ເວທີສົນທະນາ "ລາວ-ຈີນ ຮ່ວມຊາຕາກໍາ ເລີ່ມກ້າວເດີນໄປໜ້າອີກຄັ້ງໃໝ່"

ສະມາຄົມນັກຂ່າວແຫ່ງ ສປປ ລາວ ຮ່ວມກັບສະຖານີວິທະຍຸໂທລະພາບສູນກາງຈີນ (CMG) ປະຈໍາ ລາວ ໄດ້ຈັດເວທີສົນທະນາໃນຫົວຂໍ້: "ລາວ-ຈີນ ຮ່ວມຊາຕາກໍາ ເລີ່ມກ້າວເດີນໄປໜ້າອີກຄັ້ງໃໝ່" ໃນວັນທີ 9 ພະຈິກ 2022, ທີ່ນະຄອນຫລວງວຽງຈັນ ຊຶ່ງຈັດຂຶ້ນໃນຮູບແບບເຊິ່ງໜ້າ ແລະ ຜ່ານອອນລາຍໂດຍມີ ທ່ານ ສະຫວັນຄອນ ລາຊະມົນຕີ ປະທານສະມາຄົມນັກຂ່າວແຫ່ງ ສປປ ລາວ, ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາຫົວໜ້າບັນນາທິການສຳນັກຂ່າວ, ໜັງສືພິມ, ພ້ອມດ້ວຍສື່ມວນຊົນລາວ ແລະ ວິທະຍາກອນເຂົ້າຮ່ວມ ເພື່ອເປັນການເຜີຍແຜ່ຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XX ຂອງພັກກອມມູນິດຈີນ, ເຊິ່ງຜົນສຳເລັດດັ່ງກ່າວບໍ່ພຽງແຕ່ເປັນຂອງພັກ, ປະເທດຊາດ ແລະ ປະຊາຊາດຈີນເທົ່ານັ້ນ, ຫາກຍັງເປັນຜົນສໍາເລັດຂອງມວນມະນຸດຊາດທີ່ຮັກຫອມສັນຕິພາບ ໂດຍສະເພາະ ລາວ-ຈີນ ແມ່ນຄູ່ຮ່ວມຊະຕາກຳດຽວກັນ, ຍິ່ງຈະຕ້ອງໄດ້ຮັບຮູ້ ແລະເຂົ້າໃຈຢ່າງເລິກເຊິ່ງ.

ທ່ານ ສະຫວັນຄອນ ລາຊະມົນຕີ ໄດ້ກ່າວວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນທີ່ຫາກໍສິ້ນສຸດລົງໄດ້ຊີ້ທິດເຍືອງທາງ ແລະ ກຳນົດທິດທາງການເຄື່ອນໄຫວໃຫ້ປະເທດຈີນເພື່ອບັນລຸເປົ້າໝາຍສູ້ຊົນຮອບຮ້ອຍປີປະການທີສອງ ໃນຂະບວນການອອກເດີນທາງຄັ້ງໃໝ່ໃນຍຸກໃໝ່, ທັງໄດ້ສະໜອງໂອກາດສຳຄັນໃຫ້ແກ່ປະຊາຄົມໂລກ, ການຊອກຮູ້ການປົກຄອງປະເທດ ແລະ ການຄຸ້ມຄອງລັດຂອງພັກກອມມູນິດຈີນຕື່ມອີກ. ໃນນັ້ນ, “ການຫັນເປັນທັນສະໄໝແບບຈີນ” ໄດ້ຮັບຄວາມສົນໃຈໃນລະດັບສູງຈາກນັກສັງເກດການສາ ກົນ. ກອງປະຊຸມໃຫຍ່ໄດ້ກຳນົດຄວາມເປັນສີສັນພິເສດຂອງຈີນ ແລະ ຄວາມຮຽກຮ້ອງທີ່ເປັນທາດແທ້ຂອງການຫັນເປັນທັນສະໄໝແບບຈີນ, ໄດ້ວາງແຜນຍຸດທະສາດໃນການກໍ່ສ້າງປະເທດສັງຄົມນິຍົມທີ່ທັນສະໄໝ, ເຂັ້ມແຂງຢ່າງຮອບດ້ານ ແລະຊຸກຍູ້ການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ ຂອງຊົນຊາດຈີນຢ່າງຮອບດ້ານ. ເສັ້ນທາງໃໝ່ຄວາມເປັນທັນສະໄໝຂອງປະເທດຈີນທີ່ໄດ້ຮັບຜົນສຳເລັດ, ໄດ້ແກ້ໄຂບັນຫາຫຍຸ້ງຍາກຫລາຍຢ່າງໃນການພັດ ທະນາສັງຄົມມວນມະນຸດ ແລະ ກໍເປັນທາງເລືອກໃໝ່ໃນການບັນລຸຄວາມເປັນທັນສະໄໝຂອງມວນມະນຸດ.

ທ່ານ ຈຽງ ຈ່າຍ ຕົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ມີຄຳເຫັນຜ່ານວີດີໂອ ວ່າ: ໃນຍຸກຂໍ້ມູນຂ່າວສານທີ່ວິທະຍາສາດເຕັກນິກມີການພັດທະນາຢ່າງວ່ອງໄວ, ສື່ມວນຊົນ ໂດຍສະເພາະແມ່ນສື່ມວນຊົນທາງການ ຍິ່ງມີບົດບາດອິດທິພົນພົ້ນເດັ່ນກວ່າຍາມໃດໝົດ, ບັນດາທ່ານທີ່ມາຮ່ວມກອງປະຊຸມມື້ນີ້ ລ້ວນແຕ່ມີບົດບາດສຳຄັນໃນການນໍາສະເໜີຂ່າວຄວາມເປັນຈິງ, ສະແດງທັດສະນະ ແລະ ນຳພາຫາງສຽງ. ປະເທດຈີນ ແລະ ປະເທດລາວ ມີດິນແດນຕິດຕໍ່ກັນ, ມີລະບຽບການຄ້າຍຄືກກັນ, ວັດທະນະທຳກໍມີຈຸດຄືກັນ, ສະນັ້ນສອງຝ່າຍລົງເລິກການຮ່ວມມືດ້ານສື່ມວນຊົນແມ່ນມີພື້ນຖານໜັກແໜ້ນ ແລະມີທ່າແຮງທີ່ດີ.ຂ້າພະເຈົ້າເຊື່ອໝັ້ນວ່າສື່ມວນຊົນຂອງທັງສອງປະເທດ ຈີນ-ລາວ ຍ່ອມຈະເສີມຂະຫຍາຍທ່າແຮງຂອງຕົນຢ່າງເຕັມສ່ວນ,ແຈ້ງຂ່າວ ແລະເລົ່າເລື່ອງລາວກ່ຽວກກັບການແລກປ່ຽນກັນ, ການໄປມາຫາສູ່ກັນ ແລະ ການຊ່ວຍຊູຍູ້ໜູນກັນລະຫວ່າງສອງພັກ ສອງລັດ ກໍຄື ປະຊາຊົນສອງຊາດ ຈີນ-ລາວ ໃຫ້ດີກວ່າເກົ່າເພື່ອໃຫ້ມິດຕະພາບອັນເປັນມູນເຊື້ອ ແລະນໍ້າໃຈຄູ່ຮ່ວມຊະຕາກຳລະຫວ່າງສອງປະເທດບົນຂະບວນການໃໝ່ຍິ່ງໄດ້ລົງເລິກເຂົ້າເຖິງຈິດໃຈປະຊາຊົນສອງປະເທດ.

แชร์