ທ່ານ ສະເຫຼີມໄຊ ກົມມະສິດ ຕ້ອນຮັບທູດອາຣັບ ເອຢິບ

ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ເອມໍ ອັບເດວ ຄາເດີ (Amal Abdel Kader) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອາຣັບ ເອຢິບ ປະຈຳ ສປປ ລາວ ຊຶ່ງມີສຳນັກງານສະຖານທູດ ຕັ້ງຢູ່ຮ່າໂນ້ຍ ສສ ຫວຽດນາມ ໃນວັນທີ 9 ພະຈິກ 2022 ທີ່ກະຊວງການຕ່າງປະເທດ.

ໃນໂອກາດນີ້,ທ່ານ ສະເຫຼີມໄຊ ກົມມະສິດ ໄດ້ກ່າວສະແດງຄວາມຍິນດີຕ້ອນຮັບ ແລະຊົມເຊີຍຕໍ່ທ່ານທູດທີ່ໄດ້ຮັບການແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສາທາລະນະລັດ ອາຣັບ ເອຢິບ ປະຈຳ ສປປ ລາວ ແລະ ຕີລາຄາສູງຕໍ່ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືອັນດີລະຫວ່າງ ສປປ ລາວ ແລະ ສາທາລະນະລັດ ອາຣັບ ເອຢິບ, ນັບແຕ່ປີ 1976 ເປັນຕົ້ນມາ. ທັງສອງປະເທດແມ່ນຮັກສາໄດ້ການພົວພັນຮ່ວມມືອັນດີນຳກັນ, ມີການແລກປ່ຽນ ແລະ ສະໜັບສະໜູນຊຶ່ງກັນ ແລະ ກັນ ຢູ່ໃນເວທີພາກພື້ນ ແລະ ສາກົນ. ພ້ອມນີ້, ທັງສອງຝ່າຍເຫັນດີໃນການເສີມຂະຫຍາຍກົນໄກການປຶກສາຫາລືທາງການເມືອງລະຫວ່າງສອງກະຊວງການຕ່າງປະເທດໃຫ້ເປັນຮູບປະທຳຂຶ້ນຕື່ມ. ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ອາຣັບ ເອຢິບ ທີ່ໄດ້ໃຫ້ທຶນການສຶກສາໄລຍະສັ້ນ ຈຳນວນໜຶ່ງແກ່ ສປປ ລາວ ໃນໄລຍະປີ 2022-2023 ຊຶ່ງເປັນການປະກອບສ່ວນອັນສໍາຄັນເຂົ້າໃນການພັດທະນາຊັບພະຍາກອນມະນຸດຂອງ ສປປ ລາວ ໂດຍສະເພາະແມ່ນການສຶກສາໃນຂົງເຂດກະສິກຳ. ພ້ອມທັງໄດ້ຊຸກຍູ້ໃຫ້ມີການພົບປະແລກປ່ຽນຂອງການນຳສອງຝ່າຍໃຫ້ຫຼາຍຂຶ້ນ,ເສີມຂະຫຍາຍການຮ່ວມມືໃນຂະແໜງການຕ່າງໆ ເປັນຕົ້ນດ້ານການຄ້າ, ການລົງທຶນ, ພະລັງງານ-ບໍ່ແຮ່, ອຸດສາຫະກຳ, ກະສິກຳ, ການສຶກສາ, ການທ່ອງທ່ຽວ ແລະ ອື່ນໆ ທີ່ສອງຝ່າຍມີທ່າແຮງຮ່ວມກັນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງປະເທດ ລາວ-ເອຢິບ.

ທ່ານທູດ ອາຣັບ ເອຢິບ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນພ້ອມທັງສະແດງຄວາມຍິນດີຈະສືບຕໍ່ຊຸກຍູ້ສົ່ງເສີມການພົວພັນຮ່ວມມືລະຫວ່າງສອງປະເທດ ລາວ-ເອຢິບ ໃຫ້ນັບມື້ໄດ້ຮັບການເສີມຂະຫຍາຍຂຶ້ນສູ່ບາດກ້າວໃໝ່ໃນອະນາຄົດ.
ຂ່າວ-ພາບ: ກະຊວງການຕ່າງປະເທດ

แชร์