ຮອງນາຍົກລັດຖະມົນຕີ ພົບປະໂອ້ລົມການນໍາຫຼັກແຫຼ່ງແຂວງເຊກອງ

ໃນວັນທີ 9 ພະຈິກ 2022 ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີພ້ອມດ້ວຍຄະນະໄດ້ເຄື່ອນໄຫວເຮັດວຽກ ແລະ ພົບປະໂອ້ລົມພະນັກງານນໍາພາຫຼັກແຫຼ່ງແຂວງເຊກອງ ໂດຍມີທ່ານ ເຫຼັກໄຫຼ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງພ້ອມດ້ວຍຄະນະພັກ, ຄະນະນໍາ ແລະພະນັກງານນຫຼັກແຫຼ່ງຂອງແຂວງໃຫ້ການຕ້ອນຮັບຢ່າງອົບອຸ່ນ.

ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ລາຍງານກ່ຽວກັບການນໍາພາ-ຊີ້ນໍາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະການຈັດຕັ້ງປະຕິບັດ 2 ວາລະແຫ່ງຊາດ ໂດຍໃນ 9 ເດືອນປີ 2022 ລວມຍອດຜະລິດຕະພັນພາຍໃນ ຫຼື GDP ຂະຫຍາຍຕົວເພີ່ມຂຶ້ນໃນລະດັບ 4% ໃນນັ້ນຂະແໜງກະສິກໍາ ແລະປ່າໄມ້ຂະຫຍາຍຕົວເພີ່ມຂຶ້ນ 5,4% ຂະແໜງອຸດສາຫະກໍາເພີ່ມຂຶ້ນ 0,9% ແລະຂະແໜງບໍລິການເພີ່ມຂຶ້ນ 2,7%; ເກັບລາຍຮັບເຂົ້າງົບປະມານໄດ້ 74,20 ຕື້ກີບ ທຽບໃສ່ແຜນເທົ່າກັບ 64,40%; ການແກ້ໄຂບັນຫາຢາເສບຕິດ ສາມາດເລີກຮື້ ແລະ ມ້າງຄະດີຄ້າ-ຂາຍຢາເສບຕິດໄດ້ 46 ເລື່ອງ, ຈັບຜູ້ຖືກຫາໄດ້ 52 ຄົນ, ຢຶດຂອງກາງຢາບ້າໄດ້ 68.615 ເມັດ, ຂຶ້ນບັນຊີຜູ້ເສບຢາເສບຕີດໄດ້ 992 ຄົນ, ຜູ້ຄ້າຂາຍ 212 ຄົນ; ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ສຸມໃສ່ປະຕິບັດມາດຕະການຕ້ານການຟຸມເຟືອຍ, ຕ້ານການຮົ່ວໄຫຼຂອງລາຍຮັບ, ສົ່ງເສີມຜະລິດສະບຽງອາຫານ ແລະການຜະລິດເປັນສິນຄ້າເພື່ອຫຼຸດຜ່ອນການນຳເຂົ້າ; ຫັນພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະລຶບລ້າງຄວາມທຸກຍາກ ຕິດພັນກັບວຽກງານ 3 ສ້າງ ເພື່ອສ້າງສິ່ງອໍານວຍຄວາມສະດວກໃຫ້ການພັດທະນາເສດຖະກິດ ແລະພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.

ໂອກາດນີ້, ທ່ານ ສອນໄຊ ສີພັນດອນ ໄດ້ມີຄໍາເຫັນໂອ້ລົມ ແລະຊີ້ນໍາພະນັກງານຫຼັກແຫຼ່ງຂອງແຂວງໃຫ້ເອົາໃສ່ບາງດ້ານເປັນຕົ້ນໃຫ້ສືບຕໍ່ສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ-ລັດຖະກອນ ກໍຄືປະຊາຊົນບັນດາເຜົ່າເພື່ອເສີມຂະຫຍາຍມູນເຊື້ອດຸໝັ່ນຂະຫຍັນພຽນ, ມີຄວາມສາມັກຄີເປັນປຶກແຜ່ນ ແລະ ມີຄວາມເປັນເອກະພາບໃນການປະຕິບັດແນວທາງນະໂຍບາຍຂອງພັກ ແລະລັດຖະບານ; ຍົກສູງສະຕິລະວັງຕົວ, ມີສະຕິຕໍ່ອິດທິກໍາລັງປໍລະປັກ ແລະຄົນທີ່ບໍ່ຫວັງດີຕໍ່ພັກ-ລັດ, ກໍາໄດ້ຫາງສຽງສັງຄົມ, ບໍລິໂພກຂໍ້ມູນຂ່າວສານຢ່າງມີສະຕິ ໂດຍສະເພາະຂໍ້ມູນຂ່າວສານຜ່ານສື່ອອນລາຍຕ່າງໆ, ເພີ່ມທະວີການແກ້ໄຂປະກົດການຫຍໍ້ທໍ້ໃນສັງຄົມໃຫ້ຫຼຸດລົງເທື່ອລະກ້າວ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການປະຕິບັດວາລະແຫ່ງຊາດ ກໍຄື ວຽກງານບູລິມະສິດ, ວຽກຈຸດສຸມໃຫ້ມີການຫັນປ່ຽນຢ່າງຕັ້ງໜ້າໂດຍຢຶດໝັ້ນຫຼັກການນໍາພາຂອງພັກ ແລະການຄຸ້ມຄອງລັດ ດ້ວຍລະບຽບກົດໝາຍ; ເອົາໃຈໃສ່ດຶງດູດການລົງທຶນ,ຊຸກຍູ້ສົ່ງເສີມການຜະລິດສະບຽງອາຫານ, ການຜະລິດເປັນສິນຄ້າຕາມທ່າແຮງບົ່ມຊ້ອນເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ, ເກັບລາຍຮັບ, ຄຸ້ມຄອງລາຍຈ່າຍງົບປະມານ,ປະຕິບັດມາດຕະການປະຢັດ, ຕ້ານການຟຸມເຟືອຍ;ສືບຕໍ່ຫັນພະນັກງານລົງກໍ່ສ້າງຮສກຖານການເມືອງ, ພັດທະນາຊົນນະບົດ ແລະລຶບລ້າງຄວາມທຸກຍາກຕາມທິດ 3 ສ້າງ ເພື່ອແນໃສ່ແກ້ໄຂຄວາມທຸກຍາກຂອງປະຊາຊົນໃຫ້ຫຼຸດໜ້ອຍຖອຍລົງ ແລະຍູ້ແຮງການພັດທະນາເສດຖະກິດ-ສັງຄົມຂອງແຂວງໃຫ້ດີຂຶ້ນເປັນກ້າວໆ.

แชร์