ເຊັນສັນຍາບົດບັນທຶກຄວາມເຂົ້າໃຈຮ່ວມມືດ້ານການຄ້າ ແລະເສດຖະກິດ

ວັນທີ 6 ພະຈິກ 2022 ທີ່ນະຄອນຊຽງໄຮ້ ສປ ຈີນ ກົມສົ່ງເສີມການຄ້າ, ກະຊວງອຸດສາຫະກໍາ ແລະການຄ້າ ແຫ່ງ ສປປ ລາວ ແລະອົງການປົກຄອງປະຊາຊົນ ເຂດຢາງພູ, ນະຄອນຊຽງໄຮ້ ແຫ່ງ ສປ ຈີນ ໄດ້ຈັດພິທີເຊັນສັນຍາບົດບັນທຶກຄວາມເຂົ້າໃຈການຮ່ວມມືດ້ານການຄ້າ ແລະເສດຖະກິດ ເພື່ອສືບຕໍ່ເສີມຂະຫຍາຍໝາກຜົນອັນຫຼວງຫຼາຍຂອງການວາງສະແດງສິນຄ້ານຳເຂົ້າສາກົນຈີນ, ສ້າງເວທີການຮ່ວມມືລະດັບສູງໃນດ້ານເສດຖະກິດ-ການຄ້າ, ຊ່ວຍໃຫ້ນະຄອນຊຽງໄຮ້ເປັນຈຸດສູນກາງ ທີ່ຮັບໃຊ້ໃຫ້ແກ່ “ໜຶ່ງແລວ-ໜຶ່ງເສັ້ນທາງ” ໃຫ້ກຽດລົງນາມໂດຍ Mr. Khouanchay IEMSOUTHI, ທີ່ປຶກສາທູດເສດຖະກິດ-ການຄ້າລາວ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ ແລະ Ms. Fang SHI, ຮອງເຈົ້າເມືອງເຂດຢາງພູ ນະຄອນຊຽງໄຮ້ ສປ ຈີນ, ມີ Mr. Kan XUE, ເຈົ້າເມືອງເຂດຢາງພູ ນະຄອນຊຽງໄຮ້ ສປ ຈີນ, Mr. Zhisong LUO, ທີ່ປຶກສາດ້ານເສດຖະກິດຂອງພະແນກການຄ້າ ນະຄອນຊຽງໄຮ້ ສປ ຈີນ, Mr. Jie FAN, ຫົວໜ້າຫ້ອງການການຄ້ານຂອງເຂດຢາງພູ ນະຄອນຊຽງໄຮ້ ສປ ຈີນ(ເຂົ້າຮ່ວມເປັນສັກຂີພະຍານ), Mr. Mithouna LATSACHANH, ຮອງກົງສຸນ ສປປ ລາວ ປະຈໍາ ນະຄອນຊຽງໄຮ້ ສປ ຈີນ (ຕາງໜ້າ ທ່ານກົງສຸນໃຫຍ່ ປະຈໍາ ຊຽງໄຮ້ ເຂົ້າຮ່ວມເປັນສັກຂີພະຍານ), Mr. Guowu XU，ຮອງປະທານສະພາການຄ້າຈີນປະຈໍາ ສປປ ລາວເຂົ້າຮ່ວມເປັນສັກຂີພະຍານ.

