ທູດລາວ ປະຈຳ ສສ ຫວຽດນາມຢ້ຽມຢາມ ແລະເຮັດວຽກຢູ່ ແຂວງນິງບິ່ງ

ໃນວັນທີ 7 ພະຈິກ 2022 ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມຄະນະ ໄດ້ເດີນ ທາງໄປຢ້ຽມຢາມ ແລະ ເຮັດວຽກຢູ່ແຂວງນິງບິ່ງ ໂດຍໄດ້ພົບປະ ແລະ ເຮັດວຽກກັບ ສະຫາຍ ນາງ ຫງວຽນ ທິ ທູ ຮ່າ ກຳມະການສູນກາງພັກ, ເລຂາພັກແຂວງ, ຊຶ່ງການພົບປະຄັ້ງນີ້ມີ ສະຫາຍ ຟາມ ກວາງ ຫງອກ ຮອງເລຂາພັກແຂວງປະທານຄະນະກໍາມະການປະຊາຊົນ ແຂວງນິງບິ່ງ, ມີການນໍາ ແຂວງເຂົ້າຮ່ວມຢ່າງ, ໃນການຕ້ອນຮັບຄັ້ງນີ້ ການນຳແຂວງກໍໄດ້ຕີລາຄາສູງ ທີ່ ສະຫາຍ ເອກອັກຄະ ລັດຖະທູດ ພ້ອມຄະນະໄດ້ເດີນທາງໄປຢ້ຽມຢາມ ແລະເຮັດວຽກຢູ່ແຂວງນິງບິ່ງໃນ ທ່າມກາງ ບັນຍາກາດທີ່ສອງປະເທດ ພວມຈັດກິດຈະກໍາຕ່າງໆ ເພື່ອພ້ອມກັນສະເຫຼີມສະຫຼອງ ປີສາມັກຄີ ມິດຕະພາບ ລາວ-ຫວຽດນາມ 2022 ເພື່ອຫວນຄືນສອງ ວັນປະຫວັດສາດທີ່ສຳຄັນ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05/09/1962-05/09/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/07/1977-18/07/2022).

ໂອກາດນີ້, ສະຫາຍ ນາງ ຫງວຽນ ທິ ທູ ຮ່າ ກໍໄດ້ລາຍງານໂດຍຫຍໍ້ກ່ຽວກັບສະພາບການພັດທະນາເສດຖະກິດສັງຄົມຂອງແຂວງໃນໄລຍະຜ່ານມາ. ພ້ອມທັງໄດ້ແຈ້ງໃຫ້ຊາບການ ພົວພັນ ຮ່ວມມືກັບ ສປປ ລາວ ໂດຍສະເພາະແຂວງນິງບິ່ງ ໄດ້ເຊັນບົດບັນທຶກການແຮກສ່ຽວ ກັບແຂວງອຸດົມໄຊຂອງລາວ. ພ້ອມທັງແຈ້ງໃຫ້ຊາບກ່ຽວກັບໂຄງການຊ່ວຍເຫລືອຂອງແຂວງນິງບິ່ງໃຫ້ແຂວງອຸດົມໄຊໃນໄລຍະຜ່ານມາເຊັ່ນ: ການໃຫ້ທຶນການສຶກສາ. ພ້ອມນີ້, ສະຫາຍເລຂາແຂວງຍັງໃຫ້ຄວາມເຊື່ອໝັ້ນວ່າ ໃນໄລຍະທີ່ສະຫາຍເອກອັກຄະລັດຖະທູດ ມາດຳລົງຕຳແໜງຢູ່ ສສ ຫວຽດນາມ ຈະສືບຕໍ່ເປັນຂົວຕໍ່ທີ່ສຳຄັນໃນການປະສານງານລະຫວ່າງສອງປະເທດ ໂດຍສະເພາະແມ່ນແຂວງນິງບິ່ງ ແລະ ແຂວງອຸດົມໄຊ ແລະບັນດາແຂວງພາກເໜືອຂອງລາວ.

ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງພ້ອມທັງສະແດງຄວາມຊົມເຊີຍ ໝາກຜົນການພັດທະນາເສດ ຖະກິດ-ສັງຄົມ ໃນໄລຍະຜ່ານມາຂອງແຂວງເຊັ່ນ: ທາງດ້ານການເມືອງ, ປ້ອງກັນຊາດ, ປ້ອງກັນຄວາມສະຫງົບ, ການພັດທະນາພຶ້ນຖານໂຄງລ່າງ ແລະ ການພັດທະນາເສດຖະກິດຂອງແຂວງນິງບິ່ງມີການພັດທະນາແບບໄວວາ ໂດຍສະເພາະ ຂະແໜງອຸດສາຫະກຳນຳໜ້າ ຕໍ່ມາແມ່ນຂະແໜງການບໍລິການ ແລະ ທ່ອງທ່ຽວ, ຊຶ່ງບັນດາຜົນສຳເລັດດັ່ງກ່າວ ກໍໄດ້ສະແດງ ໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມສາມາດໃນການນຳພາ-ຊີ້ນຳຂອງອົງຄະນະພັກ, ອຳນາດການປົກຄອງ ແລະ ການເປັນ ຈິດໜຶ່ງໃຈດຽວຂອງປະຊາຊົນແຂວງນິງບິ່ງ. ພ້ອມທັງຕີລາຄາສູງການພົວພັນຮ່ວມມືລະຫວ່າງສອງປະເທດໂດຍສະເພາະແມ່ນປີ 2022 ເປັນປີສາມັກຄີມິດຕະພາບລາວ-ຫວຽດນາມ, ການນຳແຂວງນິງບິ່ງກໍໄດ້ໄປເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງອຸດົມໄຊ, ນອກຈາກນັ້ນຍັງໄດ້ປະສານສົບທົບການຮ່ວມມືກັບບັນດາແຂວງແຮກສ່ຽວເຊັ່ນອຸດົມໄຊ ແລະແຂວງຫົວພັນຢ່າງຮອບດ້ານ.

ໃນວັນດຽວກັນ, ສະຫາຍເອກອັກຄະລັດຖະທູດພ້ອມດ້ວຍຄະນະຍັງໄດ້ພົບປະ, ເຮັດວຽກກັບຄະນະອຳນວຍການມະຫາວິທະຍາໄລຮົວລື ເພື່ອສະແດງຄວາມຂອບໃຈ ໃນການເອົາໃສ່ເບິ່ງແຍງ ແລະຕີລາຄາສູງການປະກອບສ່ວນຢ່າງຕັ້ງໜ້າໃນການກໍ່ສ້າງຊັບພະຍາກອນມະນຸດໃຫ້ແກ່ ສປປ ລາວ ໂດຍສະເພາະແມ່ນການກໍ່ສ້າງຊັບພະຍາ ກອນມະນຸດໃຫ້ແກ່ແຂວງອຸດົມໄຊ ພ້ອມທັງສືບ ຕໍ່ໃຫ້ເນັ້ນໜັກການກໍ່ສ້າງຊັບພະຍາກອນມະນຸດ ທີ່ມີຄຸນນະພາບສູງກວ່າເກົ່າ ແລະ ໂອ້ລົມນັກສຶກສາລາວທີ່ກຳລັງສຶກສາຮໍ່າຮຽນຢູ່ມະຫາວິທະຍາໄລແຫ່ງດັ່ງກ່າວ.

ແຂວງນິງບິ່ງ ໄດ້ໃຫ້ທຶນການສຶກສາແຂວງອຸດດົມໄຊໃນການສ້າງບຸກຄະລາກອນຢູ່ມະຫາວິ ທະຍາໄລຮົວລື ຈຳນວນທັງໝົດ 120 ຄົນ, ໃນນັ້ນຈົບໄປແລ້ວ 69 ຄົນ, ປັດຈຸບັນ ກຳລັງສຶກສາຕໍ່ 51 ຄົນ ໃນ 3 ຂະແໜງການຄື: ວິທະຍາສາດການສຶກສາ, ເສດຖະກິດ-ວັດທະນະທຳ ແລະຂະແໜງບໍລິການ.
ຂ່າວ-ພາບ: ສະຖານທູດລາວທີ່ຮ່າໂນ້ຍ

แชร์