ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ

ເນື່ອງໃນໂອກາດການເປີດນຳໃຊ້ເສັ້ນທາງລົດໄຟລາວ-ຈີນ ຄົບຮອບ 1 ປີ ໃກ້ມາເຖິງນີ້, ສະມາຄົມນັກປະພັນລາວ ແລະ ສະຖານີວິທະຍຸໂທລະພາບສູນກາງຈີນ ປະຈຳ ສປປ ລາວ ໄດ້ຈັດງານຖະແຫຼງຂ່າວໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ຂຶ້ນໃນວັນທີ 8 ພະຈິກຜ່ານມາທີ່ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະທ່ອງທ່ຽວ, ມີທ່ານ ບົວເງິນ ຊາພູວົງ ປະທານສະມາຄົມສິລະປິນແຫ່ງຊາດລາວຄະນະກຳມະການສະມາຄົມມິດຕະພາບລາວ-ຈີນ, ມີບັນດານັກປະພັນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ໂພສີ ແກ້ວມະນີວົງ ໄດ້ກ່າວວ່າ: ໃນວັນທີ 14- 23 ພະຈິກນີ້ ຈະມີນັກປະພັນ, ນັກກະວີ, ນັກຖ່າຍພາບ, ນັກແຕ້ມ ແລະນັກຂ່າວລາວ ປະມານ 30 ທ່ານ ເດີນທາງໂດຍລົດໄຟລາວ-ຈີນ ເພື່ອເອົາປະສົບການກ່ຽວກັບການປ່ຽນແປງດ້ານຊີວິດການເປັນຢູ່ຂອງປະຊາຊົນ ທີ່ອາໄສຢູ່ຕາມເສັ້ນທາງລົດໄຟສາຍດັ່ງກ່າວ ແລ້ວປະດິດແຕ່ງຜົນງານທີ່ກ່ຽວຂ້ອງປະກາດຜ່ານທາງໜ້າເຟສບຸກຂອງວິທະຍຸໂທລະພາບສູນກາງຈີນ FM93 ຄື: cri-FM 93 ແລະໜ້າເວັບໄຊພາສາລາວ: laos@cri.cn ກໍຄືສື່ຕ່າງໆຂອງລາວ. ນອກນີ້, ຜົນງານດີເດັ່ນຂອງບັນດາທ່ານຍັງຈະຮັບການຄັດເລືອກ ແລະຮຽບຮຽງໃຫ້ເປັນປຶ້ມເພື່ອພິມຈຳໜ່າຍໃນເດືອນເມສາ ປີ 2023 ເພື່ອເປັນການສະເຫຼີມສະຫຼອງການສະເໜີຂໍ້ລິເລີ່ມໜຶ່ງແລວໜຶ່ງເສັ້ນທາງ ຄົບຮອບ 10 ປີ.

ໂອກາດນີ້, ທ່ານ ທອງໃບ ໂພທິສານ ປະທານສະມາຄົມນັກປະພັນລາວ ກ່າວວ່າ: ໃນຕະຫຼອດໄລຍະຂອງການເດີນທາງທາງລົດໄຟທີ່ຍາວໄກເຕັມໄປດ້ວຍບັນຍາກາດທີ່ຕື່ນເຕັ້ນ, ຄຶກຄື້ນ, ຟົດຟື້ນ ແລະມ່ວນຊື່ນໃນຄັ້ງນີ້, ບັນດານັກປະພັນ, ນັກກະວີທັງໝົດຈະໄດ້ສໍາຜັດກັບເຫດການຕົວຈິງຜ່ານ 5 ແຂວງທີ່ແລວທາງລົດໄຟລາວ-ຈີນຜ່ານເປັນຕົ້ນ: ນະຄອນຫຼວງວຽງຈັນ, ແຂວງວຽງຈັນ, ຫຼວງພະບາງ, ອຸດົມໄຊ ແລະຫຼວງນໍ້າທາ ໂດຍສໍາພາດ ແລະເກັບກໍາຂໍ້ມູນຕາມສະຖານີຕ່າງໆ ຢູ່ແຕ່ລະແຂວງເພື່ອນໍາມາຂຽນເປັນບົດປະພັນວັນນະຄະດີ: ກະວີ, ບົດບັນທຶກ ແລະ ບົດເລື່ອງສັ້ນ. ຄາດຄະເນໄວ້ວ່າຜ່ານການເຄື່ອນໄຫວໂຄງການໃນຄັ້ງນີ້ຈະໄດ້ບົດເລື່ອງທັງໝົດ 15-20 ບົດ ຊຶ່ງທັງໝົດນີ້ ທາງສະຖານີວິທະຍຸໂທລະພາບສູນກາງຈີນປະຈໍາລາວຜູ້ເປັນເຈົ້າຂອງໂຄງການຈະໄດ້ທໍາການຮີບໂຮມ ແລະຈັດພິມເປັນປຶ້ມເພື່ອໂຄສະນາເຜີຍແຜ່ຕໍ່ໄປ.

ທ່ານ ນາງ ແສງແກ້ວ (MO XiaoLing) ຫົວໜ້າສະຖານີວິທະຍຸໂທລະພາບສູນກາງຈີນ (CMG) ປະຈຳລາວ ກ່າວວ່າ: ໂຄງການດັ່ງກ່າວນີ້ເຊື່ອວ່າຈະເຮັດໃຫ້ຄົນຮູ້ຈັກຫຼາຍຂຶ້ນ ແລະສາມາດເຮັດໃຫ້ຜູ້ມາຂີ່ລົດໄຟເຫັນໄດ້ທີວທັດທີ່ສວຍງາມ, ໄດ້ຮູ້ເລື່ອງລາວທີ່ກະຕຸ້ນໃຈຢູ່ຕາມເສັ້ນທາງລົດໄຟດັ່ງກ່າວ, ທັງເຮັດໃຫ້ຄົນຈີນ, ຄົນລາວ ກໍຄືປະຊາຊົນໃນທົ່ວໂລກໄດ້ມາຂີ່, ມາສໍາຜັດຕົວຈິງ ແລະເກີດມີຄວາມມັກຮັກຕໍ່ເສັ້ນທາງລົດໄຟສາຍດັ່ງກ່າວ.
ຂ່າວ: ວັນເພັງ, ພາບ: ຍຸພິນທອງ

แชร์