ໃນປະຫວັດສາດຂອງຈີນ ໄດ້ມີ “ໝາກປິງປ່ອງໜ່ວຍໜຶ່ງ” ທີ່ຂັບເຄື່ອນສອງປະເທດມະຫາອຳນາດ ຄືຈີນ ແລະອາເມລິກາ, ເຊິ່ງເຮັດໃຫ້ສາຍພົວພັນແບບໜາວເຢັນລະຫວ່າງຈີນ ແລະ ອາເມລິກາສິ້ນສຸດລົງ, ໄດ້ສ້າງ ຕຳນານປະຫວັດສາດຄື “ການທູດປິ່ງປ່ອງ”. ໃນມື້ນີ້ພວກເຮົາຖືເອົາ “ເຂົ້າໜຶ່ງເມັດ” “ເຫຼັກລາງລົດໄຟໜຶ່ງເສັ້ນ” ເພື່ອມຸ່ງໝັ້ນໃນການສ້າງຄູ່ຮ່ວມຊາຕາກຳ ຈີນ-ລາວ, ປະຫວັດສາດອັນຍິ່ງໃຫຍ່ກຳລັງຈະຊໍ້າຮອຍ. ເຂດຢາງພູ ລົງເລິກຈັດຕັ້ງປະຕິບັດຕາມທິດຊີ້ນຳຂອງປະທານ ສີຈີ້ນຜິງ ກ່ຽວກັບ “ການສືບຕໍ່ສ້າງຄູ່ຮ່ວມຊາຕາກຳ ຈີນ-ລາວ ທີ່ໜັກແໜ້ນ ບໍ່ສາມາດຕັດແຍກອອກຈາກກັນ”, ນຳໃຊ້ເວທີງານວາງສະແດງສິນຄ້ານຳເຂົ້າສາກົນຈີນ ເພື່ອຍົກສູງສາຍພົວພັນການຮ່ວມມືກັບກົມສົ່ງເສີມການຄ້າ,ກະຊວງອຸດສາຫະກຳ ແລະການຄ້າ ສປປ ລາວ ຢ່າງຮອບດ້ານຕື່ນຕົວໃນການປະສານສົມທົບ, ປຶກສາຫາລືກັນຢ່າງສະໜິດແໜ້ນ, ຮ່ວມມືກັນຢ່າງເລິກເຊິ່ງ, ຈິ່ງເຮັດໃຫ້ປະສົບຜົນສຳເລັດໃນການລົງນາມ “ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືກໍ່ສ້າງເວທີປາໄສ ການຮ່ວມມືດ້ານ ເສດຖະກິດ-ການຄ້າ ລະດັບສູງ” ກັບກົມສົ່ງເສີມການຄ້າ, ກະຊວງອຸດສາຫະກຳ ແລະການຄ້າ ສປປ ລາວ.

ການລົງນາມບົດບັນທຶກຄວາມເຂົ້າໃຈຄັ້ງນີ້ແມ່ນການດຳເນີນການຕາມ “ສັນຍາຄູ່ ຮ່ວມມືເສດຖະກິດພາກພື້ນຮອບດ້ານ” (RCEP), ການດຳເນີນການຕາມ RCEP ໄດ້ກະຕຸ້ນຄວາມຄາດຫວັງ ຂອງບັນດາປະເທດອາຊຽນ ໃນການແບ່ງປັນຜົນສຳເລັດຂອງການພັດທະນາ ແລະເປີດກ້ວາງຂອງຈີນ, ພ້ອມທັງເພີ່ມທະວີການຮ່ວມມືໃນການສ້າງ “ໜຶ່ງແລວ-ໜຶ່ງເສັ້ນທາງ”. ບັນດາປະເທດອາຊຽນແມ່ນຄູ່ຮ່ວມມືດ້ານການຄ້າອັນດັບໜຶ່ງຂອງຈີນ, ການຮ່ວມມືຢ່າງເລິກເຊິ່ງຂອງສອງຝ່າຍຈະເປັນກຳລັງແຮງໃນ ການຊຸກຍູ້ການເຊື່ອມໂຍງ ເຊິ່ງກັນ ແລະກັນ ຂອງພາກພື້ນ, ເປັນການປົດປ່ອຍທ່າແຮງບົ່ມຊ້ອນດ້ານການຕະຫຼາດຢ່າງເຕັມທີ່ພາຍຫຼັງເຂົ້າຮ່ວມ RCEP, ເພີ່ມແຮງຊຸກຍູ້ອັນໃໝ່ໃນການສົ່ງເສີມການພັດທະນາ ແລະຄວາມສີວິໄລຂອງພາກພື້ນ, ປະກອບສ່ວນກຳລັງແຮງອັນໃໝ່ໃນການຟື້ນຟູການເຕີບໂຕຂອງເສດຖະກິດໂລກ. ນະຄອນຊຽງໄຮ້ ແມ່ນເປັນແຖວໜ້າຂອງການປະຕິຮູບ ແລະເປີດປະຕູສູ່ພາຍນອກຂອງປະເທດ, ຊຶ່ງໄດ້ແບກຮັບໜ້າທີ່ອັນສຳຄັນຂອງທົ່ວປະເທດ ຫຼືອາດຈະໃນທົ່ວໂລກ, ພ້ອມທັງກຳລັງມີການຊຸກຍູ້ການສ້າງ “ ຫ້າສູນກາງ”.

