ໂຄງການ ກ້າໄມ້ແຕກໃບສົດໃສຢືນຕົ້ນໃຫຍ່ງາມ ມອບທຶນຊຸກຍູ້ຊາວໜຸ່ມສ້າງອາຊີບ

   “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ໂຄງການສ້າງໂອກາດ ແລະ ສ້າງອາຊີບທີ່ໝັ້ນຄົງໃຫ້ກັບໄວໜຸ່ມທຸກຍາກໃນລາວພາຍຫຼັງທີ່ດຳເນີນໂຄງການມາ ແຕ່ປີ 2012 ເຫັນວ່າໄດ້ຮັບຜົນຕາມຄາດໄວໜຸ່ມຮ່ວມໂຄງການໄດ້ມີອາຊີບມີລາຍຮັບຈົນສາມາດຫຼຸດພົ້ນອອກຈາກຄວາມທຸກຍາກໄດ້ຫຼ້າສຸດໂຄງການໄດ້ສືບຕໍ່ເດີນສາຍມອບທຶນບໍ່ມີດອກເບ້ຍເພື່ອສ້າງຝັນໃຫ້ກັບໄວໜຸ່ມທຸກຍາກຢູ່ ແຂວງຫົວພັນ.

  ເມື່ອອາທິດຜ່ານມາທີ່ບ້ານຫ້ວຍທາດ ເມືອງເມີງ ແຂວງບໍ່ແກ້ວ ໂຄງການ “ກ້າໄມ້ແຕກໃບ ສົດໃສຢືນຕົ້ນໃຫຍ່ງາມ” ໄດ້ຈັດພິທີມອບທຶນບໍ່ມີດອກເບ້ຍກຳ ນົດ 3  ປີຈຳນວນ 10 ລ້ານກີບ ໃຫ້ກັບທ້າວ ຈອນ ໄຊຍະວົງ ອາຍຸ 20  ປີ ປະຊາຊົນບ້ານດັ່ງກ່າວເພື່ອເປີດບໍລິການຮ້ານສ້ອມແປງລົດຈັກຊຶ່ງຕາງໜ້າມອ ບຂອງທ່ານ ຄຳປຸ່ນ ແກ້ວວິພາກອນ ຮອງຫົວໜ້າກົມພັດທະນາວິຊາຊີບຊາວໜຸ່ມ ສູນກາງ ຊປລ ພ້ອມນີ້ກໍມີທ່ານ ນະຣົງວິດ ຄອງສິນ ຜູ້ຈັດການອົງກອນສຳພັນບໍລິສັດຣາຊ-ລາວ ບໍລິການຈຳກັດ ແລະພາກສ່ວນທີ່ກ່ຽວຂ້ອງຈາກຊາວໜຸ່ມແຂວງ, ເມືອງ, ອຳນາດປົກຄອງບ້ານ ແລະ ຜູ້ປົກຄອງເຂົ້າຮ່ວມ.

  ຮອງຫົວໜ້າກົມພັດທະນາວິຊາຊີບຊາວໜຸ່ມສູນກາງ ຊປລ ກ່າວວ່າ: ໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ແມ່ນການຮ່ວມມືລະຫວ່າງບໍລິສັດຣາຊ-ລາວບໍລິການຈຳກັດກັບກົມພັດທະນາວິຊາຊີບສູນກາງຊາວໜຸ່ມປະຊາຊົນປະຕິວັດລາວໃນການຊ່ວຍເຫຼືອຊາວໜຸ່ມລາວຊຶ່ງບໍລິສັດໄດ້ສະໜັບສະໜູນເງິນທຶນໝູນວຽນຈຳນວນໜຶ່ງໃຫ້ແກ່ສູນກາງຊາວໜຸ່ມເພື່ອສ້າງໂອກາດ ແລະ ມອບທຶນບໍ່ມີດອກເບ້ຍດ້ານການພັດທະນາຍົກລະດັບຄວາມຮູ້ດ້ານວິຊາການທັກສະສີມືແຮງງານສຳລັບປະກອບອາຊີບໃຫ້ແກ່ນັກຮຽນທີ່ຈົບການສຶກສາຈາກສູນຝຶກອົບຮົມວິຊາຊີບໃຫ້ແກ່ຊາວໜຸ່ມຜູ້ທີ່ດ້ອຍໂອກາດບໍ່ມີວຽກເຮັດງານທຳ ໃຫ້ມີອາຊີບທີ່ໝັ້ນຄົງໂດຍໄດ້ເລີ່ມແຕ່ເດືອນເມສາ 2012 ເປັນຕົ້ນມາ ແລະສຳລັບຜູ້ທີ່ໄດ້ຮັບທຶນໃນຄັ້ງນີ້ກໍຫວັງວ່າຈະນຳໃຊ້ຢ່າງມີປະສິດທິຜົນ.

ເບື້ອງຜູ້ຈັດການອົງກອນສຳພັນບໍລິສັດຣາຊ-ລາວບໍລິການຈຳກັດ ໄດ້ກ່າວແນະນຳຜູ້ຮັບທຶນພາຍທີ່ຮັບທຶນໄປປະກອບອາຊີບແລ້ວຈົ່ງໃຫ້ຄວາມສຳຄັນໃນການບໍລິຫານຈັດການທີ່ສຳຄັນຄວນມີບັນຊີລາຍຮັບ-ລາຍຈ່າຍບໍ່ໃຫ້ເອົາເອົາທຶນໄປໃຊ້ແນວອື່ນທີ່ອາດຈະສົ່ງຜົນຕໍ່ການເງິນຂອງທຸລະກິດພ້ອມດຽວກັນນີ້ກໍແນະນຳຫາກຊ້ວງເປີດຮ້ານໃໝ່ລູກຄ້້າບໍ່ຫຼາຍກໍຈົ່ງຊອກຊື້ລົດຈັກເກົ່າມາສ້ອມແປງເພື່ອເສີມສ້າງປະສົບການທັງຍັງຈະມີລາຍຮັບເພີ່ມໄດ້ອີກ.

  ທັງນີ້ຜູ້ໄດ້ຮັບທຶນກໍໄດ້ກ່າວສະແດງຄວາມຂອບໃຈທີ່ໂຄງການໄດ້ເປີດໂອກາດໃຫ້ກັບຕົນໄດ້ຮັບທຶນໃນການສ້າງອາຊີບໂດຍນັບຈາກນີ້ໄປກໍຈະເລີ່ມການສ້າງຮ້ານຊື້ອຸປະກອນການສ້ອມແປງເພື່ອໃຫ້ບົດຮຽນທີ່ຕົນຮຽນສ້ອມແປງລົດຈັກມາແຕ່ປີ 2017 ໄດ້ນຳມາຈັດຕັ້ງປະຕິບັດຕົວຈິງໂດຍພາຍໃນບ້ານນັບຮ້ອຍຄອບຄົວແມ່ນຍັງບໍ່ທັນມີຮ້ານສ້ອມແປງລົດ.

ຂ່າວ: ນສພ ເສດຖະກິດ-ສັງຄົມ

แชร์