ສ້າງເວທີຮ່ວມມືດ້ານການຄ້າ ໃຫ້ນະຄອນຊຽງໄຮ້ເປັນຈຸດສູນກາງຮັບໃຊ້ ໜຶ່ງແລວ-ໜຶ່ງເສັ້ນທາງ

ພິທີເຊັນບົດບັນທຶກຄວາມເຂົ້າໃຈການຮ່ວມມືດ້ານການຄ້າ ແລະເສດຖະກິດລະຫວ່າງ ກົມສົ່ງເສີມການຄ້າກະຊວງອຸດສາຫະກຳ ແລະການຄ້າ (ອຄ) ແຫ່ງ ສປປ ລາວ ແລະ ອົງການປົດຄອງປະຊາຊົນເຂດຢາງພູ ນະຄອນຊຽງໄຮ້ ສປ ຈີນ ຈັດຂຶ້ນໃນວັນທີ 6 ພະຈິກຜ່ານມາທີ່ຫໍວາງສະແດງນໍາເຂົ້າສາກົນແຫ່ງຊາດຈີນ ໂດຍການຮ່ວມລົງນາມ ລະຫວ່າງ ເຊ ຟ່າງ ຮອງເຈົ້າເມືອງເຂດຢາງພູ ນະຄອນຊຽງໄຮ້ ແລະຕາງໜ້າຝ່າຍລາວເຊັນໂດຍ ທ່ານ ຂວັນໃຈ ອ່ຽນສຸທິ ທີ່ປຶກສາທູດເສດຖະກິດ-ການຄ້າລາວ ສະ ຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ ໂດຍມີພາດສ່ວນກ່ຽວຂ້ອງ ສອງຝ່າຍເຂົ້າຮ່ວມ, ທັງນີ້ ກໍເພື່ອສືບຕໍ່ເສີມຂະຫຍາຍໝາກຜົນອັນຫລວງຫລາຍ ຂອງການວາງສະແດງສິນຄ້ານຳເຂົ້າສາກົນຈີນ, ສ້າງເວທີການຮ່ວມມືລະດັບສູງໃນດ້ານເສດຖະກິດ-ການຄ້າ, ຊ່ວຍໃຫ້ນະຄອນຊຽງໄຮ້ເປັນຈຸດສູນກາງ ທີ່ຮັບໃຊ້ໃຫ້ແກ່ “ໜຶ່ງແລວ-ໜຶ່ງເສັ້ນທາງ”.

ເຂດຢາງພູ ໄດ້ປະຕິບັດຕາມທິດຊີ້ນຳຂອງປະທານ ສີ ຈີ້ນຜິງ ກ່ຽວກັບ “ການສືບຕໍ່ສ້າງຄູ່ຮ່ວມຊາຕາກຳ ຈີນ-ລາວ ທີ່ໜັກແໜ້ນບໍ່ສາມາດຕັດແຍກອອກຈາກກັນ”, ນຳໃຊ້ເວທີງານວາງສະແດງສິນຄ້ານຳເຂົ້າສາກົນຈີນເພື່ອຍົກສູງສາຍພົວພັນການຮ່ວມມືກັບກົມສົ່ງເສີມການຄ້າ, ກະຊວງອຸດສາຫະກຳ ແລະການຄ້າ ສປປ ລາວ ຢ່າງຮອບດ້ານ ໃນການປະສານສົມທົບ, ປຶກສາຫາລືກັນຢ່າງສະໜິດແໜ້ນ, ຮ່ວມມືກັນຢ່າງເລິກເຊິ່ງ.

