ຕີຄີ ເປັນປະເພນີທີ່ສືບທອດກັນມາຍາວນານໃນງານບຸນນະມັດສະການພຮະທາດຫລວງວຽງຈັນ

ບຸນນະມັດສະການພະທາດຫຼວງວຽງຈັນ ເປັນບຸນທີ່ຍິ່ງໃຫຍ່ທີ່ສຳຄັນເຊິ່ງເປັນບ່ອນເຕົ້າໂຮມຈິດໃຈຂອງປະຊາຊົນລາວບັນດາເຜົ່າໂດຍສະເພາະຊາວພຸດຜູ້ທີ່ເຫຼື້ອມໃສໃນພະພຸດທະສາສະໜາໄດ້ມາຮ່ວມກັນເຮັດບຸນສິນກິນທານເຊິ່ງໃນແຕ່ລະປີນອກຈາກຈະມີກິດຈະກຳທາງສາສະໜາ ແລະວາງສະແດງສິນຄ້າແລ້ວຍັງມີກິດຈະກຳໜຶ່ງທີ່ຂາດບໍ່ໄດ້ ແລະເປັນປະເພນີທີ່ສຶບຕໍ່ມາແຕ່ດົນນານ ນັ້ນກໍຄື: ການຕີຄີ ໃນເມື່ອກ່ອນເພີ່ນຍັງມີກິລາ ຕີໝໍ້, ຫຼິ້ນໝາກເດິ, ຫຼິ້ນໝາກຜີຕາແຕກ, ເຊືອກດຶງແອວ, ເສັງກອງ ແລະອື່ນໆ ເພື່ອຄົບງັນ.

ບັນດາກິລາດັ່ງກ່າວ, ມາຮອດປັດຈຸບັນຍັງເຫຼືອແຕ່ ຕີຄີ ເຊິ່ງເພິ່ນຈະຈັດໃຫ້ມີໃນມື້ເພັງ15 ຄໍ່າ ພາຍຫຼັງຕັກບາດແລ້ວ. ສຳລັບການຕີຄີນີ້, ເພິ່ນກໍໄດ້ກະກຽມລ່ວງໜ້າຄືໄປຊອກຫາເຫງົ້າໄມ້ໄຜ່ໂງະໆ ມາເຮັດເປັນໄມ້ສຳລັບຕີ, ມີຄວາມຍາວປະມານ 1 ວາ, ລູກຄີ ກໍຫຼໍ່ດ້ວຍຂາງປະສົມເຫຼັກ ແລະທອງ ໃຫ້ເປັນຮູບມົນໆ. ກ່ອນຈະລົງເດີ່ນຕີຄີເພິ່ນກໍຈັດແບ່ງຄົນອອກເປັນສອງຝ່າຍຄື: ຝ່າຍໜຶ່ງເປັນຝ່າຍປົກຄອງ ແລະອີກຝ່າຍໜຶ່ງເປັນຝ່າຍພົນລະເມືອງ ໂດຍກຳນົດເອົາຝ່າຍລະ 20-30 ຄົນ ແລະ ມີການເຮັດພິທີທຳທາງສາສະໜາກ່ອນຈະລົງຕີຄີໄດ້.

ກິດຈະກຳຕີຄີ ຫຼືກິລາຕີຄີນີ້ຖືເປັນກິດຈະກຳທີ່ຫາເບິ່ງໄດ້ຍາກເພາະເພີ່ນຈະເຮັດໃນມື້ບຸນທາດຫຼວງເທົ່ານັ້ນ, ຄົນສະໄໝກ່ອນມີຄວາມເຊື່ອວ່າການຕີຄີແມ່ນການສ່ຽງທວາຍເຖິງເຫດການບ້ານເມືອງເພິ່ນເວົ້າວ່າຖ້າຝ່າຍປົກຄອງຊະນະກໍທວາຍວ່າປີນັ້ນປະຊາຊົນພົນລະເມືອງບໍ່ຄ່ອຍຢູ່ດີຈະຖືກພວກຂຸນນາງຈະບັງຄົບຂົ່ມເຫັງ, ແຕ່ຖ້າປີໃດພົນລະເມືອງຊະນະປີນັ້ນປະຊາຊົນຈະຢູ່ເຢັນເປັນສຸກ.

ການຫຼິ້ນກິລາຕີຄີນີ້, ເພິ່ນຈະໃຊ້ໄມ້ໂງະໆນັ້ນຕີ ຫຼືເກາະລູກຄີໄປຫາໂກນ (ເຂດແດນ) ທີ່ເພິ່ນກຳນົດໄວ້ຄື: ກວ້າງ 3 ວາ,ສູງ 2 ວາ, ແຕ່ຫາກບໍ່ມີຕາໜ່າງຄືໂກນເຕະບານ.

ສໍາລັບການຕີຕີໃນການບຸນນະມັດສະການພະທາດຫລວງວຽງຈັນປະຈໍາປີ 2022 ແມ່ນທີມປະຊາຊົນເອົາຊະນະທີມພະນັກງານ 5 ຕໍ່ 4 ປະຕູ.
ຂ່າວ-ພາບ: ພູເງິນ

แชร์