ລາວ-ຫວຽດນາມ ສືບຕໍ່ຮັດແໜ້ນການຮ່ວມມືວຽກງານກວດກາ

ໃນວັນທີ 9 ພະຈິກ 2022 ໄດ້ມີພິທີພົບປະແລກປ່ຽນບົດຮຽນລະຫວ່າງຄະນະກວດກາສູນກາງພັກ ປະຊາຊົນ ປະຕິວັດລາວ ກັບ ຄະນະກຳມະການກວດກາສູນກາງພັກກອມມູນິດຫວຽດນາມ ທີ່ໂຮງແຮມເມືອງແທ່ງ ນະຄອນຫຼວງວຽງຈັນ, ຝ່າຍລາວ ນຳໂດຍສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ, ຝ່າຍຫວຽດນາມນໍາໂດຍ ສະຫາຍ ເຈິ່ນ ເກີ້ມ ຕູ້ ກໍາມະການກົມການເມືອງສູນກາງພັກເລຂາທິການສູນກາງພັກປະທານຄະນະກຳມະການກວດກາສູນກາງພັກກອມມູນິດ ຫວຽດນາມ ພ້ອມດ້ວຍຄະນະ.

ໂອກາດນີ້ ສະຫາຍ ຄໍາພັນ ພົມມະທັດ ໄດ້ກ່າວຕ້ອນຮັບຄະນະຜູ້ແທນຂັ້ນສູງ ຄະນະກຳມະການກວດກາສູນກາງພັກກອມມູນິດຫວຽດນາມພ້ອມທັງຕີລາຄາສູງການມາຢ້ຽມຢາມ ແລະເຮັດວຽກໃນຄັ້ງນີ້ແມ່ນມີຄວາມໝາຍສໍາຄັນເປັນຢ່າງຍິ່ງເປັນການປະກອບສ່ວນທີ່ສຳຄັນໃນການສືບຕໍ່ຜັນຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ, ປະຊາຊົນ 2 ຊາດ ລາວ-ຫວຽດນາມ, ຫວຽດນາມ-ລາວ ໂດຍສະເພາະ ແມ່ນການປະຕິບັດບົດບັນທຶກພົວພັນຮ່ວມມືລະຫວ່າງ 2 ອົງການກວດກາ ຂອງ 2 ພັກໃຫ້ນັບມື້ກ້າວສູ່ລວງເລິກ ໃນໄລຍະທີ່ຜ່ານມາ ໂດຍອີງໃສ່ສະພາບເງື່ອນໄຂທີ່ມີການແຜ່ລະບາດຂອງພະຍາດໂຄວິດ-19 ການພົບປະກັນແມ່ນໃນຮູບແບບລະບົບສື່ສານທາງໄກ, ເຖິງວ່າຈະພົບກັບຄວາມຫຍຸ້ງຍາກແຕ່ພວກເຮົາກໍສາມາດພົບປະກັນໄດ້ຢ່າງເປັນທາງການ ແລະ ສຳລັບປີ 2022 ນີ້ເປັນປີທີ່ພັກ-ລັດ, ກະຊວງ-ອົງການ ແລະທ້ອງຖິ່ນກໍາລັງປະຕິບັດຕາມແຜນການຂອງຕົນເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ 2022, ເປັນຕົ້ນວັນເຊັນສົນທິສັນຍາມິດຕະພາບ ແລະການຮ່ວມມືຄົບຮອບ 45 ປີ ແລະ ວັນສ້າງຕັ້ງສາຍພົວພັນທາງການທູດ ລາວ-ຫວຽດນາມ ຄົບຮອບ 60 ປີ. ການພົບປະແລກປ່ຽນບົດຮຽນຄັ້ງນີ້, ຝ່າຍລາວໄດ້ແຈ້ງສະພາບການຈັດຕັ້ງປະຕິບັດວຽກງານຕິດຕາມ-ກວດກາພັກ; ວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ; ຂໍ້ສະດວກ, ຄວາມຫຍຸ້ງຍາກໃນການຈັດຕັ້ງປະຕິບັດວຽກງານກວດກາ ແລະວຽກງານຈຸດສຸມໃນຕໍ່ໜ້າຊຶ່ງໃນປັດຈຸບັນທົ່ວພັກປະຊາຊົນປະຕິວັດລາວແມ່ນພວມສືບຕໍ່, ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍສະເພາະການຈັດຕັ້ງປະຕິບັດສອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກເສດຖະກິດ-ການເງິນ ແລະການແກ້ໄຂບັນຫາຢາເສບຕິດ, ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກ, ຄະນະກວດກາສູນກາງພັກ.
ຫຼັງຈາກນັ້ນກໍໄດ້ສະເໜີບາງບັນຫາເພື່ອແລກປ່ຽນຊຶ່ງກັນ ແລະກັນເປັນຕົ້ນແມ່ນ:

