ປະທານ ສປ ນວ ຕິດຕາມວຽກງານຂົງເຂດຍຸຕິທຳ ປກຊ-ປກສ ຢູ່ສານປະຊາຊົນເຂດ II

ທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ ແລະທ່ານ ນາງ ສົມພຽນ ວົງໄຊ ປະທານຄະນະກຳມະການຍຸຕິທຳ ແລະ ປກຊ-ປກສ ສປ ນວ ພ້ອມດ້ວຍຄະນະເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນກົດໝາຍ ແລະນິຕິກຳໃຕ້ກົດໝາຍຢູ່ສານປະຊາຊົນ ເຂດ II ນວ ວັນທີ 10 ພະຈິກ 2022 ໂດຍການຕ້ອນຮັບຂອງທ່ານ ສັກກຸນາ ຍະພິຈິດ ປະທານສານປະຊາຊົນເຂດ II ແລະ ມີພະນັກງານກ່ຽວຂ້ອງເຂົ້າຮ່ວມ.

ໂອກາດນີ້ ກໍໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນໄລຍະຜ່ານມາຊຶ່ງນັບແຕ່ຕົ້ນປີ 2022 ເຖິງປັດຈຸບັນສານປະຊາຊົນເຂດ II ໄດ້ຍົກສູງຄຸນນະພາບໃນການດຳເນີນຄະດີຕາມຂະບວນການຍຸຕິທຳ ຕາມມະຕິ 112/ກມສພ ຂອງກົມການເມືອງສູນກາງພັກ 9 ເດືອນຜ່ານມາ ສາມາດແກ້ໄຂຄະດີໄດ້ 270 ເລື່ອງ ໃນ 358 ເລື່ອງ ເທົ່າກັບ 75% ໄດ້ເອົາໃຈໃສ່ປັບປຸງກົນໄກການບໍລິຫານຄະດີພາຍໃນ ໂດຍຄະດີທີ່ເຂົ້າມາ ບໍ່ໃຫ້ມີຫຼາຍຂັ້ນຕອນ ແລະ ແກ່ຍາວເວລາຢູ່ພາຍໃນ ສ້າງສິ່ງອຳນວຍຄວາມສະດວກ ສະພາບແວດລ້ອມທີ່ດີ ເປັນຕົ້ນ ຫ້ອງຄົ້ນຄວ້າຄະດີ ຫ້ອງສອບສວນລູກຄວາມ ຫ້ອງຕັດສິນຄະດີ ໃຫ້ມີຄວາມພ້ອມຕະຫຼອດເວລາ ໄດ້ເຜີຍແຜ່ວຽກງານຂອງສານປະຊາຊົນ ຕໍ່ການຈັດຕັ້ງທຸກພາກສ່ວນກ່ຽວຂ້ອງຢູ່ຂັ້ນກຸ່ມ ແລະບ້ານຕາມໂຄງການທີ່ເມືອງໄຊທານີໄດ້ຮັບຮອງໂດຍລົງເຄື່ອນໄຫວເນັ້ນ 4 ຈຸດປະສົງໃຫຍ່ ຄື: ເຜີຍແຜ່ທີ່ຕັ້ງພາລະບົດບາດສິດໜ້າທີ່ຂອງສານປະຊາຊົນ ແລະສານປະຊາຊົນເຂດຍົກບັນດາຄະດີຄວາມທີ່ມັກເກີດຂຶ້ນ ເຊັ່ນ: ທີ່ດິນ ໜີ້ສິນ ຢ່າຮ້າງ ລັກຊັບ ຊິງຊັບ ປຸ້ນ ອຸບັດເຫດ ແລະ ບັນຫາຢາເສບຕິດ ແລກປ່ຽນສົນທະນາວິທີແກ້ໄຂບັນຫາຕ່າງໆ ແລະສັງລວມບັນຫາກຳນົດຈຸດການມີສ່ວນຮ່ວມ ແລະຂອດການປະສານງານກັນ ເຊິ່ງສຳເລັດແລ້ວ 6 ກຸ່ມ ແລະ 53 ບ້ານ ຈາກນັ້ນຜູ້ເຂົ້າຮ່ວມກໍໄດ້ປະກອບຄຳເຫັນແລກປ່ຽນເຊິ່ງກັນ ແລະກັນເພື່ອຊອກຫາວິທີແກ້ໄຂຂໍ້ຄົງຄ້າງໃນການປະຕິບັດວຽກງານຂອງສານປະຊາຊົນເຂດ II ໃນໄລຍະຜ່ານມາ.

ທ່ານ ອານຸພາບ ຕຸນາລົມ ໄດ້ສະແດງຄວາມຊົມເຊີຍຕໍ່ຄະນະນຳຂອງສານປະຊາຊົນເຂດ II ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຮັບຜິດຊອບສູງ ແລະເນັ້ນໃຫ້ສານປະຊາຊົນເຂດ II ເອົາໃຈໃສ່ປະຕິບັດບັນດາຄາດໝາຍ ແລະທິດທາງໃນຕໍ່ໜ້າທີ່ກຳນົດໄວ້ໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້.
ຂ່າວ: ສະບາໄພ

แชร์