ຫນຶ່ງແລວ ຫນຶ່ງເສັ້ນທາງ ນຳເອົາຜົນປະໂຫຍດຕົວຈິງມາສູ່ເສດຖະກິດໂລກ

ສື່ມວນຊົນຕ່າງປະເທດຈໍານວນ 50 ກວ່າຄົນ ຈາກຫລາຍປະເທດໄດ້ເຂົ້າຮ່ວມຮັບຟັງ ແລະແລກປ່ຽນສົນທະນາກັບສາດສະດາຈານ ຫວັງ ເຫວິນ (Wang Wen), ປະທານບໍລິຫານສະຖາບັນສຶກສາການເງິນຈົງຢາງ ,(Chongyang), ມະຫາວິທະຍາໄລ ເຫຼິນໝິງ ໂດຍຜ່ານລະບົບອອນລາຍ ໃນວັນທີ 11 ພະຈິກ 2022 ພາຍໃຕ້ຫົວຂໍ້: “ສົ່ງເສີມການພັດທະນາພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ທີ່ມີຄຸນນະພາບສູງ ແລະ ຮ່ວມກັນສ້າງຊາຕາກໍາຂອງມວນມະນຸດໃນອະນາຄົດ” ໂດຍແມ່ນ ສະມາຄົມນັກຂ່າວແຫ່ງປະເທດຈີນ ເປັນເຈົ້າພາບຈັດຂຶ້ນ.

ສາດສະດາຈານ ຫວັງ ເຫວິນ ໄດ້ບັນຍາຍໃຫ້ຮູ້ກ່ຽວກັບຂໍ້ລິເລີ່ມໜຶ່ງແລວ ໜຶ່ງເສັ້ນທາງ (Belt and Road Initiative: BRI) ເຊີ່ງມາຮອດປັດຈຸບັນມີເກືອບ 150 ປະ ເທດ, ເຂດແຄວ້ນແລະ ອົງການຈັດຕັ້ງສາກົນ ເຂົ້າຮ່ວມ, ໃນນັ້ນ ລວມທັງ ສປປ ລາວ ໂດຍທ່ານໄດ້ຍົກໃຫ້ເຫັນຄວາມສໍາຄັນ ແລະ ຜົນປະໂຫຍດທີ່ໂລກ ກໍຄື ບັນດາປະ ເທດທີ່ເຂົ້າຮ່ວມ BRI ໄດ້ຮັບໃນໄລຍະຜ່ານມາ ທັງທາງດ້ານເສດຖະກິດ, ການໄປມາຫາສູ່ກັນຂອງປະຊາຊົນລະ ຫວ່າງປະເທດ ແລະ ອື່ນໆ ເຊີ່ງຖືເປັນໂຄງການທີ່ດີ ແລະ ປະກອບສ່ວນສໍາຄັນໃນການຊຸກຍູ້ການພັດທະນາເສດຖະ ກິດຂອງໂລກ ແລະ ປະກອບສ່ວນສໍາຄັນໃນການຊຸກຍູ້ສົ່ງເສີມການຈັດຕັ້ງປະຕິບັດຍຸດທະສາດຂອງຈີນໃນການເປີດປະຕູສູ່ໂລກພາຍນອກໃຫ້ນັບມື້ໄດ້ນັບຜົນສໍາເລັດ, ເຊີ່ງໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ຈັດຂຶ້ນເມື່ອບໍ່ດົນມານີ້ ໄດ້ຕີ ລາຄາວ່າ BRI ເປັນຂໍ້ລິເລີ່ມທີ່ມີປະສິດທິຜົນສູງ, ທັງກາຍ ເປັນຜະລິດຕະພັນສາທາລະນະສາ ກົນ ແລະ ເວທີການຮ່ວມມືທີ່ໄດ້ຮັບຄວາມນິຍົມຊົມຊອບເປັນຢ່າງສູງຈາກທົ່ວໂລກ.