ການລົງນາມບົດບັນທຶກຄວາມເຂົ້າໃຈໃນຄັ້ງນີ້ໂດຍພື້ນຖານແລ້ວກໍແມ່ນການປະຕິບັດງານຕົວຈິງຂອງເຂດຢາງພູ ເພື່ອຮັບໃຊ້ນະຄອນຊຽງໄຮ້ ແລະນະຄອນຊຽງໄຮ້ຮັບໃຊ້ໃຫ້ແກ່ທົ່ວປະເທດຈີນ, ຊຶ່ງສະໜອງເວທີອັນໃໝ່ ແກ່ນະຄອນຊຽງໄຮ້ ໃນການສ້າງຈຸດສູນກາງຂອງຕະຫຼາດທົ່ວປະເທດທີ່ເອກະພາບ ແລະການເຊື່ອມໂຍງທາງດ້ານຍຸດທະສາດລະຫວ່າງ ການໝູນວຽນແບບຄູ່ພາຍໃນ ແລະຕ່າງປະເທດ, ພ້ອມທັງສ້າງແນວທາງປະຕິບັດໃໝ່ໃຫ້ແກ່ນະຄອນຊຽງໄຮ້ເປັນຈຸດສູນກາງທີ່ຮັບໃຊ້ໃຫ້ແກ່ “ໜຶ່ງແລວ-ໜຶ່ງເສັ້ນທາງ”, ພ້ອມດຽວກັນນັ້ນ ຍັງໄດ້ສະໜອງ “ແນວທາງຂອງຢາງພູ” ໃນການລົງເລິກຈັດຕັ້ງປະຕິບັດ ຂໍ້ລິເລີ່ມ “ໜຶ່ງແລວ-ໜຶ່ງເສັ້ນທາງ” ແລະ RCEP ໃນພາກພື້ນອາຊີຕາເວັນອອກສ່ຽງໃຕ້.

ການກໍ່ສ້າງ ແລະເປີດນຳໃຊ້ເສັ້ນທາງລົດໄຟ ຈີນ-ລາວ ໄດ້ສ້າງໂອກາດ ແລະເງື່ອນໄຂທີ່ດີໃຫ້ແກ່ການລົງນາມບົດບັນທຶຶກຄວາມເຂົ້າໃຈວ່າດ້ວຍການຮ່ວມມືໃນຄັ້ງນີ້ຢ່າງສຳເລັດຜົນ. ປະເທດລາວເປັນ ປະເທດໃນອາຊີຕາເວັນອອກສ່ຽງໃຕ້ ທີ່ບໍ່ມີທາງອອກສູ່ທະເລ, ການເປີດນຳໃຊ້ເສັ້ນທາງລົດໄຟ ລາວ-ຈີນ ໄດ້ຫັນ ປ່ຽນປະເທດລາວ ຈາກ “ປະເທດບໍ່ມີທາງອອກສູ່ທະເລ” ເປັນ “ປະເທດເຊື່ອມໂຍງກັບພາກພື້ນ” ໂດຍສິ້ນເຊີງ, ຊຶ່ງຊຸກຍູ້ການເປີດກ້ວາງຕະຫຼາດທີ່ມີປະຊາກອນ 1,4 ຕື້ຄົນ ຂອງຈີນຕໍ່ປະເທດລາວ, ພ້ອມນັ້ນ ນັບແຕ່ວັນທີ 03 ທັນວາ ທີ່ເປີດນຳໃຊ້ທາງລົດໄຟຕະຫຼອດສາຍທາງເປັນຕົ້ນມາ (ເຖິງເດືອນກັນຍາ 2022), ການຂົນສົ່ງສິນຄ້າສາ ກົນຂອງທາງລົດໄຟ ຈີນ-ລາວ ມີຍອດມູນຄ່າຫຼາຍກວ່າ 10 ຕື້ຢວນ, ບົດບາດຂອງເສັ້ນທາງຄຳ ໄດ້ນັບມື້ນັບປະກົດຜົນເປັນຈິງ. ທາງລົດໄຟ ຈີນ-ລາວ ຈະເປັນເສັ້ນທາງຄຳ ແລະສາຍເລືອດໃຫຍ່ໃນການຫຼຸດພົ້ນອອກຈາກຄວາມທຸກຍາກຂອງ ສປປ ລາວ ເປັນ “ເສັ້ນທາງແຫ່ງການຂົນສົ່ງຂອງຊາດ”.

