ສໍາມະນາວິທະຍາສາດ “ການຫັນເປັນອຸດສາຫະກຳ ແລະທັນສະໄໝ ຢູ່ ສປປ ລາວ”

ສະພາທິດສະດີສູນກາງພັກໄດ້ຈັດກອງປະຊຸມສໍາມະນາວິທະຍາສາດພາຍໃຕ້ຫົວຂໍ້ “ການຫັນເປັນອຸດສາຫະກໍາ ແລະທັນສະໄໝ ຢູ່ ສປປ ລາວ” ຈັດຂຶ້ນໃນວັນທີ 10 ພະຈິກ 2022 ທີ່ຫ້ອງປະຊຸມໃຫຍ່ຂອງສະພາດັ່ງກ່າວ, ພາຍໃຕ້ການເປັນປະທານຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກປະທານສະພາທິດສະດີສູນກາງພັກ. ເປັນກຽດເຂົ້າຮ່ວມກອງປະຊຸມ, ມີສະຫາຍ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກອະດີດຮອງນາຍົກລັດຖະມົນຕີ ທີ່ປຶກສາສະພາທິດສະດີສູນກາງພັກ, ບັນດາສະຫາຍຄະນະປະຈຳ ແລະສະມາຊິກສະພາທິດສະດີສູນກາງພັກ ແລະ ຄະນະຮັບຜິດຊອບໂຄງການເຂົ້າຮ່ວມ.

ໂຄງການຄົ້ນຄວ້າ ພາຍໃຕ້ຫົວຂໍ້: “ການຫັນເປັນອຸດສາຫະກຳ ແລະ ທັນສະໄໝ ຢູ່ ສປປ ລາວ”,ເປັນໜຶ່ງໃນ 9 ໂຄງການຄົ້ນຄວ້າລະດັບຊາດຂອງພັກເຮົາທີ່ສະພາວິທະຍາສາດສັງຄົມແຫ່ງຊາດເມື່ອກ່ອນວາງອອກ ແລະສະພາທິດສະດີສູນກາງພັກໃນປັດຈຸບັນ.

ຜ່ານການດຳເນີນງານຢ່າງຕັ້ງໜ້າ ແລະ ດ້ວຍຄວາມຮັບຜິດຊອບຂອງຄະນະໂຄງການ “ການຫັນເປັນອຸດສາຫະກຳ ແລະ ທັນສະໄໝ ຢູ່ ສປປ ລາວ” ໄດ້ສໍາເລັດຂັ້ນພື້ນຖານ, ສະນັ້ນ, ສະພາທິດສະດີສູນກາງພັກຈຶ່ງຈັດກອງປະຊຸມສໍາມະນາວິທະຍາສາດນີ້ຂຶ້ນ ແລະເຊີນບັນດາທ່ານທີ່ມີຄວາມຊ່ຽວຊານດ້ານເສດຖະກິດເພື່ອພ້ອມກັນປະກອບຄວາມຄິດຄວາມເຫັນຕໍ່ກັບເນື້ອໃນຂອງບົດຄົ້ນຄວ້ານີ້, ແນໃສ່ເຮັດໃຫ້ບົດຄົ້ນຄວ້າດັ່ງກ່າວນີ້ມີເນື້ອໃນຄົບຖ້ວນສົມບູນຂຶ້ນຕື່ມ, ໃຫ້ສົມກັບວ່າເປັນບົດຄົ້ນຄວ້າ “ການຫັນເປັນອຸດສາຫະກຳ ແລະທັນສະໄໜ ຢູ່ ສປປ ລາວ” ສະບັບທໍາອິດຂອງ ສປປ ລາວ ຂອງພວກເຮົາ.

ບົດຄົ້ນຄວ້າສະບັບນີ້ ແມ່ນທົບທວນຄືນຄວາມຮັບຮູ້ດ້ານທິດສະດີ ແລະພຶດຕິກໍາຂອງການຫັນເປັນອຸດສາຫະກຳ ແລະທັນສະໄໝ, ທົບທວນຂະບວນວິວັດ ແລະ ຕີລາຄາການຫັນເປັນອຸດສາຫະກໍາແລະ ທັນສະໄໝ ໃນໄລຍະຜ່ານມາ (1976-2021) ຂອງ ສປປ ລາວ; ຂໍ້ສະເໜີແນະທາງດ້ານວິໄສທັດແລະ ຍຸດທະສາດການຫັນເປັນອຸດສາຫະກຳ ແລະ ທັນສະໄໝ ຮອດປີ 2030; ເພື່ອຫັນປ່ຽນຮອບດ້ານຮູບແບບການຜະລິດ, ການບໍລິການ, ການຄຸ້ມຄອງເສດຖະກິດ-ສັງຄົມ ແລະ ແບບແຜນການດຳລົງຊີວິດ,ບົດຄົ້ນຄວ້ານີ້ໄດ້ອີງໃສ່ວິໄສທັດຮອດ 2030 ທີ່ໄດ້ຮັບຮອງໃນກອງປະຊຸມໃຫຍ່ຄັ້ງທີ X ໃນປີ 2016 ໂດຍຕິດພັນກັບມະຕິຂອງກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງລັດ ແລະ ໄດ້ສະເໜີວິໄສທັດຂອງການຫັນເປັນອຸດສາຫະກໍາ ແລະ ທັນສະໄໝ ຄື: “ຮອດປີ 2030, ສປປ ລາວ ກາຍເປັນປະເທດທີ່ມີລາຍຮັບໃນລະດັບປານກາງສູງ, ມີພື້ນຖານເສດຖະກິດທີ່ໜັກແໜ້ນບໍ່ຕົກໃນແຮ້ວຂອງປະເທດທີ່ມີລາຍຮັບປານກາງ ແລະ ຫັນເປັນປະເທດເສດຖະກິດພູມປັນຍາຢ່າງຕັ້ງໜ້າ ໂດຍມີການນຳໃຊ້ວິທະຍາສາດ-ເຕັກໂນໂລຊີ ແລະ ແຮງງານມີສີມືເປັນກຳລັງແຮງ ແລະ ພາຫະນະບຸກທະລຸທີ່ມີປະສິດທິຜົນສູງໃນການຊຸກຍູ້ ແລະ ຂັບເຄື່ອນການຜະລິດຂອງທຸກຂະແໜງການ; ມີພື້ນຖານການຜະລິດ ການບໍລິການທີ່ໜັກແໜ້ນມີປະສິດທິພາບ ແລະ ປະສິດທິຜົນສູງ, ສາມາດເຊື່ອມຈອດກັບເຄືອຂ່າຍການຜະລິດ ແລະ ການບໍລິການຂອງພາກພື້ນ ແລະ ສາກົນໄດ້; ມີຮູບການບໍລິການຂົນສົ່ງຜູ້ໂດຍສານ ແລະ ສິນຄ້າທີ່ທັນສະໄໝເຊື່ອມໂຍງກັບແລວທາງການຂົນສົ່ງຂອງພາກພື້ນ, ການຫັນເປັນອຸດສາຫະກໍາ ແລະ ທັນສະໄໝສາມາດນຳຜົນປະໂຫຍດ ແລະ ເຮັດໃຫ້ຄຸນນະພາບຊີວິດ ແລະ ສະພາບແວດລ້ອມການດໍາລົງຊີວິດຂອງປະຊາຊົນດີຂຶ້ນ”.
(ຂ່າວ: ສະພາທິດສະດີສູນກາງພັກ, ພາບ: ແສງຈັນ)

แชร์