ກອງປະຊຸມວິຊາການ ຂອງສະມາຄົມນັກສາທາລະນະສຸກສາດລາວ ຄັ້ງທີ 2

ສະມາຄົມສາທາລະນະສຸກສາດລາວຮ່ວມກັບຄະນະສາທາລະນະສຸກສາດມະຫາວິທະຍາໄລ ວິທະຍາສາດສຸຂະພາບ (ມວສ) ແລະ ສະຖາບັນສາທາລະນະສຸກສາດ ແລະ ການແພດເຂດຮ້ອນໄດ້ຈັດກອງປະຊຸມວິຊາການຂອງສະມາຄົມນັກສາທາລະນະສຸກສາດລາວ ຄັ້ງທີ 2 ໃນຫົວຂໍ້: ການຮ່ວມມືຫຼາຍພາກສ່ວນ ແລະການເປັນເຈົ້າການຂອງຊຸມຊົນເພື່ອກຽມພ້ອມການຮັບມືວຽກງານກັນພະຍາດ ແລະສົ່ງເສີມສຸຂະພາບ ໃນ ສປປ ລາວ ຈັດຂຶ້ນໃນວັນທີ 10 ພະຈິກ 2022 ທີ່ ວິທະຍາເຂດດົງໂພສີ ມວສ ໂດຍການເປັນປະທານຂອງ ທ່ານ ພູທອນ ວັງກອນວິໄລ ປະທານສະມາຄົມສາທາລະນະສຸກສາດລາວ, ມີທ່ານ ບຸນຖົມ ຊາມຸນຕຣີ ອະທິການບໍດີ ມວສ, ມີບັນດາກົມອ້ອມຂ້າງກະຊວງສາທາລະນະສຸກ, ພະແນກສາທາລະນະສຸກແຂວງທົ່ວປະເທດ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ພູທອນ ວັງກອນວິໄລ ໄດ້ກ່າວວ່າ: ໃນປັດຈຸບັນທົ່ວໂລກໄດ້ຮ່ວມກັນໃນການຕໍ່ສູ້ກັບສິ່ງທ້າທາຍດ້ານສາທາລະນະສຸກທີ່ຮ້າຍແຮງທີ່ສຸດຄັ້ງໜຶ່ງໃນປະຫວັດສາດ ດ້ວຍການປ່ຽນແປງຂອງສິ່ງແວດລ້ອມ ແລະປະຊາກອນ, ລັດຖະບານຈຶ່ງຕ້ອງຕໍ່ສູ້ກັບພະຍາດຕິດຕໍ່, ພ້ອມນີ້ການແຜ່ລະບາດຂອງພະຍາດໂຄວິດ-19 ລັດຖະບານກໍໄດ້ພະຍາຍາມຢ່າງໜັກເພື່ອຟື້ນຟູການເຄື່ອນໄຫວ ແລະ ການບໍລິການສາທາລະນະສຸກໃຫ້ເປັນປົກກະຕິ ແລະເອົາຊະນະກັບໄວຣັດດັ່ງກ່າວ,ທັງຮັບປະກັນຄວາມປອດໄພຕໍ່ ສຸຂະພາບ ແລະຄວາມຜາສຸກຂອງປະຊາຊົນລາວ.

ທ່ານ ພູທອນ ວັງກອນວິໄລ ໄດ້ກ່າວຕື່ມວ່າ: ກອງປະຊຸມໃນຄັ້ງນີ້ແມ່ນເພື່ອບັນລຸວິໃສທັດຮ່ວມກັນໃນລະດັບສູງສຸດຂອງການມີສຸຂະພາບທີ່ດີໃນທົ່ວປວງຊົນລາວ ແລະ ເສີມຂະຫຍາຍຄວາມສາມາດໃນການແກ້ໄຂບັນດາສິ່ງທ້າທາຍດ້ານສຸຂະພາບສາທາລະນະເປັນສຳຄັນໂດຍຜ່ານການໃຫ້ສຸຂະສຶກສາ, ການຄົ້ນຄວ້າ, ການສົ່ງເສີມນະໂຍບາຍດ້ານສຸຂະພາບໃນປະເທດ. ນອກຈາກນີ້, ກອງປະຊຸມດັ່ງກ່າວບັນດາຜູ້ຊ່ຽວຊານ ແລະນັກວິຊາການສາທາລະນະສຸກຍັງໄດ້ແລກປ່ຽນບົດຮຽນ, ແລກປ່ຽນຄວາມຄິດເຫັນ ແລະ ປະສົບການທາງດ້ານວິທະຍາສາດ ແລະ ວິຊາຊີບສຸຂະພາບສາທາລະນະ, ຂົງເຂດການຄົ້ນຄວ້າຕ່າງໆ ແລະກໍລະນີສຶກສາທີ່ຫຼາກຫຼາຍເພື່ອຕໍ່ສູ້ກັບບັນດາພະຍາດທີ່ເປັນໄພຂົ່ມຂູ່ຕໍ່ຊີວິດ, ສຸຂະພາບ ແລະ ສິ່ງແວລ້ອມ, ພ້ອມນີ້ຍັງເປັນການສ້າງໂອກາດໃນການສ້າງເຄືອຂ່າຍຄຽງຄູ່ກັບການເຜີຍແຜ່ບັນດາຂໍ້ມູນຂ່າວສານ, ການຄົ້ນຄວ້າດ້ານສາທາລະນະສຸກໄປພ້ອມກັນ ຊຶ່ງກອງປະຊຸມໃນຄັ້ງນີ້, ປະກອບມີບົດຄັດຫຍໍ້ທັງໝົດ 72 ບົດ, ບົດນຳສະເໜີປາກເປົ່າ ຈຳນວນ 35 ບົດ ແລະການນໍາສະເໜີເປັນໂປສເຕີ 48 ບົດ. ໂດຍໄດ້ຮັບການສະໜັບສະໜູນຈາກ: ອົງການ Save Children International, ອົງການ Handicap International, ອົງການ ANRCB ແລະສະມາຄົມ ສຸຂະພາບຊຸມຊົນ ແລະການມີສ່ວນຮ່ວມ (Community Health and Inclusion Association ຫຼື CHias).
(ຂ່າວ-ພາບ: ວັນເພັງ)

แชร์