງນາຍົກລັດຖະມົນຕີ ລາວ-ອົດສະຕຣາລີ ພົບປະສອງຝ່າຍຢູ່ ກໍາປູເຈຍ

ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະກອງປະຊຸມສຸດຍອດທີ່ກ່ຽວຂ້ອງທີ່ນະຄອນຫຼວງພະນົມເປັນ, ຣາຊະອານາຈັກ ກໍາປູເຈຍ, ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ແອນໂທນີ້ ແອວບານີຊີ (Anthony Albanese), ນາຍົກລັດຖະມົນຕີ ແຫ່ງ ອົດສະຕຣາລີ ໃນຕອນເຊົ້າຂອງວັນທີ 12 ພະຈິກຜ່ານມາທີ່ໂຮງແຮມ ໂຊກາ, ພະນົມເປັນ.

ໃນໂອກາດດັ່ງກ່າວ, ສອງຝ່າຍໄດ້ສະແດງຄວາມປິຕິຍິນດີທີ່ໄດ້ມີໂອກາດພົບປະກັນເປັນຄັ້ງທໍາອິດພາຍຫຼັງທີ່ລັດຖະບານອົດສະຕຣາລີໄດ້ສໍາເລັດການແຕ່ງຕັ້ງຄະນະລັດຖະບານຊຸດໃໝ່ ໃນເດືອນພຶດສະພາ 2022 ຜ່ານມາ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະການຮ່ວມມືອັນດີ ລະຫວ່າງ ສອງປະເທດລາວ ແລະອົດສະຕຣາລີ ທີ່ມີບາດກ້າວຂະຫຍາຍຕົວຢ່າງຕໍ່ເນື່ອງຕະຫຼອດໄລຍະ 70 ປີ. ເພື່ອເປັນການສະເຫຼີມສະຫຼອງຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລະຫວ່າງສອງປະເທດ, ສະນັ້ນ ໃນການພົບປະຄັ້ງນີ້ ທັງສອງນາຍົກລັດຖະມັນຕີ ໄດ້ເຫັນດີເປັນເອກະພາບກັນ ໃຫ້ມີການຍົກລະດັບການຮ່ວມມືສອງຝ່າຍຂຶ້ນເປັນການພົວພັນຮ່ວມມືຮອບດ້ານ. ພ້ອມນັ້ນ, ສອງຝ່າຍຍັງໄດ້ເຫັນດີຈະສືບຕໍ່ໃຫ້ການສະໜັບສະໜູນເຊິ່ງກັນ ແລະກັນໃນຂອບອາຊຽນ ໂດຍສະເພາະແມ່ນການພົວພັນອາຊຽນ-ອົດສະຕຣາລີ ໃນສົກປີ 2021-2024 ທີ່ ສປປ ລາວ ໄດ້ຮັບການມອບຫມາຍໃຫ້ເປັນປະເທດປະສານງານ, ຂອບການຮ່ວມມືແມ່ນໍ້າຂອງ-ອົດສະຕຣາລີ ແລະ ຂອບອື່ນໆ. ນອກຈາກນັ້ນ, ສອງນາຍົກລັດຖະມົນຕີຍັງໄດ້ແລກປ່ຽນຄໍາຄິດຄໍາເຫັນກ່ຽວກັບສະພາບການສາກົນທີ່ມີຄວາມສົນໃຈຮ່ວມກັນ.ລາວສະແດງຄວາມຂອບໃຈມາຍັງລັດຖະບານອົດສະຕຣາລີ ຕໍ່ການຊ່ວຍເຫຼືອໃນດ້ານຕ່າງໆ ເຊັ່ນ: ການຊ່ວຍເຫຼືອເພື່ອການພັດທະນາ (ODA), ການຕ້ານການແຜ່ລະບາດຂອງພະຍາດໂຄວິດ-19, ການຕົກລົງຊ່ວຍເຫຼືອ ສປປ ລາວ ໃນການເປັນປະທານອາຊຽນ ໃນປີ 2024 ແລະອື່ນໆ, ພ້ອມທັງສະເໜີຝ່າຍອົດສະຕຣາລີ ສືບຕໍ່ຊຸກຍູ້ໃຫ້ນັກລົງທຶນອົດສະຕຣາລີ ເຂົ້າມາລົງທຶນຢູ່ ສປປ ລາວ ໃຫ້ຫຼາຍຂຶ້ນຕື່ມ. ນອກຈາກນັ້ນ, ທ່ານ ພັນຄໍາ ວິພາວັນ ກໍໄດ້ເຊື້ອເຊີນ ທ່ານ ແອນໂທນີ້ ແອວບານີຊີ ເດີນທາງມາຢ້ຽມຢາມ ສປປ ລາວ ໃນເວລາອັນຄວນ.
ຂ່າວ: ກະຊວງການຕ່າງປະເທດ

แชร์