ຜົນສຳເລັດ ໃນການລົງນາມບົດບັນທຶກຄວາມເຂົ້າໃຈດັ່ງກ່າວແມ່ນການດຳເນີນການຕາມ “ສັນຍາຄູ່ ຮ່ວມມື ເສດຖະກິດພາກພື້ນຮອບດ້ານ” (RCEP). ການດຳເນີນການຕາມ RCEP ໄດ້ກະຕຸ້ນຄວາມຄາດຫວັງ ຂອງບັນດາປະເທດອາຊຽນ ໃນການແບ່ງປັນຜົນສຳເລັດຂອງການພັດທະນາ ແລະເປີດກ້ວາງຂອງຈີນ, ລວມທັງຄວາມຄາດຫວັງໃນການເພີ່ມທະວີການຮ່ວມມືໃນການສ້າງ “ໜຶ່ງແລວ-ໜຶ່ງເສັ້ນທາງ”.ການລົງນາມບົດບັນທຶກຄວາມເຂົ້າໃຈໃນຄັ້ງນີ້ໂດຍພື້ນຖານແລ້ວກໍແມ່ນການປະຕິບັດງານຕົວຈິງຂອງເຂດຢາງພູ ເພື່ອຮັບໃຊ້ນະຄອນຊຽງໄຮ້ ແລະ ນະຄອນຊຽງໄຮ້ ຮັບໃຊ້ໃຫ້ແກ່ທົ່ວປະເທດຈີນ, ຊຶ່ງສະໜອງເວທີອັນໃໝ່ ແກ່ນະຄອນຊຽງໄຮ້ໃນການສ້າງຈຸດສູນກາງຂອງຕະຫລາດທົ່ວປະເທດ ທີ່ເອກະພາບ ແລະ ການເຊື່ອມໂຍງທາງດ້ານຍຸດທະສາດລະຫວ່າງ ການໝູນວຽນແບບຄູ່ ພາຍໃນ ແລະ ຕ່າງປະເທດ, ພ້ອມທັງສ້າງແນວທາງປະຕິບັດໃໝ່ໃຫ້ ແກ່ນະຄອນຊຽງໄຮ້ ເປັນຈຸດສູນກາງ ທີ່ຮັບໃຊ້ໃຫ້ແກ່ “ໜຶ່ງແລວ-ໜຶ່ງເສັ້ນທາງ”, ພ້ອມດຽວກັນນັ້ນ ຍັງໄດ້ສະໜອງ “ແນວທາງຂອງຢາງພູ” ໃນການລົງເລິກຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ-ໜຶ່ງເສັ້ນທາງ” ແລະ RCEP ໃນພາກພື້ນອາຊີຕາເວັນອອກສ່ຽງໃຕ້, ຊຶ່ງຈະສະແດງໃຫ້ເຫັນເຖິງບົດບາດການເປັນແບບຢ່າງ ແລະການນຳພາອີກດ້ວຍ.

ທາງລົດໄຟ ຈີນ-ລາວ ສາມາດກາຍເປັນຂົວເຊື່ອມຕໍ່ອັນສຳຄັນທີ່ມີທ່າແຮງໃນການເຊື່ອມໂຍງນະຄອນຊຽງໄຮ້ ກັບ ສປປ ລາວ, ເຮັດໃຫ້ຜະລິດຕະພັນກະສິກຳທີ່ມີຄຸນນະພາບສູງຂອງ ສປປ ລາວ ສາມາດຂົນສົ່ງມາເຖິງນະຄອນຊຽງໄຮ້ ພາຍໃນ 24 ຊົ່ວໂມງໄດ້ກາຍເປັນຄວາມຈິງ, ທັງເຮັດໃຫ້ທ່າແຮງດ້ານອຸດສາຫະກຳ, ເງິນທຶນ, ເຕັກໂນໂລຊີ, ຂໍ້ມູນຂ່າວສານ ແລະອື່ນໆ ຂອງກຸ່ມຕົວເມືອງ “ສາມຫລ່ຽມປາກແມ່ນໍ້າຢາງຊີ” ຊຶ່ງນຳໜ້າໂດຍຊຽງໄຮ້ໄດ້ມີຊ່ອງທາງກ້າວອອກໄປສູ່ສາກົນ.
ຂໍ້ມູນ: ກົມສົ່ງເສີມການຄ້າ ກະຊວງ ອຄ

แชร์