ສາດສະດາຈານ ຫວັງ ເຫວິນ ຍັງໄດ້ຕອບຫລາຍຄໍາຖາມຈາກສື່ມວນຊົນຕ່າງປະເທດທີ່ໄດ້ຖາມກ່ຽວກັບສິ່ງທ້າທາຍໃນການຈັດຈັ້ງປະຕິບັດຂໍ້ລິເລີ່ມດັ່ງກ່າວ, ລວມເຖີງ ທິດທາງການຮ່ວມມືລະຫວ່າງຈີນກັບບັນດາປະເທດທີ່ເຂົ້າຮ່ວມ BRI ໃນຕໍ່ໜ້າ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນກໍຄືການເຮັດໃຫ້ເສດຖະກິດຂອງບັນ ດາປະເທດທີ່ເຂົ້າຮ່ວມໂຄງການນັບມື້ດີຂຶ້ນກວ່າເກົ່າ.

ສໍາລັບຂໍ້ລິເລີ່ມ ໜຶ່ງແລວໜຶ່ງເສັ້ນທາງ (BRI) ແມ່ນຄວາມຄິດທີ່ສະເໜີຂຶ້ນໂດຍ ທ່ານ ສີຈິ້ນຜິງ, ປະທານປະ ເທດ ແຫ່ງ ສປຈີນ ໃນປີ 2013 ໂດຍມີເຄົ້າຄວາມຄິດມາ ຈາກເສັ້ນທາງສາຍໄໝບູຮານທີ່ມີປະຫວັດຍາວນານເຖິງ 2 ພັນກວ່າປີແລ້ວໂດຍມີຈຸດປະສົງເພື່ອຍົກລະດັບການຮ່ວມມືໃນພາກພື້ນແລະການເຊື່ອມຈອດລະຫວ່າງທະວີບເພື່ອພັດທະນາຮ່ວມກັນ ແລະ ໄດ້ຮັບຜົນປະໂຫຍດຮ່ວມກັນ.

ຂໍ້ລິເລີ່ມນີ້ປະກອບດ້ວຍ 2 ໂຄງການໃຫຍ່ ຄື : ແລວເສດຖະກິດເສັ້ນທາງສາຍໄໝ ແລະເສັ້ນທາງສາຍໄໝທາງທະເລສັດຕະວັດທີ 21. ໜຶ່ງແລວ ແມ່ນເນັ້ນການຮວມຕົວກັນຂອງຈີນກັບອາຊີກາງ, ຣັດເຊຍ ແລະ ເອີຣົບ, ເຊື່ອມໂຍງຈີນກັບອ່າວເປີເຊຍ, ເຂດທະເລເມດີເຕຣາເນ ຜ່ານອາ ຊີກາງ ແລະ ອາຊີຕາເວັນຕົກ, ເຊື່ອມຈອດຈີນກັບອາຊີຕາເວັນອອກສຽງໃຕ້ (ອາຊຽນ), ອາຊີໃຕ້ ແລະມະຫາສະ ມຸດອິນເດຍ. ໜຶ່ງເສັ້ນທາງແມ່ນຖືກອອກແບບແຄມຝັ່ງທະເລຈີນໄປຫາເອີຣົບຜ່ານທະເລຈີນໃຕ້ແລະມະຫາສະ ມຸດອິນເດຍເສັ້ນທາງໜຶ່ງ ແລະອີກເສັ້ນທາງໜຶ່ງແມ່ນຈາກແຄມຝັ່ງທະເລຈີນຜ່ານທະເລຈີນໃຕ້ໄປຫາມະຫາສະມຸດປາຊີຟິກ.

ສຳລັບ ສປປ ລາວ ທີ່ເປັນປະເທດບໍ່ຕິດກັບທະເລ, BRI ແມ່ນແທດເໝາະກັບນະໂຍບາຍການຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມຈອດກັບບັນດາປະເທດໃກ້ຄຽງ ແລະ ພາກພື້ນຂອງລາວສູງທີ່ສຸດ ເຊີ່ງພາຍ ຫລັງເປີດນໍາໃຊ້ເສັ້ນທາງລົດໄຟລາວ-ຈີນ ຢ່າງເປັນທາງ ການນັບແຕ່ເດືອນທັນວາ ປີ 2021 ເປັນຕົ້ນມາ ໄດ້ສະແດງໃຫ້ເຫັນແລ້ວວ່າໂຄງການດັ່ງກ່າວເປັນໂຄງການທີ່ມີປະສິດທິຜົນສູງເຊີ່ງບໍ່ສະເພາະແຕ່ສອງປະເທດລາວ-ຈີນ ເທົ່ານັ້ນແຕ່ຍັງລວມເຖີງຫລາຍປະເທດໃກ້ຄຽງຕື່ມອີກ.

แชร์