ບົດຮຽນໃນການຊີ້ນຳ-ນຳພາຂອງຄະນະພັກໃນການຕິດຕາມ, ກວດກາພັກຢູ່ກະຊວງ-ອົງການ ແລະທ້ອງຖິ່ນ;
ບົດຮຽນໃນການລົງວິໄນຕໍ່ການຈັດຕັັ້ງພັກ ແລະສະມາຊິກພັກຂອງຄະນະກວດກາສູນກາງພັກຄອມມູນິດຫວຽດນາມ;
ການກວດກາຕໍ່ບຸກຄະລະກອນທີ່ເປັນເປົ້າໝາຍສະໝັກເຂົ້າໂຄງປະກອບຄະນະບໍລິຫານງານພັກແຕ່ລະຂັ້ນໄດ້ດຳເນີນແນວໃດ ?;
ງົບປະມານ ແລະ ນະໂຍບາຍຕໍ່ອົງການກວດກາ ແລະ ພະນັກງານກວດກາແມ່ນຈາກແຫຼ່ງລາຍຮັບໃດ ແລະມີການປະຕິບັດແນວໃດ ?;
ການເຄື່ອນໄຫວຕິດຕາມ ກວດກາແບບປົກກະຕິ ຕໍ່ການຈັດຕັ້ງ ແລະສະມາຊິກພັກ ລົງເລິກບົດບາດຂອງຄະນະພັກຂັ້ນເທິງ ກວດກາຄະນະພັກຂັ້ນລຸ່ມ ແລະ ບົດບາດຂອງຄະນະກວດກາພັກແຕ່ລະຂັ້ນ, ບົດຮຽນຂອງພັກກອມມູນິດຫວຽດນາມ;
ການຕິດຕາມກວດກາ ແລະ ປະເມີນຄວາມຮັບຜິດຊອບການເມືອງຂອງພະນັກງານຂັ້ນສູນກາງຄຸ້ມຄອງຢູ່ອົງການຈັດຕັ້ງພັກ-ລັດຂັ້ນຕ່າງໆ ປະຕິບັດຄືແນວໃດ?;
ຜ່ານການກວດກາພົບເຫັນການລະເມີດກົດລະບຽບພັກ, ກົດໝາຍຂອງລັດຂອງບຸກຄົນອະດີດການນຳໃນຂັ້ນຕ່າງໆ ທີ່ໄດ້ຮັບບຳນານແລ້ວໄດ້ມີມາດຕະການທາງວິໄນ ຫຼື ລົງໂທດຕໍ່ບຸກຄົນດັ່ງກ່າວໃນຮູບການຄືແນວໃດ?; ໄດ້ມີນິຕິກຳເປັນບ່ອນອີງເພື່ອຈັດຕັ້ງປະຕິບັດແນວໃດ?;
ຂັ້ນຕອນການແກ້ໄຂທາງວິໄນຕໍ່ພະນັກງານສະມາຊິກພັກທີ່ມີຕຳແໜ່ງຂັ້ນພະນັກງານຄຸ້ມຄອງຢູ່ແຕ່ລະບ່ອນທີ່ກວດກາເຫັນການລະເມີດກົດລະບຽບຂອງພັກ ແລະ ກົດໝາຍຂອງລັດ ຫຼືມີການສໍ້ລາດບັງຫຼວງໄດ້ປະຕິບັດຄືແນວໃດ?;
ການຈັດຕັ້ງ ແລະ ບຸກຄົນເຂົ້າຮ່ວມວຽກງານສະກັດກັ້ນ ແລະຕ້ານການສໍ້ລາດບັງຫຼວງເປັນຕົ້ນ: ຜູ້ເຂົ້າຮ່ວມແກ້ໄຂ, ຜູ້ຄົ້ນພົບ, ຜູ້ລາຍງານ ແລະອື່ນໆ ໄດ້ຮັບການຄຸ້ມຄອງປົກປ້ອງ ແລະນະໂຍບາຍຄືແນວໃດ? ມີນິຕິກຳອັນໃດເປັນບ່ອນອີງ, ເວລາຈັດຕັ້ງປະຕິບັດຕົວຈິງມີຂໍ້ສະດວກ ແລະຂໍ້ຫຍຸ້ງຍາກຄືແນວໃດ?;
ການປະຕິບັດຄຳຕັດສິນຂອງສານທີ່ແມ່ນຄະດີການສໍ້ລາດບັງຫຼວງອົງການກວດກາພັກ-ລັດ ສສ ຫວຽດນາມ ໄດ້ມີຂອບເຂດການປະສານງານກັບພາກສ່ວນກ່ຽວຂ້ອງຄືແນວໃດ? ຕໍ່ການເກັບກູ້ຜົນເສຍຫາຍທາງແພ່ງ ເປັນຄວາມຮັບຜິດຊອບຂອງພາກສ່ວນໃດ? ກໍລະນີຈຳເລີຍບໍ່ມີຊັບສິນໃຊ້ແທນຄືນທັງໝົດ ຫຼືໃຊ້ແທນສ່ວນໃດສ່ວນໜຶ່ງ ໄດ້ມີມາດຕະການປະຕິບັດແນວໃດ?.
ໃນຕອນທ້າຍຂອງພິທີທັງສອງຝ່າຍໄດ້ເຊັນບົດບັນທຶກການຮ່ວມມືລະຫວ່າງຄະນະກວດກາສູນກາງພັກປະຊາຊົນປະຕິວັດລາວ ກັບ ຄະນະກຳມະການກວດກາສູນກາງພັກກອມມູນິດຫວຽດນາມ.
ຂ່າວ: ຄະນະກວດກາສູນກາງພັກ

แชร์