ການລົງນາມບົດບັນທຶກຄວາມເຂົ້າໃຈຍິ່ງສົ່ງເສີມບົດບາດຕັດສິນຂອງຕະຫຼາດຕໍ່ການຈັດສັນຊັບພະຍາກອນ, ພ້ອມທັງເພີ່ມທະວີຄວາມສາມາດຂອງຊຽງໄຮ້ໃນການຈັດສັນຊັບພະຍາກອນສາກົນ. ປະເທດລາວ ມີພື້ນຖານດ້ານນິເວດກະສິກຳ ແລະມີທ່າແຮງບົ່ມຊ້ອນໃນການພັດທະນາທີ່ດີ, ມີຄວາມສອດຄ່ອງທີ່ສຸດກັບຄວາມຕ້ອງການອັນໃຫຍ່ຫຼວງຂອງຊຽງໄຮ້ ຕໍ່ກັບຜະລິດຕະພັນກະສິກຳຄຸນນະພາບສູງ, ນະຄອນຊຽງໄຮ້ ເປັນສູນກາງການຂົນສົ່ງສາກົນໃຫຍ່ທີ່ສຸດຂອງໂລກໃນດ້ານການຂົນສົ່ງດ້ວຍຕູ້ຄອນເທັນເນີ 12 ປີ ຕິດຕໍ່ກັນ, ຊຶ່ງຈະກາຍເປັນສ່ວນທີ່ເຕີມເຕັມທີ່ດີ ໃຫ້ແກ່ການບໍ່ມີທາງອອກສູ່ທະເລຂອງປະເທດລາວ. ທາງລົດໄຟ ຈີນ-ລາວ ສາມາດກາຍເປັນຂົວເຊື່ອມຕໍ່ອັນສຳຄັນ ທີ່ມີທ່າແຮງໃນການເຊື່ອມໂຍງນະຄອນຊຽງໄຮ້ ກັບ ສປປລາວ , ເຮັດໃຫ້ຜະລິດຕະພັນກະສິກຳທີ່ມີຄຸນນະພາບສູງຂອງ ສປປລາວ ສາມາດຂົນສົ່ງມາເຖິງນະຄອນຊຽງໄຮ້ ພາຍໃນ 24 ຊົ່ວໂມງໄດ້ກາຍເປັນຄວາມຈິງ, ທັງເຮັດໃຫ້ທ່າແຮງດ້ານອຸດສາຫະກຳ, ເງິນທຶນ, ເຕັກໂນໂລຊີ, ຂໍ້ມູນຂ່າວສານ ແລະອື່ນໆ ຂອງກຸ່ມຕົວເມືອງ “ສາມຫຼ່ຽມປາກແມ່ນ້ຳຢາງຊີ” ຊຶ່ງນຳໜ້າໂດຍຊຽງໄຮ້ ໄດ້ມີຊ່ອງທາງກ້າວອອກໄປສູ່ສາກົນ. ພ້ອມນັ້ນ, ເຂດຢາງພູຂອງພວກເຮົາແມ່ນເຂດໃຈກາງຕົວເມືອງທີ່ມີເນື້ອທີ່ໃຫຍ່ທີ່ສຸດ ແລະປະຊາກອນຫຼາຍທີ່ສຸດຂອງນະຄອນຊຽງໄຮ້, ພາຍໃນເຂດດັ່ງກ່າວມີແຫຼ່ງກຳລັງຫົວຄິດປະດິດສ້າງທີ່ອຸດົມສົມບູນ, ອຸດສາຫະກຳທີ່ເຕີບໂຕເຂັ້ມແຂງ, ເສດຖະກິດຕະຫຼາດທີ່ມີຊີວິດຊີວາ ແລະມີເວທີທີ່ເປີດຢ່າງກ້ວາງຂວາງ, ຊຶ່ງມີຄວາມສົນໃຈສ້າງໂອກາດທາງທຸລະກິດ ແລະສະແຫວງຫາການພັດທະນາຮ່ວມກັນກັບເພື່ອນສະຫາຍຈາກທົ່ວທຸກຫົນແຫ່ງ.

แชร์