ບໍລິສັດ ມະຫາທຶນ ເຊົ່າສິນເຊື່ອ ຈັບມືກັບຮ້ານຄໍາພູວົງ ຈັດໂຄງການ “ຜ່ອນຄໍາ”

ບໍລິສັດ ມະຫາທຶນ ເຊົ່າສິນເຊື່ອ ມະຫາຊົນ ຜູ້ໃຫ້ບໍລິການເຊົ່າສິນເຊື່ອໄດ້ຈັດພິທີລົງນາມການຮ່ວມມືທາງທຸລະກິດເຊົ່າສິນເຊື່ອຜ່ອນຊື້ຄໍາ ຈາກ “ຮ້ານຄໍາພູວົງ” ຜູ້ປະກອບການຮ້ານຊື້-ຂາຍຄໍາລາຍໃຫຍ່ ໃນ ສປປ ລາວ ໃນວັນທີ 7 ພະຈິກນີ້ ທີ່ໂຮງແຮມຄຣາວພລາຊານະຄອນຫຼວງວຽງຈັນ.

ໃຫ້ກຽດລົງນາມໃນສັນຍາ ທ່ານ ທິຣະ ຊຸດຕິວະລາພອນ ປະທານບໍລິສັດມະຫາທຶນເຊົ່າສິນເຊື່ອມະຫາຊົນ, ທ່ານ ຈັນທະວົງ ພະມີສິດ ອໍານວຍການບໍລິສັດຄໍາພູວົງກຣຸບ, ເປັນກຽດເຂົ້າຮ່ວມເປັນສັກຂີພິຍານຂອງ ທ່ານ ສຸພັກ ຖິ່ນໄຊພອນ ຜູ້ອໍານວຍການໃຫຍ່ຕະຫຼາດຫຼັກຊັບລາວ, ທ່ານ ພູວຽງ ພົງສາ ຫົວໜ້າກົມການຄ້າພາຍໃນ ກະຊວງອຸດສາຫະກໍາ ແລະການຄ້າ, ທ່ານ ຄໍາພູວົງ ພະມີສິດ ປະທານຮ້ານຄໍາພູວົງທັງເປັນປະທານສະມາຄົມຄໍາເຄື່ອງປະດັບ ແລະອັນຍະມະນີລາວ ພ້ອມດ້ວຍບັນດາທ່ານແຂກຖືກເຊີນ.

ຈຸດປະສົງໃນການຮ່ວມມືທາງທຸລະກິດເຊົ່າສິນເຊື່ອຜ່ອນຊື້ຄໍາລະຫວ່າງ “ມະຫາທຶນ ເຊົ່າສິນເຊື່ອ” ແລະ “ຮ້ານຄໍາພູວົງ” ໃນຄັ້ງນີ້ຈະເປັນການເພີ່ມຄວາມສາມາດໃນການເຂົ້າເຖິງຊັບສິນ “ຄໍາ” ຊຶ່ງເປັນທີ່ນິຍົມຂອງປະຊາຊົນໃນການສວມໃສ່ຄໍາເປັນເຄື່ອງປະດັບ ແລະ ການສະສົມຄໍາເພື່ອຄວາມໝັ້ນຄົງໃນອະນາຄົດ ໂດຍຈະມີການນໍາເອົາລະບົບອອນລາຍທີ່ຊ່ວຍໃຫ້ຂໍ້ມູນການປະເມີນສິນເຊື່ອຂອງລູກຄ້າຖືກຕ້ອງ ແລະໄວທີ່ສຸດ, ເຮັດໃຫ້ລູກຄ້າຮູ້ຜົນການພິຈາລະນາສິນເຊື່ອໄດ້ໄວພາຍໃນຊົ່ວໂມງເຄິ່ງ.
ຈາກປະສົບການດໍາເນີນງານດ້ານສິນເຊື່ອຜ່ອນຊື້ມາຢ່າງຍາວນານເຮັດໃຫ້ “ມະຫາທຶນ” ມີຄວາມພ້ອມໃນດ້ານການປະເມີນວົງເງິນສິນເຊື່ອໃຫ້ກັບລູກຄ້າໄດ້ທຸກກຸ່ມ ທັງກຸ່ມລູກຄ້າທີ່ມີລາຍໄດ້ປະຈໍາ ແລະ ກຸ່ມອາຊີບອິດສະຫຼະຕ່າງໆ ໄດ້ຢ່າງທົ່ວເຖິງ ໂດຍສະເພາະກຸ່ມອາຊີບອິດສະຫຼະທີ່ຕ້ອງໄດ້ໃຊ້ຄວາມສາມາດ ແລະ ປະສົບການໃນການພິຈາລະນາສິນເຊື່ອໃຫ້ສອດຄ່ອງກັບຄວາມສ່ຽງຂອງລູກຄ້າໄດ້ຢ່າງທົ່ວເຖິງຫຼາຍທີ່ສຸດ.

ຈາກການໃຫ້ບໍລິການ ແລະ ດໍາເນີນທຸລະກິດດ້ານຄໍາມາຢ່າງຍາວນານຂອງ “ຮ້ານຄໍາພູວົງ” ຈົນກາຍເປັນຮ້ານຊື້-ຂາຍຄໍາອັນດັບ 1 ໃນປະເທດລາວ ທີ່ປະຊາຊົນໃຫ້ຄວາມເຊື່ອໝັ້ນ ຈາກຮ້ານ 1 ສາຂາ ມາເປັນ 7 ສາຂາ ແລະ ຮ້ານພາດເນີ ອີກ 70 ກວ່າຮ້ານໃນປັດຈຸບັນ ພວກເຮົາມີຄວາມໝັ້ນໃຈວ່າຈະສາມາດໃຫ້ບໍລິການຜ່ອນຊື້ຄໍາ ຮ່ວມກັບ ມະຫາທຶນໄດ້ຢ່າງສົມບູນ. ທ່ານ ຄໍາພູວົງ ພະມີສິດ ກ່າວວ່າ: ຮ້ານຄໍາພູວົງຖືເອົາຄວາມຊື່ສັດ, ຄວາມໂປ່ງໃສເປັນຫຼັກມອບໃຫ້ກັບລູກຄ້າ ແລະການບໍລິການທີ່ມີຄຸນນະພາບ, ຕະຫຼອດໄລຍະ 30 ກວ່າປີທີ່ຜ່ານມາຈຶ່ງເຮັດໃຫ້ກ້າວມາເປັນຮ້ານຄໍາພູວົງ ທີ່ໄດ້ຮັບການຍອມຮັບຈາກມວນຊົນຄົນລາວທັງພາຍໃນ ແລະ ຕ່າງປະເທດ.
ຂ່າວ-ພາບ: ນາງແສງຈັນ

แชร์